លោកស្រី Louise Glück កវី អាមេរិកាំង ជាជ័យលាភីណូបែលអក្សរសិល្បិ៍ ឆ្នាំ ២០២០
ពានរង្វាន់ណូបែលអក្សរសិល្ប៍ឆ្នាំនេះបានទៅកវីអាមេរិកាំង លោកស្រី Louise Glück សម្រាប់កម្រងកំណាព្យរបស់លោកស្រី ដែលបានធ្វើឲ្យជីវិតបុគ្គលក្លាយជារឿងសកល។ នេះបើតាមការប្រកាសរបស់គណៈកម្មការណូបែល កាលពីថ្ងៃព្រហស្បតិ៍ ម្សិលមិញ។ លោកស្រី Louise Glück ជាស្ត្រីអាមេរិកាំង ទី៤ ហើយ ដែលមានឈ្មោះ ក្នុងបញ្ជីជ័យលាភីណូបែល ឆ្នាំនេះ។
ចុះផ្សាយនៅថ្ងៃ៖
ស្តាប់ - ០១:៥៦
បន្ទាប់ពីណូបែល គីមី និងរូបវិទ្យា លោកស្រី Louise Glück ជាស្រ្តីអាមេរិកាំងម្នាក់ទៀត ដែលបានទទួលរង្វាន់ណូបែលអក្សរសិល្ប៍ ពីគណៈកម្មការណូបែល ដែលមានទីតាំងនៅទីក្រុង ស្តុកខូមប្រទេសស៊ុយអែត។ នៅក្នុងសេចក្តីប្រកាសរបស់ខ្លួន កាលពីថ្ងៃព្រហស្បតិ៍ម្សិលមិញ គណៈកម្មការណូបែល បានអះអាងថា គេសម្រេចប្រគល់រង្វាន់ណូបែល ទៅឲ្យលោកស្រី Louise Gl¨ück សម្រាប់កម្រងកំណាព្យដំបូងរបស់លោកស្រី ក្នុងឆ្នាំ ១៩៦៨ ដែលមានឈ្មោះថា Fristborn។ វាជាកម្រងកំណាព្យ ដែលផ្តោតសំខាន់ទៅលើការស្វែងរក សេចក្តីច្បាស់លាស់។
តាមគណៈកម្មការណូបែលអក្សរសិល្ប៍ កុមារភាព និងជីវិតគ្រួសារ ទំនាក់ទំនងជិតស្និទ្ធជាមួយឪពុកម្តាយ បងប្អូនប្រុសស្រី ជាប្រធានបទចំបង នៅក្នុងស្នាដៃនិពន្ធរបស់កវីអាមេរិកាំង លោកស្រី Louise Gl¨ück។ បន្ទាប់ពីកម្រងកំណាព្យដំបូងគេដែលធ្វើឲ្យលោកស្រីចាប់មានកេរ្តិ៍ឈ្មោះក្នុងរង្វង់កវីសម័យទំនើប លោកស្រី Louise Gl¨ückបានទទួលរង្វាន់ផ្សេងទៀត ដូចជារង្វាន់ Pulitzer នៅឆ្នាំ ១៩៩៣ សម្រាប់កម្រងឈ្មោះ Wild Iris។ នៅក្នុងនោះ កំណាព្យរបស់លោកស្រី ដែលមានឈ្មោះថា Snowdrop បានរៀបរាប់ពីការដឹងខ្លួន រស់ឡើងវិញ បន្ទាប់ពីត្រូវគេកប់នៅក្រោមដី នៅរដូវធ្លាក់ទឹកកក។
លេខារបស់បណ្ឌិតសភាស៊ុយអែត លោក Mats Malm បាននិយាយថា លោកស្រី Louise Gl¨ückបាននិយាយថា លោកស្រី ភ្ញាក់ផ្អើល និងសប្បាយចិត្តនៅពេលលឺថា លោកស្រី ទទួលបានរង្វាន់ណូបែលអក្សរសិល្ប៍លើកនេះ។ ផ្ទុយពីអ្នកនិពន្ធល្បីៗផ្សេងទៀត ដែលគេរំពឹងថា នឹងអាចទទួលបានរង្វាន់ណូបែលអក្សរសិល្ប៍ ដូចជា Kincaid ឬអ្នកនិពន្ធអាមេរិកាំង Thomas Pybchon ឈ្មោះរបស់លោកស្រី Louise Gl¨ück ទើបឃើញមានចុះផ្សាយនៅកាសែត ស៊ុយអែត នៅតែប៉ុន្មានម៉ោងមុនការប្រកាសរបស់គណៈកម្មការណូបែល ដែលមានទម្លាប់ជ្រើសរើសបេក្ខជន ដែលសាធារណជនមិនសូវស្គាល់ច្រើន។
កើតធំដឹងក្តីនៅទីក្រុងញូវយ៉ក លោកស្រី Louise Gl¨ück ដែលមានវ័យ ៧៧ឆ្នាំ ជាសាស្រ្តាចារ្យភាសាអង់គ្លេសនៅសកលវិទ្យាល័យ ដ៏ល្បីឈ្មោះ Yale។ នៅឆ្នាំ ២០១៦ លោកស្រីធ្លាប់បានប្រធានាធិបតីអាមេរិក លោកបារ៉ាក់ អូបាម៉ា បំពាក់មេដាយជាតិ សម្រាប់មនុស្សជាតិ។ Louise Gl¨ückជាមនុស្សស្រីទី៤ហើយ ដែលបានទទួលរង្វាន់ណូបែល អក្សរសិល្ប៍ បើគិតចាប់តាំងពីឆ្នាំ ២០១០ និងជាមនុស្សស្រី ទី១៦ បើគិតចាប់តាំងពីរង្វាន់ណូបែលអក្សរសិល្ប៍ ត្រូវបានបង្កើតឡើងនៅឆ្នាំ ១៩០១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ