ប៉ូឡូញ បោះឆ្នោតជ្រើសរើសប្រធានាធិបតីថ្មីរវាងអ្នកអភិរក្សនិងអ្នកសេរីនិយម
ចុះផ្សាយនៅថ្ងៃ៖
ស្តាប់ - ០៧:១៧
ការបោះឆ្នោតជ្រើសរើសប្រធានាធិបតីប៉ូឡូញដ៏ស្វិតស្វាញជុំទី២ បានចាប់ផ្តើមប្រព្រឹត្តធ្វើឡើងនៅថ្ងៃអាទិត្យ ទី១២ កក្កដានេះ។ ពលរដ្ឋប៉ូឡូញ ត្រូវជ្រើសរើសមេដឹកនាំប្រទេសថ្មី រវាងអ្នកស្តាំអភិរក្សនិយម គឺលោកប្រធានាធិបតីចាំផ្ទះ អង់ដ្រេច ឌូដា និងលោក រ៉ាហ្វាល ត្សាស្កូវស្គី ដែលជាអ្នកសេរីនិយមមានទំនោរទៅរកសហភាពអឺរ៉ុប។ ក្នុងបរិបទនៃជំងឺកូវីដ តើការបោះឆ្នោតប្រធានាធិបតីប៉ូឡូញប្រព្រឹត្តទៅយ៉ាងដូចម្តេច? តើអ្នកណាអាចនឹងឈ្នះការប្រកួតប្រជែងដណ្តើមយកតំណែងប្រធានាធិបតីប៉ូឡូញនាអាណត្តិនេះ?
ការបោះឆ្នោតជ្រើសរើសប្រធានាធិបតីប៉ូឡូញរៀបចំឡើងក្នុងបរិបទកូវីដ
តាមពិតទៅ ប្រទេសប៉ូឡូញមិនបានរងគ្រោះពីជំងឺកូវីដធ្ងន់ធ្ងរខ្លាំងដូចប្រទេសជាច្រើននៅអឺរ៉ុបខាងលិចនោះទេ ក៏ប៉ុន្តែការបោះឆ្នោតជ្រើសរើសប្រធានាធិបតីប៉ូឡូញនាអាណត្តិត្រូវបានរៀបចំឡើងក្រោមលក្ខខណ្ឌអនាម័យតឹងរ៉ឹង។ ប៉ូឡូញ មានករណីឆ្លងកូវីដជាង ៣ម៉ឺន ៧ពាន់នាក់ ក្នុងចំណោមប្រជាជនសរុបទាំងអស់ប្រមាណ ៣៨ លាននាក់ និងមានស្លាប់ជិត ១ពាន់ ៦រយនាក់។
នៅក្នុងប្រទេសប៉ូឡូញ គេឃើញមណ្ឌលបោះឆ្នោតចាប់ផ្តើមបើកនៅវេលាម៉ោង ៧ ព្រឹក ហើយគ្រោងនឹងបិទវិញនៅម៉ោង ៩ យប់នេះ ម៉ោងនៅក្នុងស្រុក។ ចំណែកលទ្ធផលឆ្នោតបឋមជាផ្លូវការត្រូវគេរំពឹងថានឹងចេញផ្សាយនៅព្រឹកថ្ងៃចន្ទស្អែកនេះ។
ដោយសារតែការរីករាលដាលនៃជំងឺកូវីដនៅបន្តកើតឡើងក្នុងប្រទេសនៅឡើយ អ្នកបោះឆ្នោតប៉ូឡូញ ត្រូវពាក់ម៉ាស់ ពាក់ស្រោមដៃ និងត្រូវរក្សាគំលាតសុវត្ថិភាពពីគ្នា ហើយនិងត្រូវប្រើទឹកអនាម័យសម្រាប់លាងដៃពេលទៅបោះឆ្នោត។ ពលរដ្ឋប៉ូឡូញ ត្រូវគេអនុញ្ញាតឲ្យប្រើប្រាស់ប៊ិចរបស់ខ្លួនឯងផ្ទាល់ដើម្បីគូសសន្លឹកឆ្នោត។
មួយវិញទៀត ពលរដ្ឋប៉ូឡូញក៏មានជម្រើសអាចបោះឆ្នោតបានដែរបានអ៊ីមែល។ មានមនុស្សរាប់ពាន់នាក់រស់នៅតំបន់ភាគនិរតីនៃប្រទេសដែលមានចំនួនអ្នកឆ្លងកូវីដខ្ពស់ ត្រូវបានគេតម្រូវឲ្យបោះឆ្នោតតាមអ៊ីមែល។
ចំណែកឯនៅតាមមណ្ឌលនានាវិញ មន្ត្រីរៀបចំការបោះឆ្នោតត្រូវពាក់ម៉ាស់ជាដាច់ខាត និងអង្គុយឲ្យឆ្ងាយពីគ្នា។ ប្រអប់សន្លឹកឆ្នោត ត្រូវគេសម្អាតជាប្រចាំ ហើយការិយាល័យបោះឆ្នោតវិញ ត្រូវគេដាក់ឲ្យមានខ្យល់ចេញចូលគ្រប់គ្រាន់ផងដែរដើម្បីការពារការចម្លងមេរោគកូរ៉ូណាថ្មី។
ការប្រកួតប្រជែងដណ្តើមតំណែងប្រធានាធិបតីដ៏ស្វិតស្វាញ
ការប្រកួតប្រជែងលើកនេះ គឺជាការប្រកួតប្រជែងដ៏តឹងតែងខ្លាំងបំផុតមួយ រវាងលោក អង់ដ្រេច ឌូដា (Andrzej Duda) បេក្ខជនប្រធានាធិបតីនៃបក្សកាន់អំណាចបច្ចុប្បន្ន ដែលជាអ្នកប្រជានិយម ជាមួយអភិបាលក្រុងវ៉ាសូវី លោករ៉ាហ្វាល ត្សាស្កូវស្គី(Rafal Trzaskowski) មកពីបក្សសេរីនិយមដែលមានទំនោរខិតទៅរកសហភាពអឺរ៉ុប។
ក្រុមអ្នកជំនាញ បានព្យាករថាបេក្ខភាពប្រធានាធិបតីទាំងពីរ មានសំឡេងគាំទ្រប្រដមប្រសងគ្នា ហើយបើអ្នកណាឈ្នះ ក៏ឈ្នះឆ្នោតក្នុងសំឡេងមិនច្រើនជាងគ្នាខ្លាំងឡើយ។ ដូច្នោះហើយ នាពេលនេះ គ្រប់គ្នាកំពុងអន្ទះសាចង់ដឹងលទ្ធផលឆ្នោតខ្លាំងណាស់ ថាតើលោក អង់ដ្រេច ឌូដា ដែលជាអ្នកស្តាំនិយមជ្រុល ឬក៏អ្នកសេរីនិយម លោក រ៉ាហ្វាល ត្សាស្កូវស្គី ជាអ្នកអាចងើបតោងចាប់តំណែងប្រធានាធិបតីនេះបាន។
គួររំឭកជូនថា កាលពីការបោះឆ្នោតជុំទី១ នៅថ្ងៃទី២៨ មិថុនាកន្លងទៅ លោកប្រធានាធិបតីចាំផ្ទះ ឌូដាទទួលបានសំឡេងគាំទ្រចំនួន ៤៣,៥% ចំណែកលោកត្សាស្កូវស្គី ទទួលបានការគាំទ្រលំដាប់ទី២ ដោយមានចំនួន ៣០,៤%។
យ៉ាងណាក៏ដោយ សម្រាប់ជុំទី២នេះ លោកត្សាស្កូវស្គី សង្ឃឹមថានឹងអាចដណ្តើមយកជ័យជម្នះលើលោកឌូដា តាមរយៈការទទួលបានសំឡេងគាំទ្រពីប្រជាពលរដ្ឋប៉ូឡូញដែលបានបោះឆ្នោតគាំទ្របេក្ខភាពបក្សប្រឆាំងដទៃទៀតកាលពីជុំទី១។
ប្រសិនណាបើ លោករ៉ាហ្វាល ត្សាស្កូវស្គី មេបក្សប្រឆាំងធំជាងគេគឺបក្សវេទិកាពលរដ្ឋ (PO) ជាប់ឆ្នោតក្លាយជាប្រធានាធិបតីប៉ូឡូញពិតមែននោះ មានន័យថាសករាជដឹកនាំរបស់បក្សស្តាំនិយម (PiS) ដែលកំពុងកាន់អំណាចរបស់លោកឌូដា នឹងត្រូវបិទបញ្ចប់ត្រឹមនេះ។
មួយវិញទៀត ក្នុងករណីដែលបក្សប្រឆាំងអាចយកឈ្នះពិតមែន នេះអាចរាប់ចាត់ទុកថាជាព្រឹត្តិការណ៍ប្រវត្តិសាស្ត្រមួយក្នុងប្រទេសប៉ូឡូញ ពីព្រោះថាក្នុងរយៈពេល ៣ទសវត្សរ៍កន្លងមកនេះ ពោលចាប់តាំងពីការដួលរលំនៃរបបកុម្មុយនិស្តមក បក្សប្រឆាំង ដែលមាននិន្នាការសេរីនិយម មិនដែលប្រកួតឈ្នះបក្សស្តាំនិយមនិងទទួលបានសំឡេងគាំទ្រច្រើននោះទេ។
តើអ្វីជាយុទ្ធសាស្ត្ររបស់បក្សប្រឆាំងក្នុងការទាក់ទាញសំឡេងឆ្នោត?
តាមពិតទៅ ការបោះឆ្នោតប្រធានាធិបតីប៉ូឡូញ ត្រូវបានគ្រោងធ្វើឡើងនៅក្នុងខែឧសភា ដែលកាលណោះ តាមការស្ទង់មតិ លោកប្រធានាធិបតី អង់ដ្រេច ឌូដា មានសំឡេងគាំទ្រច្រើន និងអាចឈានដល់ការកាន់តំណែងប្រធានាធិបតីរយៈពេល៥ ឆ្នាំ មួយអាណត្តិទៀត។ ប៉ុន្តែ ការបោះឆ្នោតត្រូវបានពន្យារពេលដោយសារតែការឆ្លងរាលដាលនៃជំងឺកូវីដ។
ចាប់តាំងពីពេលនោះមក ការគាំទ្រចំពោះលោក ឌូដា បានធ្លាក់ចុះគួរឲ្យកត់សម្គាល់ពីព្រោះតែការបន្តឆ្លងរាលដាលនៃមេរោគកូរ៉ូណាថ្មី ដែលបាននិងកំពុងជំរុញឲ្យប៉ូឡូញធ្លាក់ចូលក្នុងវិបត្តិសេដ្ឋកិច្ច ចាប់តាំងពី ៣ ទសវត្សរ៍កន្លងមកនេះ។
លោកប្រធានាធិបតី ឌូដា និងលោកអភិបាលក្រុងវ៉ាសូវី ត្សាស្កូវស្គី មានទស្សនៈវិស័យនយោបាយខុសគ្នាដាច់ស្រឡះ។ ក្នុងពេលធ្វើយុទ្ធនាការបោះឆ្នោត លោកឌូដា ដែលជាអ្នកស្តាំនិយម-ជាតិនិយមជ្រុល បានសន្យាការពារសុខមាលភាពសង្គម។ លោកមិនគាំទ្រសិទ្ធិរបស់ក្រុមអ្នកស្រលាញ់ភេទដូចគ្នាឡើយ និងនៅបន្តទាមទារសំណងខូចខាតដោយសង្គ្រាមពីអាល្លឺម៉ង់។
ចំណែកលោក ត្សាស្កូវស្គីវិញ លោកបានសន្យាផ្តល់ឲ្យប៉ូឡូញ ខុសពីលោកឌូដា។ នៅគ្រាកន្លងមក មេបក្សប្រឆាំងរូបនេះ បាននិយាយថា លោកនឹងធ្វើកំណែទម្រង់ប្រព័ន្ធតុលាការ ដែលមានភាពចម្រូងចម្រាសដើម្បីលើកកម្ពស់ទំនាក់ទំនងរវាងប្រទេសប៉ូឡូញ ជាមួយនឹងសហភាពអឺរ៉ុប។
បន្ថែមលើនេះ អ្នកនយោបាយសេរីនិយមរូបនេះ ក៏បានសម្តែងការគាំទ្រផងដែរ ចំពោះការអនុញ្ញាតឲ្យអ្នកស្រលាញ់ភេទដូចគ្នារៀបការបាននៅប៉ូឡូញ និងអាចមានសិទ្ធិសុំកូនចិញ្ចឹមបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ