វិបត្តិកូវីដអាចធ្វើឲ្យប្រទេស អឺរ៉ុប ពង្រឹងសាមគ្គីភាពរវាងគ្នា?
ចុះផ្សាយនៅថ្ងៃ៖
មេដឹកនាំអឺរ៉ុប បានបើកកិច្ចប្រជុំកំពូល នៅថ្ងៃសុក្រនេះ ដើម្បី ពិភាក្សាពីផែនការស្តារសេដ្ឋកិច្ចក្នុងក្របខ័ណ្ឌ សហភាពអឺរ៉ុប។ តាមរយៈកិច្ចប្រជុំតាមវីដេអូ ថ្នាក់ដឹកនាំរបស់ប្រទេសសមាជិកអឺរ៉ុប ត្រូវពិភាក្សា ចរចាគ្នាពីផែនការជំរុញ សេដ្ឋកិច្ច តម្លៃ ៧៥០ពាន់លានអឺរ៉ូ ដែលគណៈកម្មការអឺរ៉ុបបានស្នើឡើង ដើម្បីស្រោចស្រង់សេដ្ឋកិច្ចអឺរ៉ុបដែលរងប៉ះពាល់ដោយ វិបត្តិកូវីដ១៩។ ៧៥០ពាន់លានអឺរ៉ូ នេះ ជាប្រាក់បំណុលរួម ដែលសហភាពអឺរ៉ុប ចង់ទៅខ្ចីពីទីផ្សារហិរញ្ញវត្ថុសម្រាប់ផែនការជំរុញសេដ្ឋកិច្ច។
មេដឹកនាំរបស់ប្រទេសសមាជិកអឺរ៉ុបទាំង ២៧ បានបើកជំនួបកំពូល នៅថ្ងៃសុក្រនេះ ដើម្បី ផ្តោតសំខាន់លើផែនការជំរុញសេដ្ឋកិច្ចអឺរ៉ុប នៅក្រោយវិបត្តិកូវីដ ដែលគណៈកម្មការអឺរ៉ុបបានស្នើឡើង ដោយយកលំនាំតាម សំណើរបស់ប្រធានាធិបតី បារាំង និងអាល្លឺម៉ង់ កាលពីពាក់កណ្តាលខែ ឧសភាកន្លងទៅ។ នៅចុងខែឧសភាគណៈកម្មការអឺរ៉ុបបានស្នើកញ្ចប់ថវិកា ៧៥០ពាន់លានអឺរ៉ូ ដើម្បី ស្តារសេដ្ឋកិច្ចរបស់ប្រទេសសមាជិកអឺរ៉ុប ដែលរងគ្រោះដោយវិបត្តិកូវីដ។
ដើម្បីបានថវិកាយកទៅជួយស្តារសេដ្ឋកិច្ចរបស់ប្រទេសសមាជិកអឺរ៉ុប គណៈកម្មការអឺរ៉ុបបានស្នើឲ្យមានកញ្ចប់បំណុលរួមរបស់អឺរ៉ុប។ មានន័យថា គណៈកម្មការអឺរ៉ុបនឹងចេញមុខ ជំនួស ប្រទេសសមាជិកដើម្បី ខ្ចីប្រាក់ ៧៥០ពាន់លានអឺរ៉ូពីទីផ្សារ ហិរញ្ញវត្ថុអន្តរជាតិ។ អឺរ៉ុបធ្វើដូច្នេះ គឺដើម្បីចេញមុខធានា អាចខ្ចីប្រាក់បំណុលបានច្រើន និងក្នុងតម្លៃ ការប្រាក់ថោក។ ដោយពិតទៅ ប្រទេសសមាជិកអឺរ៉ុប ដូចជាអ៊ីតាលី ឬអេស្ប៉ាញ អាចទៅខ្ចីបំណុលបានដែរ ប៉ុន្តែ ត្រូវបង់ការប្រាក់ខ្ពស់ ព្រោះថាអ្នកវិនិយោគមិនសូវទុកចិត្ត លើសេដ្ឋកិច្ចរបស់អ៊ីតាលី ដែលកំពុងរងគ្រោះដោយសារវិបត្តិកូវីដលើកនេះទេ។
ដើម្បីសងបំណុល៧៥០ពាន់លានអឺរ៉ូ សហភាពអឺរ៉ុបនឹងប្រើកញ្ចប់ថវិកាអឺរ៉ុប ដែលប្រទេសសមាជិក ត្រូវបង់វិភាគទាន ប្រចាំឆ្នាំ ទៅតាមធនធាន និងកម្រិតផលិតផលក្នុងស្រុកសរុបរបស់ប្រទេសសមាជិកនីមួយៗ។ ជាក់ស្តែង អាល្លឺម៉ង់ដែលមានសេដ្ឋកិច្ចខ្លាំងជាងគេ នៅអឺរ៉ុបនឹងត្រូវបង់ប្រមាណ ១៣៥ពាន់លានអឺរ៉ូ សម្រាប់កេសថវិកាអឺរ៉ុប នៅពេលអ៊ីតាលីឯណោះវិញ បង់វិភាគទានតិចជាង ៤០ពាន់លានអឺរ៉ូ ទៅឲ្យកេសថវិកាអឺរ៉ុប។
ជាមួយនឹងទឹកប្រាក់បំណុលរួម ៧៥០ពាន់លានអឺរ៉ូ ដែលសហភាពអឺរ៉ុបចេញមុខទៅខ្ចីជំនួសឲ្យសមាជិកអឺរ៉ុប ៥០០ពាន់លានអឺរ៉ូ នឹងត្រូវបែងចែក ទៅឲ្យប្រទសសមាជិក ក្នុងទម្រង់ជាប្រាក់ឧបត្ថម្ភ ប្រាក់ជំនួយ សម្រាប់ជួយរដ្ឋសមាជិក វិស័យសំខាន់ដែលរងគ្រោះដោយសារកូវីដ ដូចជា វិស័យទេសចរណ៍ ឧស្សាហកម្មផលិតរថយន្ត ឬសម្រាប់យកទៅប្រើស្តារវិស័យសុខាភិបាលជាដើម។ ចំណែក ២៥០ពាន់លានអឺរ៉ូដែលនៅសល់ គឺ គេនឹងបែងចែក ទៅឲ្យប្រទេសសមាជិក ក្នុងទម្រង់ជាប្រាក់កម្ចី។
ជារួមអ៊ីតាលី រងគ្រោះខ្លាំងជាងគេដោយសារកូវីដនឹងទទួលបានប្រាក់ឧបត្ថម្ភច្រើនជាងគេ ប្រមាណ ៨២ពាន់លានអឺរ៉ូពីកញ្ចប់បំណុលរួមរបស់អឺរ៉ុប បន្ទាប់មកពីអេស្ប៉ាញ ដែលនឹងទទួលបាន៧៧ពាន់លានអឺរ៉ូ ។ អាល្លឺម៉ង់ឯណោះវិញ ដែលត្រូវបង់វិភាគច្រើនជាងគេសម្រាប់សងបំណុលរួម នឹងបានទទួលប្រាក់ឧបត្ថម្ភពីកញ្ចប់បំណុល តែ ២៩ពាន់លានអឺរ៉ូតែប៉ុណ្ណោះ។ មានន័យថា បានទទួលជំនួយតិចជាងគេ ប៉ុន្តែ ត្រូវបង់សងបំណុលច្រើនជាងគេ។ នេះហើយជាស្មារតីសំដែងសាមគ្គីភាព របស់ប្រទេសអឺរ៉ុប ដើម្បីរក្សាស្ថិរភាពតំបន់ចាយប្រាក់អឺរ៉ូ។
ហេតុអ្វីបានជាអឺរ៉ុបពិបាកនឹងបង្កើតបានកិច្ចព្រមព្រៀង?
គេមិនសង្ឃឹមរកបានកិច្ចព្រមព្រៀង នៅក្រោយជំនួបកំពូលនៅថ្ងៃនេះ ប៉ុន្តែ លោកស្រី នាយករដ្ឋមន្រ្តីអាល្លឺម៉ង់ ដែលជាអ្នកចេញមុខ គាំទ្រផែនការជំរុញសេដ្ឋកិច្ចអឺរ៉ុប ដោយសារវិបត្តិកូវីដ បានបញ្ជាក់កាលពីថ្ងៃព្រហស្បតិ៍ ទី ១៨មិថុនាថា លោកស្រី ចង់ឲ្យមានកិច្ចព្រមព្រៀង លើកញ្ចប់បំណុលរួម របស់អឺរ៉ុប ឲ្យបានមុនដាច់ខែកក្កដា ដើម្បីឲ្យផែនការជំរុញសេដ្ឋកិច្ច នៅក្រោយកូវីដ នឹងអាចចាប់អនុវត្តពីឆ្នាំ ២០២១តទៅ។
មេដឹកនាំអឺរ៉ុប មិនងាយនឹងអាចបង្កើតបានកិច្ចព្រមព្រៀង ដោយសារតែមានជំហរប្រឆាំង របស់ក្រុមប្រទេសអឺរ៉ុបខាងជើង ចំនួន ៤ ដែលគេឲ្យឈ្មោះថា ប្រទេសដែលកំណាញ់ស្វិត ត្បិតត្បៀតក្នុងការចាយវាយ។ ប្រទេសអឺរ៉ុបខាងជើង ទាំង៤ ដែល មានហូឡង់ ដាណឺម៉ាក ស៊ុយអែត និងអូទ្រីស ធ្លាប់បានប្រឆាំងម្តងហើយ មិនឲ្យមានគម្រោងខ្ចីប្រាក់បំណុលរួមអឺរ៉ុបនោះទេ ព្រោះតែពួកគេមិនចង់ចូលរួម សងប្រាក់បំណុលរួម ជាមួយប្រទេសអឺរ៉ុបខាងត្បូង ដែលពួកគេចោទប្រកាន់ថា ចាយខ្ជះខ្ជាយ មិនចេះគ្រប់គ្រងមុខចំណាយរបស់ខ្លួន។
ប៉ុន្តែ នៅក្រោយការផ្លាស់ប្តូរជំហររបស់នាយករដ្ឋមន្រ្តីអាល្លឺម៉ង់ ដែលចូលរួមជាមួយ បារាំង ដើម្បីជំរុញឲ្យមានការខ្ចីប្រាក់បំណុលអឺរ៉ុបរួម ប្រទេសអឺរ៉ុបខាងជើង ក៏បានបន្ទន់ជំហរ មកវិញ ដោយយល់ព្រម ឲ្យអឺរ៉ុបខ្ចីបំណុលរួម ប៉ុន្តែ ត្រូវមានលក្ខខណ្ឌ។ សម្រាប់ប្រទេសអឺរ៉ុបខាងជើង ប្រាក់បំណុលរួមរបស់អឺរ៉ុបមិនត្រូវយកទៅប្រើដើម្បី ចែកចាយ ឧបត្ថម្ភសម្រាប់ប្រទេសសមាជិកនោះទេ ប៉ុន្តែ គេគួរប្រើវាក្នុងទម្រង់ជាប្រាក់កម្ចី មានន័យថា ប្រទេសសមាជិកត្រូវបង់សងទៅតាមចំនួនប្រាក់ដែលខ្លួនខ្ចីពីសហភាពអឺរ៉ុប។ មួយវិញទៀត ប្រទេស អឺរ៉ុបខាងជើង ចង់ឲ្យប្រទេសអឺរ៉ុបខាងត្បូងដូចជាអេស្ប៉ាញ និងអ៊ីតាលី ក្រិក បង្ហាញផែនការរឹតត្បិតថវិកា មិនមែនចេះតែយកប្រាក់អឺរ៉ុប ទៅចាយផ្តេសផ្តាសនោះទេ។
កិច្ចប្រជុំនៅថ្ងៃសុក្រ ជាឱកាសឲ្យប្រទេសអឺរ៉ុប អាចដោះស្រាយ ការខ្វែងគំនិតគ្នា រវាងប្រទេសអឺរ៉ុបទាំង២ប្លុក។ ដើម្បីបញ្ចុះបញ្ចូល ឲ្យមានការយល់ព្រមព្រៀងពីប្រទេសដែលមិនចង់ឲ្យមានបំណុលរួម គណៈកម្មការអឺរ៉ុបបានដាក់លក្ខខណ្ឌថា ប្រទេសសមាជិកត្រូវប្រើជំនួយ របស់អឺរ៉ុប ដើម្បីវិនិយោគ និងត្រូវធ្វើកំណែទម្រង់ឡើងវិញ ប៉ុន្តែគេមិនចាំបាច់ត្រូវរឹតត្បិតថវិកាដូចកាលក្នុងវិបត្តិប្រាក់បំណុលអឺរ៉ុប កាលពី១០ឆ្នាំមុននោះទេ។
អឺរ៉ុបរួមគ្នា នៅចំពោះមុខ នយោបាយមិនច្បាស់លាស់ របស់អាមេរិក និងការពង្រីកឥទ្ធិពលរបស់ចិន
វិបត្តិកូវីដ លើកនេះ បានបើកភ្នែកប្រទេសនៅអឺរ៉ុបឲ្យឃើញច្បាស់ថា វិស័យសុខាភិបាល សេដ្ឋកិច្ចរបស់អឺរ៉ុប ផុយស្រួយ នឹងអាចដួលរលំ គ្រប់ពេល បើសិនអឺរ៉ុបមិនរួមសហការ ចាប់ដៃសាមគ្គីគ្នាទេ។ កម្លាំងសាមគ្គី ដើម្បីរក្សាអឺរ៉ុប ឲ្យនៅគង់វង្ស ចេញពីអាល្លឺម៉ង់ ដែលជាចលករសេដ្ឋកិច្ចសំខាន់របស់អឺរ៉ុប។
ប្រមុខរដ្ឋាភិបាលអាល្លឺម៉ង់ដែលអរិភាព មិនចង់ឲ្យមានប្រាក់បំណុលរួម បានផ្លាស់ប្តូរជំហរមកវិញ ដោយមើលទៅលើបរិបទ ពិភពលោកសព្វថ្ងៃ។ ទី១ គឺវិបត្តិកូវីដ ដែលរញ្ជួយសេដ្ឋកិច្ចរបស់គ្រប់ប្រទេស ដោយមិនលើកលែង ប្រទេសណាមួយទេ។ សេដ្ឋកិច្ចអាល្លឺម៉ង់ មិនរឹងមាំស្ថិតស្ថេរបានទេ បើសិន សេដ្ឋកិច្ចរបស់ប្រទេសផ្សេងទៀត ចុះខ្សោយ និងជាពិសេស ប្រទេសអឺរ៉ុបតែមួយ ដែលចាយប្រាក់អឺរ៉ូជាមួយអាល្លឺម៉ង់។ នេះជាប្រសាសន៍របស់លោកស្រីនាយករដ្ឋមន្រ្តីអាល្លឺម៉ង់។
អាល្លឺម៉ង់ បានចេញមុខប្រមូល សាមគ្គីភាពគ្នារវាងប្រទេសអឺរ៉ុប នៅចំពោះមុខនយោបាយពង្រីកឥទ្ធិពលរបស់ចិន ដែលចាំតែលេបត្របាក់ក្រុមហ៊ុនអឺរ៉ុប ដូចកាលសម័យវិបត្តិប្រាក់បំណុល ក្រិក កាលពី១០ឆ្នាំមុន។ មួយវិញទៀត នៅពេលអាមេរិក សម្ព័ន្ធមិត្តរបស់អឺរ៉ុប មានប្រធានាធិបតីលោកដូណាល់ត្រាំ ដែលចង់តែដកដៃ និងរករឿង អឺរ៉ុបសម្រាប់ប្រយោជន៍សេដ្ឋកិច្ចផ្ទាល់ខ្លួន យ៉ាងដូច្នេះ អាល្លឺម៉ង់ ត្រូវតែប្រមូលប្រទេសអឺរ៉ុប ឲ្យបង្រួបបង្រួម គ្នា ឲ្យខ្លាំងជាងណាៗទាំងអស់ ដើម្បីទប់ទល់នឹងរលកបោកបក់របស់ព្យុះដូណាល់ ត្រាំ និងមហិច្ឆតាពង្រីកឥទ្ធិពលរបស់មហាអំណាចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ