នូវែលសេឡង់ កាត់ទោសខ្មាន់កាំភ្លើងបាញ់រះលើវិហារអ៊ីស្លាម២កន្លែង ឱ្យជាប់ពន្ធនាគារអស់មួយជីវិត
នៅនូវែលសេឡង់ ឃាតករម្នាក់ដែលបានបាញ់រះ សម្លាប់មនុស្ស៥១នាក់ នៅវិហារអ៊ីស្លាម ក្រុង Christchurch កាលពីថ្ងៃទី១៥មីនា ឆ្នាំ២០១៩ ត្រូវតុលាការនូវែលសេឡង់ កាត់ទោសឲ្យជាប់ពន្ធនាគារអស់មួយជីវិត។ ការកាត់ទោសដាក់គុកមួយជីវិតនេះ គឺជនជាប់ឃុំ គ្មានលទ្ធភាពសូម្បីតែប្តឹងទាស់។ នេះជាការសវនាការផ្នែកព្រហ្មទណ្ឌដ៏ធំជាងគេ ក្នុងប្រវត្តិសាស្ត្រ នូវែលសេឡង់។ នូវែលសេឡង់ ជាប្រទេសមួយ ដែលគេល្បីថា ស្ងប់ស្ងាត់ មិនសូវមានករណីហិង្សា។
ចុះផ្សាយនៅថ្ងៃ៖
ស្តាប់ - ០១:៥០
ជាសេចក្តីសម្រេចស្ថាពរ បិទផ្លូវតវ៉ា ហើយតុលាការក៏មិនផ្តល់សិទ្ធិប្តឹងឧទ្ធរណ៍សោះឡើយ។ ពីអំណើះតទៅ ជនជាប់ចោទ Breton Tarrant គ្មានច្រកលទ្ធភាពដ៏តិតតួចណាមួយ អាចឱ្យគេមានផ្លូវរស់នៅក្រៅឃុំមានសេរីភាពនោះឡើយ។ នេះបើតាមរដ្ឋអាជ្ញាក្រុង Christchurch ដោយលើកឡើងទៀតថា ទណ្ឌិតជនជាតិអូស្ត្រាលីរូបនេះ ត្រូវសាលាជម្រះក្តីជាន់ខ្ពស់ កាត់ទោសយ៉ាងធ្ងន់បំផុត និងមិនធ្លាប់មានទេ ក្នុងប្រវត្តិសាស្ត្រនូវែលសេឡង់។
កាលពីពាក់កណ្តាលមីនា ឆ្នាំ២០១៩ ឆ្នាំមុន ខ្មាន់កាំភ្លើង Breton Tarrant អាយុ២៩ឆ្នាំ ជាជនស្បែកស ដែលប្រកាន់គំនិតជ្រុលនិយម ស្អប់ជនជាតិអ៊ីស្លាម និងរើសអើងសាសនាអ៊ីស្លាម បានបើកការវាយប្រហារបាញ់រះ នៅវិហារអ៊ីស្លាម ចំនួន ២ កន្លែង បណ្តាលឱ្យមនុស្សជាង៥០នាក់ស្លាប់ ក្នុងនោះមានមនុស្សប្រុសស្រី និងកូនក្មេង។
តុលាការនិងអ្នកច្បាប់នូវែលសេឡង់ ក៏បានដណ្តឹងសួរខ្លួនឯងដែរ ថាតើគួរតែបន្តឃុំឃាំងទណ្ឌិតនេះ នៅក្នុងគុកនូវែលសេឡង់ឬទេ ព្រោះវាត្រូវចំណាយខាតលុយរាប់លានដុល្លារ។ ឬមួយ ក៏ត្រូវផ្ទេរបញ្ចូនជនឧក្រិដ្ឋនេះ ឱ្យទៅទទួលទោសនៅអូស្ត្រាលី ជាស្រុកកំណើតរបស់គេ ឬយ៉ាងណា។
នៅថ្ងៃព្រហស្បតិ៍ នាយករដ្ឋមន្ត្រីប្រទេសនូវែលសេឡង់ អ្នកស្រី Jacinda Ardern បានថ្លែងសាទរចំពោះសាលក្រមកាត់ទោសដកហូតសេរីភាពមួយជីវិតនេះ និងបានលើកឡើងថា ស្នាមរបួសផ្លូវចិត្ត ដែលពលរដ្ឋនូវែលសេឡង់ ទទួលរង គឺលំបាកនឹងជាសះស្បើយណាស់ តែអ្នកស្រីសង្ឃឹមថា គេនឹងលែងបានឮឈ្មោះឧក្រិដ្ឋជននេះ ចាប់ពីថ្ងៃនេះតទៅ។ បើតាម អ្នកស្រីនាយករដ្ឋមន្ត្រី, ភេរវជនរូបនេះ សក្តិសមនឹងរស់នៅដោយស្ងាត់បិទមាត់ឈឹង ជារៀងរហូត នៅក្នុងពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ