ប្រទេសលោកខាងលិចថារុស្ស៊ីនៅតែបង្កើនភាពតានតឹងនៅព្រំដែនអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:២៧
ប្រទេសលោកខាងលិចកំពុងបារម្ភនិងចោទរុស្ស៊ីថានៅតែកំញើញបង្កើនភាពតានតឹងនៅព្រំដែនអ៊ុយក្រែន ជាពិសេសមុនការចរចារវាងគ្នា។ ស្ថិតក្នុងកាលៈទេសៈនេះ ក្រុមប្រទេសលោកខាងលិចបានប្តេជាថានឹងបង្ហាញពីការរួបរួមសាមគ្គីគ្នាជាធ្លុងមួយ នៅក្នុងកិច្ចពិភាក្សាជាមួយទីក្រុងម៉ូស្គូដែលគ្រោងធ្វើនៅក្នុងខែមករាឆ្នាំក្រោយ។
រុស្ស៊ីនៅតែបង្ហាញសាច់ដុំកំញើញលើកទ័ពឈ្លានពានអ៊ុយក្រែន
វិបត្តិនៅព្រំដែនអ៊ុយក្រែនបាននឹងកំពុងក្លាយជាសំណុំរឿងក្តៅរវាងប្រទេសលោកខាងលិចនិងរុស្ស៊ី។ បស្ចិមលោកកំពុងបារម្ភអំពីស្ថានភាពតានតឹងដែលនៅតែបន្តកើតមាន និងកើងនឡើងជាលំដាប់រវាងរុស្ស៊ីនិងអ៊ុយក្រែន។
ទាក់ទងបញ្ហាដ៏រស៊ើបនេះ រដ្ឋមន្ត្រីការបរទេសអាល្លឺម៉ង់ អ្នកស្រី អាណាឡេណា ប៊ែរប៊ុក (Annalena Baerbock) បង្ហាញការបារម្ភខ្លាំងក្រោយបានឮលោកវ្ល៉ាឌីមៀរ ពូទីន និយាយថា ប្រទេសរុស្ស៊ីបានត្រៀមលក្ខណៈរួចជាស្រេចក្នុងការចាត់វិធានការយោធានានាក្នុងករណីចាំបាច់។ ការលើកឡើងនេះធ្លាក់មកស្របពេលដែលអឺរ៉ុប និងអាមេរិកចោទរុស្ស៊ីថាកំពុងតែបង្កើនការចល័តទ័ពយ៉ាងសកម្មនៅក្បែរព្រំដែនជាមួយអ៊ុយក្រែន។
នាពេលនេះ សហរដ្ឋអាមេរិករួមជាមួយសម្ព័ន្ធមិត្តកំពុងចោទទីក្រុងម៉ូស្កូថាបានបញ្ជូនកងទ័ពចំនួនរាប់ម៉ឺននាក់ទៅក្បែរព្រំដែនអ៊ុយក្រែនក្នុងបំណងរៀបចំត្រៀមសម្រាប់ចូលឈ្លានពានអ៊ុយក្រែន។ ក៏ប៉ុន្តែវិមានក្រឹមឡាំងវិញអះអាងថាអ្នកដែលគួរដាក់ឈ្មោះថាជាជនឈ្លានពានគឺទីក្រុងវ៉ាស៊ីនតោននិងបណ្តាប្រទេសអូតង់ឯណោះវិញទេ មិនមែនជាប្រទេសរុស្ស៊ីឡើយ។
ទោះក្នុងកាលៈទេសៈណាក៏ដោយ សម្រាប់រដ្ឋមន្ត្រីការបរទេសអាល្លឺម៉ង់ វិបត្តិធំនិងស្មុគស្មាញទាក់ទិនរុស្ស៊ីនិងអ៊ុយក្រែននេះ គួរតែត្រូវដោះស្រាយតាមរយៈការសន្ទនា មិនមែនការប្រើកម្លាំងទ័ពឡើយ។
ពីទីក្រុងវ៉ាស៊ីនតោនវិញ រដ្ឋបាលរបស់លោកចូ បៃដិន បានជំរុញឲ្យរុស្សីដកទ័ពរបស់ខ្លួនចេញពីតំបន់ក្បែរព្រំដែនអ៊ុយក្រែនដើម្បីបន្ធូរបន្ថយភាពតានតឹងដែលកំពុងកើនឡើង។
អាមេរិកថាចង់កាត់បន្ថយភាពតានតឹងរវាងរុស្ស៊ី និងអ៊ុយក្រែនតាមរយៈការទូត ហើយអាមេរិកបានគូសបញ្ជាក់ប្រាប់ដែរពីការត្រៀមខ្លួនចូលរួមក្នុងកិច្ចចរចាសន្តិសុខជាមួយរុស្ស៊ី និងអូតង់នៅខែមករាឆ្នាំក្រោយ។
កិច្ចចរចារវាងរុស្ស៊ី ជាមួយសហរដ្ឋអាមេរិកនិងអូតង់ គ្រោងធ្វើនៅខែមករាដើមឆ្នាំ២០២២
ភាគីរុស្ស៊ី និងប្រទេសលោកខាងលិចបានព្រមព្រៀងគ្នារៀបចំការចរចាមួយដែលគេហៅឈ្មោះថាកិច្ចពិភាក្សាសន្តិសុខដើម្បីឈានទៅកាត់បន្ថយភាពតានតឹងដែលកំពុងកើនឡើងខ្លាំងនៅព្រំដែនអ៊ុយក្រែន។ តាមរយៈកិច្ចពិភាក្សានេះ គេសង្ឃឹមថា រុស្ស៊ី និងសហរដ្ឋអាមេរិក ព្រមទាំងអង្គការអូតង់នឹងអាចស្វែងរកចំណុចស្របគ្នាបានទោះតិច ឬក៏ច្រើនក្តី។
រដ្ឋមន្ត្រីការបរទេសរុស្ស៊ីលោក Sergei Lavrov និយាយថារុស្ស៊ី បានសម្រេចចូលរួមក្នុងកិច្ចចារជុំទី១ នៅដើមឆ្នាំ ២០២២ ពីព្រោះថារុស្ស៊ីមិនចង់ដោះស្រាយវិបត្តិធំដោយដើរលើផ្លូវនៃការប្រឈមមុខដាក់គ្នាឡើយ។ ហើយអ្វីដែលរុស្ស៊ីចង់បានគឺដំណោះស្រាយតាមរយៈការទូត។
អ្វីដែលគេដឹងនៅពេលនេះ គឺថានៅក្នុងពេលចរចាជាមួយគ្នា រុស្ស៊ី អាមេរិក អង្គការអូតង់ នឹងជជែកវែកញែកគ្នាឲ្យច្បាស់អំពីគោលជំហររបស់ពួកគេដើម្បីរកច្រកចេញពីវិបត្តិ។ នៅមុនកិច្ចពិភាក្សាមកដល់ រុស្ស៊ី បានប្រាប់ពីចេតនារបស់ខ្លួនហើយថាចង់ឲ្យកិច្ចសន្ទនារវាងគ្នាសម្រេចបានលទ្ធផលជាក់ស្តែង និងថាបញ្ហានានាមិនគួរត្រូវទុកអូសបន្លាយតទៅមុខទៀតនោះទេ។
ទាក់ទងចំណុចនេះ គួរទាញបញ្ជាក់ថាចំណុចសំខាន់ដែលរុស្ស៊ីចង់បានទីបំផុត និងធ្លាប់បានទាមទាររួចមកហើយនោះ គឺការធានារបស់អូតង់ថាមិនទទួលយកប្រទេសអ៊ុយក្រែន និងហ្សកហ្ស៊ី ឲ្យក្លាយជាសមាជិករបស់អូតង់ឡើយ ហើយអូតង់ត្រូវឈប់ពង្រីកដែនឥទ្ធិពលរបស់ខ្លួនទៅក្នុងបណ្តាប្រទេសអតីតសហភាពសូវៀត។
ក្រៅពីនេះ កាលពីសប្តាហ៍មុន រុស្ស៊ីក៏បានអំពាវនាវផងដែរឲ្យមានការដកទ័ពរបស់អូតង់នៅអឺរ៉ុបកណ្តាល និងខាងកើតពោលគឺនៅក្នុងប្រទេសប៉ូឡូញ អេស្តូនី ឡេតូនី និងលីទុយអានី។
តើអាមេរិកនិងអឺរ៉ុបនិយាយអ្វីខ្លះពីកិច្ចចរចាជាមួយរុស្ស៊ី?
ប្រទេសលោកខាងលិច បានបដិសេធរួចស្រេចហើយថាមិនធ្វើបានការទាមទារកន្លងមករបស់រុស្ស៊ីឡើយ ប៉ុន្តែថានឹងប្តេជ្ញាចិត្តមោះមុតចំពោះការសន្ទនានឹងគ្នា ដើម្បីស្វែងរកច្រកផ្លូវដែលអាចដើរស្របគ្នាបាន។
សម្រាប់អាល្លឺម៉ង់ ការពិភាក្សាគ្នាស្វែងរកដំណោះស្រាយគឺជាវិធីដ៏ល្អបំផុតបើទោះបីជាសំណើដែលភាគីរុស្ស៊ីចង់បានមិនមែនជាមូលដ្ឋាននៃការចរចារបស់អឺរ៉ុបក៏ដោយ។
ជុំវិញកិច្ចពិភាក្សានេះដែរ រដ្ឋមន្ត្រីការបរទេសអាមេរិកលោកអង់តូនី ប្ល៊ីងកិន និងប្រមុខការទូតអឺរ៉ុបលោក ហ្សូសេព បូរែល (Josep Borrell) បានជួបសន្ទនាគ្នាតាមទូរសព្ទកាលពីថ្ងៃពុធម្សិលមិញ។ នៅក្នុងសេចក្តីថ្លែងការណ៍មួយ ប្រមុខការទូតអឺរ៉ុបនិយាយថាប្រទេសលោកខាងលិចបានឯកភាពគ្នាឲ្យមានការពិភាក្សាណាមួយស្តីអំពីសន្តិសុខអឺរ៉ុប ដោយមានវត្តមានពីប្រទេសសមាជិក។ ហើយអ្វីដែលសំខាន់ដែរនោះគឺប្រទេសលោកខាងលិច បានប្តេជាថានឹងរួបរួមសាមគ្គីគ្នាជាធ្លុងមួយ នៅក្នុងកិច្ចពិភាក្សាជាមួយទីក្រុងម៉ូស្គូដែលគ្រោងនឹងធ្វើនៅក្នុងខែមករាឆ្នាំក្រោយនេះ។
ដោយឡែក បើតាមដំណឹងចុងក្រោយរបស់ទីភ្នាក់ងារព័ត៌មាន AFP ដែលទើបធ្លាក់មកមុននេះបន្តិច ប្រធានាធិបតីរុស្ស៊ី វ្ល៉ាឌីមៀរ ពូទីន និយាយថាលោកមើលឃើញការឆ្លើយតបជាវិជ្ជមានរបស់អាមេរិកទាក់ទងសំណើរបស់រុស្ស៊ី។ ជាសំណើស្តីអំពីការទប់ស្កាត់នូវការពង្រីកដែនឥទ្ធិពលរបស់អង្គការអូតង់នៅភាគខាងកើតអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ