បារាំងចាប់ខ្លួន បុគ្គលសំខាន់ម្នាក់នៃអំពើប្រល័យពូជសាសន៍ រវ៉ាន់ដា ក្រោយរត់គេចខ្លួនអស់២៥ឆ្នាំ
តុលាការព្រហ្មទណ្ឌអន្តរជាតិ នៅទីក្រុងឡាអេ បានស្វាគម អាជ្ញាធរ បារាំងដែលទើបចាប់ខ្លួនជនសង្ស័យដ៏សំខាន់ម្នាក់ នៃអំពើប្រល័យពូជសាសន៍ នៅប្រទេសរវ៉ាន់ដា។ នៅព្រឹកថ្ងៃសៅរ៍ម្សិលមិញ ប៉ូលិសបារាំង ទទួលបន្ទុក ប្រយុទ្ធប្រឆាំងឧក្រិដ្ឋកម្មប្រឆាំងមនុស្សជាតិ បានចាប់ខ្លួន Felicien Kabugaដែលគេចាត់ទុកជាហិរញ្ញិក ឧបត្ថម្ភ គាំទ្រ ក្រុមឈ្លបប្រដាប់អាវុធហ៊ូទូ ក្នុងបទឧក្រិដ្ឋសម្លាប់ប្រជាជនទុយស៊ី នៅរវ៉ាន់ដា កាលពី២៥ឆ្នាំ មុន។
ចុះផ្សាយនៅថ្ងៃ៖
ស្តាប់ - ០២:៥៣
តាមសេចក្តីថ្លែងការណ៍របស់តុលាការព្រហ្មទណ្ឌអន្តរជាតិ ដែលមានទីស្នាក់ការនៅទីក្រុងឡាអេ ប្រទេសហូឡង់ ប៉ូលិសបារាំងបានឈានទៅចាប់ខ្លួន ជនសង្ស័យ Felicien Kabuga បន្ទាប់ពីមានការសហការដ៏ប្រទាក់ក្រឡា និងការស៊ើបអង្កេតពីទីតាំង ដ៏កៀកកិតបំផុត។
Felicien Kabuga អាយុ ៨៤ ឆ្នាំដែលតុលាការអន្តរជាតិ កំពុងតាមរកចាប់ខ្លួន ក្នុងបទចោទប្រកាន់ចំនួន ៧ ទាក់ទងនឹងអំពើប្រល័យពូជសាសន៍ នៅរវ៉ាន់(ក្នុងនោះ មានអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ) ត្រូវបានប៉ូលិសបារាំងសង្រ្គប់ ចូលចាប់ខ្លួន នៅផ្ទះរបស់កូនប្រុស ដែលស្ថិតនៅសង្កាត់អ្នកមានមួយ ជាយក្រុងប៉ារីស។
រដ្ឋអាជ្ញារបស់តុលាការព្រហ្មទណ្ឌអន្តរជាតិ កាលពីថ្ងៃសៅរ៍ បានថ្លែងអំណរគុណប៉ូលិសបារាំង និងប្រទេសផ្សេងទៀត រួមទាំងប៉ូលិសអាំងទែរប៉ូល អឺរ៉ូប៉ូល ដែលបានរួមចំណែក ជួយឲ្យគេចាប់ខ្លួន មនុស្សសំខាន់នៃអំពើប្រល័យពូជសាសន៍ ដែលបានសម្លាប់មនុស្សប្រមាណ ៨សែននាក់ នៅរវ៉ាន់ដា។ “ការចាប់ខ្លួន Felicien Kabuga នៅថ្ងៃនេះ រំលឹកឲ្យគេឃើញថា អ្នកទទួលខុសត្រូវលើប្រល័យពូជសាសន៍ នៅតែត្រូវគេនាំមកជំនុំជម្រះ ទោះជានៅ ២៦ឆ្នាំ ក្រោយ ការប្រព្រឹត្តបទឧក្រិដ្ឋកម្មរបស់ពួកគេក្តី” នេះជាប្រសាសន៍របស់លោក Serge Brammertz រដ្ឋអាជ្ញានៃតុលាការព្រហ្មទណ្ឌអន្តរជាតិ។
នៅឆ្នាំ ១៩៩៤ Felicien Kabuga ជាមនុស្សសំខាន់ក្នុងរង្វង់ប្រធានាធិបតី ហ៊ូទូ ដែលត្រូវគេលបធ្វើឃាត នៅខែមេសា ឆ្នាំដដែល។ តាមបញ្ជីចោទប្រកាន់របស់តុលាការ អន្តរជាតិ Felicien Kabugaជា ប្រធានវិទ្យុដ៏ល្បីឈ្មោះរបស់រវ៉ាន់ដា ឈ្មោះ កូនភ្នំ ១ពាន់ ដែលបានផ្សព្វផ្សាយ លើកទឹកចិត្ត ឲ្យមានគេកាប់សម្លាប់ប្រជាជនទុតស៊ី។ លោកជាប្រធានមូលនិធិការពារជាតិដែលមាននាទីប្រមូលថវិកាសម្រាប់ទិញ អាវុធ ផ្គត់ផ្គង់ពួកឈ្លប ហ៊ូទូ ដើម្បីកាប់សម្លាប់ ជនជាតិទុតស៊ី។ លោកនៅបានអនុញ្ញាតឲ្យបុគ្គលិកក្រុមហ៊ុនរបស់លោក ទិញ នាំចូលកាំបិត ដែលគេប្រើសម្រាប់សម្លាប់ប្រជាជនទុតស៊ី។
រត់គេចខ្លួនពីរវ៉ាន់ដា នៅខែកក្កដា ឆ្នាំ ១៩៩៤ Felicien Kabuga បានទៅសំងំលាក់ខ្លួននៅស្វ៊ីស មុននឹងត្រូវអាជ្ញាធរស្វ៊ីសបណ្តេញចេញពីប្រទេស។ តាមអង្គការក្រៅរដ្ឋាភិបាល Felicien Kabugaធ្លាប់ទៅរស់នៅលាក់ខ្លួន នៅបណ្តាប្រទេសអាហ្វ្រិក ប៉ុន្តែ ត្រូវរត់គេចខ្លួនជាបន្តបន្ទាប់ ដោយសារតែដីកាតាមចាប់ខ្លួនរបស់តុលាការ។ តាមសេចក្តីថ្លែងការណ៍របស់អាជ្ញាធរបារាំង គេជឿថា Felicien Kabugaធ្លាប់ទៅរស់នៅអាល្លឺម៉ង់ និងបែលហ្ស៊ិក។ អាមេរិកវិញ ធ្លាប់បានសន្យាផ្តល់រង្វាន់ ៥លានដុល្លារ បើសិនគេអាចផ្តល់ព័ត៌មានសម្រាប់ឈានទៅចាប់ខ្លួន Felicien Kabuga។
តាមការិយាល័យរបស់រដ្ឋអាជ្ញាធររបស់តុលាការព្រហ្មទណ្ឌអន្តរជាតិ Felicien Kabugaនឹងត្រូវបញ្ជូនឲ្យទៅប្រឈមនឹងការកាត់ទោសរបស់ Mechanism សម្រាប់តុលាការព្រហ្មទណ្ឌអន្តរជាតិ ដែលមានសាខានៅប្រទេសតង់ហ្សានី។ Mechanism អន្តរជាតិ ជារចនាសម្ព័ន្ធមួយរបស់តុលាការព្រហ្មទណ្ឌអន្តរជាតិ ដែលទទួលបន្ទុក ជំនុំជម្រះ សំណុំរឿង បន្ត ពីតុលាការអន្តរជាតិសម្រាប់រវ៉ាន់ដា ដែលបានបិទបញ្ចប់ការជំនុំជម្រះ កាលពីឆ្នាំ ២០១៥។ ប្រភពតុលាការក្រុងឡាអេ បានពន្លយប្រាប់ទីភ្នាក់ងារព័ត៌មានបារាំង AFP ថា ដំណើរការចាប់បញ្ជូនខ្លួន ជនសង្ស័យKabugaនឹងអាចត្រូវពន្យារពេល ដោយសារ វិធានការបិទព្រំដែន ដើម្បីទប់ស្កាត់ការចម្លងជំងឺ កូវីដ ១៩។ តាមប៉ូលិសបារាំង Kabuga ក្នុងអាយុ ៨៤ ឆ្នាំដែលស្ងប់ស្ងាត់ និងបន្លំឈ្មោះ អត្តសញ្ញាណ រស់លាក់ខ្លួន នៅបារាំងនឹងត្រូវប្រឈមមុខនឹងតុលាការបារាំង ដែលជាអ្នកអាចសម្រេចការឃុំខ្លួន ក្នុងពេលរង់ចាំ ការចាប់បញ្ជូនខ្លួនឲ្យទៅកាត់ទោស នៅ តុលាការអន្តរជាតិ ដែលបោះទីតាំងនៅប្រទេសតង់ហ្សានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ