វិបត្តិកូវីដធ្វើឲ្យក្រុមហ៊ុនអាកាសចរណ៍ ក្ស័យធុន ឬក៏ជួបវិបត្តិប្រាក់បំណុល
ចុះផ្សាយនៅថ្ងៃ៖
ស្តាប់ - ០៤:៥៨
មានយន្តហោះរបស់ខ្លួន នៅជាប់នឹងដី ដោយសារវិធានការបិទព្រំដែន នៅគ្រប់កន្លែង ក្នុងពិភពលោក ដោយសារជំងឺរាតត្បាតកូវីដ ១៩ ក្រុមហ៊ុនអាកាសចរណ៍មិនថា នៅអាស៊ី អឺរ៉ុប អាមេរិក ឬអាហ្វ្រិក សុទ្ធតែរងការខាតបង់យ៉ាងធ្ងន់ធរ។ ដោយសារតែអាក់ខាន ហោះហើរ និងគ្មានប្រាក់ចំណូល អស់ជាច្រើនខែ ក្រុមហ៊ុនអាកាសចរណ៍ឯកជនមួយចំនួន បានក្ស័យធន ចំណែកក្រុមហ៊ុនអាកាសចរណ៍រដ្ឋវិញ មានជោគវាសនាបានទទួលជំនួយសង្រ្គោះបន្ទាន់ពីរដ្ឋាភិបាល។ តើជំនួយរដ្ឋាភិបាល នឹងជួយក្រុមហ៊ុនអាកាសចរណ៍ឲ្យងើបដើរចេញពីវិបត្តិសេដ្ឋកិច្ច លើកនេះ ដែរឬទេ?
គេផលិតយន្តហោះដើម្បីឲ្យហោះដឹកជញ្ជូន ទំនិញ ឬអ្នកដំណើរ ប៉ុន្តែ មិនមែនឲ្យមកចតចោល ជាប់នឹងដីនោះទេ។ នៅពេល យន្តហោះចតជាប់នៅលើដី ក្រុមហ៊ុនអាកាសចរណ៍មិនត្រឹមតែគ្មានចំណូល ប៉ុន្តែ ត្រូវចំណាយលុយសម្រាប់ ការថែទាំ និងបង់ថ្លៃសម្រាប់ចំណតយន្តហោះ ដែលអាចមានតម្លៃយ៉ាងតិច ១ពាន់ដុល្លារ សម្រាប់យន្តហោះមួយគ្រឿង ក្នុងមួយថ្ងៃ។
ចុះទម្រាំ យន្តហោះត្រូវចតចោល នៅលើដី ដល់ទៅជាង៣ខែ ដោយសារ ដោយសារតែ ការបិទព្រំដែន និងវិធានការ សុខភាព របស់រដ្ឋាភិបាល ដើម្បីទប់ស្កាត់ការឆ្លងជំងឺកូវីដ តើក្រុមហ៊ុននឹងខាតបង់ប៉ុណ្ណាទៅ?
តាមសមាគមដឹកជញ្ជូនផ្លូវ អាកាសអន្តរជាតិ ដែលមានក្រុមហ៊ុនអាកាសចរណ៍ចំនួន ២៩០ជាសមាជិក យន្តហោះប្រមាណ ១៦ ០០០គ្រឿង នៅក្នុងពិភពលោក ត្រូវចតចោលនៅលើដី ចាប់តាំងពីខែមីនា នៅពេលរដ្ឋាភិបាលចាប់ផ្តើមចាត់វិធានការបិទព្រំដែន ហាមមិនឲ្យមនុស្សជាង ៤ពាន់លាននាក់ ធ្វើដំណើរ ដើម្បីទប់ស្កាត់ការឆ្លងរីករាលជំងឺកូវីដ។ នៅខែមេសា នៅពេលជំងឺកូវីដ ចាប់រាតត្បាតខ្លាំងពេញពិភពលោក ជាពិសេសនៅទឹកដីអឺរ៉ុប ចំនួនជើងហោះហើររបស់ក្រុមហ៊ុនអាកាសចរណ៍ ក្នុងពិភពលោក បានធ្លាក់ចុះ អស់ ៩៤% បើប្រៀបធៀបនឹងឆ្នាំ មុន។ គេអាចនិយាយថា ក្រុមហ៊ុនអាកាសចរណ៍បានប្រើយន្តហោះឲ្យហោះហើរ បានប្រមាណតែ ៦%ប៉ុណ្ណោះ នៅក្នុងមួយខែ មេសា។
ឧស្សាហកម្មអាកាសចរណ៍ខាតប្រាក់ ២៥២ពាន់លានដុល្លារដោយសារតែកូវីដ១៩
យន្តហោះជាង ១ម៉ឺនគ្រឿង គ្មានសកម្មភាព និងត្រូវចតទំនេរចោលជាង ២ខែ។ យន្តហោះនៅជាប់នឹងដីក្នុងរយៈពេល ដ៏យូរបែបនេះ គឺហេតុការណ៍ ដែលមិនធ្លាប់កើតមានទេ ពីមុនមក នៅក្នុងប្រវត្តិក្រុមហ៊ុនអាកាសចរណ៍។
តាមសមាគម ដឹកជញ្ជូនផ្លូវអាកាសអន្តរជាតិ វិបត្តិកូវីដលើកនេះ ប៉ះពាល់ខ្លាំង ដល់វិស័យឧស្សាហកម្មអាកាសចរណ៍ ដែលអាចខាតបង់ ទឹកប្រាក់ប្រមាណ២៥២ពាន់លានដុល្លារ ចំណែក ការងារជាង ២៥លាន នៅក្នុងវិស័យមួយនេះ កំពុងរងការគំរាមកំហែង ជាពិសេស នៅតំបន់អាស៊ីប៉ាស៊ីហ្វិក។
តាមសមាគមដឹកជញ្ជូនផ្លូវអាកាសដដែល ក្រុមហ៊ុនអាកាសចរណ៍តែមួយមុខ ប្រឈមនឹងការខាតបង់ប្រមាណ ៨៤ពាន់លានដុល្លារ នៅឆ្នាំនេះ និង១៥ពាន់លានដុល្លារ នៅឆ្នាំក្រោយ។ វិបត្តិកូវីដ ធ្វើឲ្យក្រុមហ៊ុនអាកាសចរណ៍ ខាតបង់ ធ្ងន់ធ្ងរ ជាងកាលវិបត្តិហិរញ្ញវត្ថុឆ្នាំ ២០០៨ ដែលកាលណោះ មានត្រឹមតែ៣១ពាន់លានដុល្លារប៉ុណ្ណោះ។
ស្ថិតក្នុងស្ថានភាព ដែលធនធានហិរញ្ញវត្ថុ របូតរបាញ ដ៏លឿនរហ័ស ក្រុមហ៊ុនអាកាសចរណ៍ដែលមានតែហិបលុយ ទទេ បានរត់ទៅរកជំនួយអន្តរាគមន៍ពីរដ្ឋ ដើម្បីយករួចខ្លួនពីការក្ស័យធន។ សម្រាប់ក្រុមហ៊ុនហោះហើរ Lufthansa រដ្ឋាភិបាលអាល្លឺម៉ង់បានផ្តល់ប្រាក់៩ពាន់លានអឺរ៉ូ ដែលក្នុងនោះ ៣ពាន់លានអឺរ៉ូ ជាប្រាក់កម្ចី ពីរដ្ឋាភិបាល។ ដោយផ្តល់ជំនួយ ហិរញ្ញវត្ថុដ៏ច្រើនសម្បើមលើកនេះ រដ្ឋាភិបាលអាល្លឺម៉ង់ មានសិទ្ធិលើភាគហ៊ុន ២៥%របស់ក្រុមហ៊ុន អាកាសចរណ៍ Lufthansa។
នៅបារាំងវិញ រដ្ឋាភិបាលបានជួយក្រុមហ៊ុនAir France ឲ្យទទួលបានប្រាក់កម្ចី ៧ពាន់លានអឺរ៉ូ ដែលក្នុងនោះ ២ពាន់លានដុល្លារ ជាប្រាក់កម្ចីពីខាងរដ្ឋាភិបាល។ នៅអាមេរិក ក្រុមហ៊ុនអាកាសចរណ៍ ធំៗបានទទួលជំនួយ ៥០ពាន់លានដុល្លារ សម្រាប់ផែនការសង្រ្គោះ ក្រុមហ៊ុនអាកាសចរណ៍ ក្នុងស្រុក ដែលក្នុងនោះ២៥ពាន់លានដុល្លារ ជាប្រាក់កម្ចី។
ការផ្តល់ជំនួយបន្ទាន់របស់រដ្ឋាភិបាលអឺរ៉ុប និងអាមេរិក បានជួយស្រោចស្រង់ មួយគ្រា ក្រុមហ៊ុនអាកាសចរណ៍ក្នុងស្រុករបស់ខ្លួន។ ប៉ុន្តែ នៅអាហ្វ្រិក អាស៊ី ក្រុមហ៊ុនអាកាសចរណ៍ជាច្រើនបានប្រកាសក្ស័យធន ឬត្រូវ រុះរើរៀបចំរចនាសម្ព័ន្ធឡើងវិញ ដូចជាក្រុមហ៊ុនអាកាសចរណ៍ Thai Airway ជាដើម។
{{ scope.legend }}
© {{ scope.credits }}ក្រុមហ៊ុនអាកាសចរណ៍ វណ្ឌ ក នឹងបំណុល ដោយសារ ជំងឺរាតត្បាត កូវីដ១៩
ក្រុមហ៊ុនអាកាសចរណ៍ នៅក្នុងពិភពលោក បានទទួលជំនួយពីរដ្ឋ សរុប ១២៣ពាន់លានដុល្លារ ដែលក្នុងនោះ ៦៧ពាន់លានដុល្លារ ជាប្រាក់កម្ចី ដែលគេត្រូវសងទៅវិញ នៅថ្ងៃអនាគត។ គេអាចនិយាយបានថា ជំនួយអន្តរាគមន៍របស់រដ្ឋាភិបាល បានជួយសង្រ្គោះ ក្រុមហ៊ុនអាកាសចរណ៍ឲ្យជៀសផុតពីការក្ស័យធន និងរួចរស់បានមួយគ្រាទៀត ប៉ុន្តែ ជាមួយ គ្នានោះ វាក៏ទៅជួយបំប៉ោង ថង់បំណុលរបស់ក្រុមហ៊ុនអាកាសចរណ៍ ឲ្យកើនឡើងជិត ៥៥០ពាន់លានដុល្លារផងដែរ។
សព្វថ្ងៃនេះ ដោយមកពី វិបត្តិកូវីដ បានធូរស្រាលនៅតាមតំបន់មួយចំនួន ក្រុមហ៊ុនអាកាសចរណ៍នឹងអាចចាប់ដំណើរការហោះហើរឡើងវិញ បណ្តើរៗ។ ប៉ុន្តែ យ៉ាងណាក៏ដោយ ក្រុមហ៊ុនអាកាសចរណ៍នឹងមិនអាចមានអ្នកដំណើរច្រើនដូចមុន ដែរ ដោយសារ វិធានការ រក្សាគម្លាតសង្គម ហើយនិងការបិទព្រំដែន នៅតាមបណ្តាប្រទេសមួយចំនួន ដែលបារម្ភពីករណីឆ្លងកូវីដ ចូលទឹកដីរបស់ខ្លួន។ គេវាយតម្លៃថា ដើម្បី អាចងើបដើរបានស្រួលបួល ពោលគឺ អាចរកប្រាក់ចំណូលបាន ដូចមុនពេលកើតមានវិបត្តិកូវីដ ក្រុមហ៊ុនអាកាសចរណ៍ ត្រូវការពេលយ៉ាងតិច ១០ឆ្នាំ។ ១០ឆ្នាំ គឺជារយៈពេល ដែលក្រុមហ៊ុនអាកាសចរណ៍ ផ្សេងទៀត អាចនឹងត្រូវបិទទ្វារជាស្ថាពរ ដោយសារតែមិនអាចទ្រាំទ្រ នឹងការខាតបង់មហាសាល ដោយសារវិបត្តិកូវីដ។ នៅពេលក្រុមហ៊ុនអាកាសចរណ៍ដួលរលំ គឺមនុស្សរាប់លាននាក់ ដែលនឹងត្រូវរងគ្រោះ បាត់បង់គ្មានការងារធ្វើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ