រុស្ស៊ីអាមេរិកបើកជំនួបទ្វេភាគីដោះស្រាយវិបត្តិអ៊ុយក្រែននៅដើមខែមករា
នៅថ្ងៃទី ១០ មករា ២០២២ សហរដ្ឋអាមេរិកនិងរុស្ស៊ីនឹងជួបចរចាគ្នា ជុំវិញវិបត្តិអ៊ុយក្រែនផង និងអំពីបញ្ហាគ្រប់គ្រងអាវុធនុយក្លេអ៊ែរផង។ នេះបើតាមការអះអាងរបស់អ្នកនាំពាក្យសេតវិមាន។ ភាគីរុស្ស៊ីក៏បានបញ្ជាក់ព័ត៌មាននេះបន្ថែមទៀតថា ការជំនួបពិគ្រោះយោបល់ទ្វេភាគីនឹងប្រព្រឹត្តទៅនៅទីក្រុងហ្សឺណែវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ជំនួបប្រជុំទ្វេភាគីថ្ងៃទី ១០មករា នឹងប្រព្រឹត្តទៅក្នុងក្របខ័ណ្ឌនៃកិច្ចពិភាក្សាសន្តិសុខយុទ្ធសាស្ត្រ ដែលប្រធានាធិបតីអាមេរិក បៃដិន និងសមភាគីរុស្ស៊ី លោកពូទីន បានផ្តល់សន្ទុះឱ្យ កាលពីខែមិថុនាឆ្នាំ២០២១។
បើតាមមន្ត្រីអាមេរិក ថ្វីបើជំនួបមានទម្រង់ និងផ្តោតខ្លាំងទៅលើការគ្រប់គ្រងអាវុធនុយក្លេអ៊ែរក្រោយសង្គ្រាមត្រជាក់មែន ប៉ុន្តែវិបត្តិអ៊ុយក្រែន ស្ថានភាពនៅតាមព្រំដែនរុស្ស៊ី-អ៊ុយក្រែន ក៏ជាប្រធានបទជាសំខាន់ដែរ។ នៅពេលអង្គុយតមុខចរចាគ្នា រុស្ស៊ី អាចលាតត្រដាងនូវរាល់គ្រប់ក្តីព្រួយបារម្ភរបស់គេ ហើយអាមេរិកក៏អាចត្រដាងការព្រួយបារម្ភខ្លួនវិញ។ នេះបើតាមការលម្អិតរបស់អ្នកនាំពាក្យទីប្រឹក្សាសន្តិសុខជាតិអាមេរិក។
អ្នកនាំពាក្យអាមេរិក បានបញ្ជាក់ទៀតថា បន្តពីជំនួបទ្វេភាគីរុស្ស៊ី-អាមេរិក អាចនឹងមានជំនួបប្រជុំរវាងរុស្ស៊ីនិងអូតង់ នៅថ្ងៃទី ១២មករា ហើយនៅថ្ងៃទី ១៣មករាអាចនឹងមានជំនួបរវាងរុស្ស៊ីនិងអង្គការសន្តិសុខនិងកិច្ចសហប្រតិបត្តិការអឺរ៉ុប ដែលអាមេរិកជាសមាជិកម្នាក់ដែរ។
ចំណែកខាងរុស្ស៊ី អនុរដ្ឋមន្ត្រីក្រសួងការបរទេស បានចាត់ទុកថ្ងៃទី ១០មករា ជាថ្ងៃដ៏សំខាន់ សម្រាប់ឈានឆ្ពោះទៅបន្ធូរបន្ថយភាពតានតឹងជុំវិញវិបត្តិអ៊ុយក្រែន តែមិនសង្ឃឹមថានឹងអាចរកឃើញកិច្ចព្រមព្រៀងណាមួយក្នុងរយៈពេលតែមួយថ្ងៃប្រជុំនោះបានទេ។
សេចក្តីប្រកាសបើកជំនួបកំពូលទ្វេភាគីធ្លាក់មកជួនចំពេលដែលរុស្ស៊ីទើបប្រកាសប្រមូលកងទ័ព១ម៉ឺននាក់ត្រលប់ចូលបន្ទាយវិញ បន្ទាប់ពីបានធ្វើសមយុទ្ធនៅភាគខាងត្បូងប្រទេស ជាប់ព្រំដែនប្រទេសអ៊ុយក្រែនអស់រយៈពេលមួយខែ។ វត្តមានកងទ័ពរុស្ស៊ីនេះ ត្រូវបានបស្ចឹមលោក មានជាអាទិ៍សហរដ្ឋអាមេរិកចោទថារុស្ស៊ីត្រៀមធ្វើអន្តរាគមន៍យោធាលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ