កូវីដ១៩ ៖ អង្គការអាកាសចរណ៍ស៊ីវិលអន្តរជាតិចេញអនុសាសន៍ស្តីពីការធ្វើដំណើរតាមយន្តហោះ
ក្នុងពេលដែលប្រទេសកាន់តែច្រើនឡើងៗ ចាប់លើកបម្រាមបិទខ្ទប់ប្រទេស អង្គការអាកាសចរណ៍ស៊ីវិលអន្តរជាតិ ហៅកាត់ថា OACIបានចេញផ្សាយអនុសាសន៍សុវត្ថិភាពសុខភាពមួយខ្សែវែង ឱ្យក្រុមហ៊ុនដឹកជញ្ជូនអ្នកដំណើរតាមយន្តហោះទាំងអស់នៅទូទាំងពិភភពលោកអនុវត្ត ដើម្បីផ្តល់សន្ទុះដល់វិស័យអាកាសចរណ៍ ឱ្យចាប់ដំណើរការឡើងវិញ បន្តិចម្តងៗផង និងជានិរន្តរ៍ផង។ វិស័យចរាចរណ៍ផ្លូវអាកាស រងផលប៉ះពាល់យ៉ាងដំណំបំផុត ពីវិបត្តិកូរ៉ូណាវីរុសថ្មី។
ចុះផ្សាយនៅថ្ងៃ៖
ស្តាប់ - ០២:០៧
អនុសាសន៍នេះជាលទ្ធផលនៃការព្រមព្រៀងគ្នារវាងអង្គការអាកាសចរណ៍ស៊ីវិលអន្តរជាតិដែលជាភ្នាក់ងារមួយរបស់អង្គការសហប្រជាជាតិ អង្គការសុខភាពពិភពលោក សមាគម និងក្រុមហ៊ុនអាកាសចរណ៍ជាង២៩០ក្រុមហ៊ុន។
នេះជាលើកទីមួយដែលពិភពលោកបានសម្រេចព្រមព្រៀងគ្នាចេញនិងមានអនុសាសន៍ជាលក្ខណៈសកល អនុវត្តបានសម្រាប់កំរិតពិភពលោក ក៏ដូចជាកំរិតតំបន់។ ជាអនុសាសន៍គ្រឹះ ដែលមានកម្មវុត្ថុការពារអ្នកដំណើរក៏ដូចជាបុគ្គលិកធ្វើការក្នុងយន្តហោះ។
បើតាមអង្គការអាកាសចរណ៍ស៊ីវិលអន្តរជាតិ អ្នកដំណើរត្រូវធ្វើសេចក្តីប្រកាសសុខភាព និងវាស់កម្តៅសីតុណ្ហភាពនៅពេលមកដល់ព្រលានយន្តហោះ ហើយគួរតែជ្រើសរើសការចុះឈ្មោះធ្វើដំណើរជាមុន តាមអនឡាញ។ អ្នកជូនមិនអាចចូលក្នុងព្រលានយន្តហោះបានទេ លើកលែងតែសម្រាប់អ្នកដំណើរពិការ។ ត្រូវយកអីវ៉ាន់តាមខ្លួន ឱ្យតិចតួចបំផុត។
អ្នកដំណើរទាំងអស់ ត្រូវពាក់ម៉ាស់ជាដាច់ខាត ឬរុំមុខ តាំងពីនៅក្នុងព្រលានយន្តហោះ ដោយត្រូវរក្សាគម្លាតសុវត្ថិភាពឱ្យឆ្ងាយពីអ្នកដទៃយ៉ាងតិចមួយម៉ែត្រ។ ពេលចូលដល់ក្នុងយន្តហោះ និងក្នុងអំឡុងពេលហោះហើរ អ្នកដំណើរត្រូវបន្តពាក់ម៉ាស់រហូត ហើយត្រូវងើបចេញពីកន្លែងរបស់ខ្លួន យ៉ាងតិចបំផុតតាមដែលអាចធ្វើទៅបាន ដើម្បីកុំឱ្យមានការតម្រង់ជួរទៅបង្គន់ និងចម្លងពីឬទៅអ្នកដំណើរផ្សេងទៀត (អ្នកដំណើរនៅជិតបង្គន់ណា អាចប្រើតែបង្គន់នោះ)។
ប៉ុន្តែអនុសាសន៍មិនបានតម្រូវឱ្យក្រុមហ៊ុនអាកាសចរណ៍ទុកចន្លោះកៅអីទំនេរទេ ព្រោះបើធ្វើដូច្នេះក្រុមហ៊ុនពិតជាមិនអាចរត់រួចឡើយ។ អ្នកដំណើរនឹងត្រូវដាក់នៅឃ្លាតពីគ្នា ទៅតាមស្ថានភាពជាក់ស្តែងរបស់យន្តហោះថាមានអ្នកដំណើរពេញឬអត់។
អ្នកបំរើតាមយន្តហោះ ក៏ត្រូវពាក់ម៉ាស់ និងរបាំងមុខ ព្រមទាំងពាក់ស្រោមដៃទៀត។ យន្តហោះនឹងត្រូវសម្អាតដោយថ្នាំសម្លាប់មេរោគ ជាញឹកញយ ក្នុងពេលហោះហើរ។ អាហារនឹងខ្ទប់ជាកញ្ចប់ៗរួចជាស្រេច។
វិធានការការពារសុវត្ថិភាពក្នុងពេលធ្វើដំណើរ មានលក្ខណៈតឹងតែងខ្លាំងមិនធ្លាប់ទេ ខ្លាំងជាងវិធានការក្រោយមហាភេរវកម្មនៅសហរដ្ឋអាមេរិកថ្ងៃ១១កញ្ញា២០០១ទៀត។ បើតាមអង្គការអាកាសចរណ៍ស៊ីវិលអន្តរជាតិ កូវីដ១៩នឹងធ្វើឱ្យចំនួនអ្នកដំណើរថយចុះអស់១ពាន់លាននាក់ ពីពេលនេះដល់ដំណាច់ឆ្នាំ និងធ្វើឱ្យក្រុមហ៊ុនអាកាសចរណ៍ខាតបង់ជាទឹកប្រាក់ចំនួនជាង៣១៤ពាន់លានដុល្លារ នៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ