អង្គការសុខភាពពិភពលោក ជំរុញការរិតបន្តឹងការផ្សាយពាណិជ្ជកម្មទឹកដោះគោក្មេង
ទឹកដោះគោក្មេង ជាឧស្សាហកម្មដែលមានទំហំដល់ទៅជាង ៥៥ពាន់លានដុល្លារក្នុងមួយឆ្នាំៗ។ ទឹកដោះគោក្មេង (និងបារី) ជាផលិតផលតែមួយគត់ ដែលត្រូវឆ្លងកាត់ការត្រួតពិនិត្យយ៉ាងតឹងតែងបំផុតមុននឹងចេញផ្សាយពាណិជ្ជកម្មបាន។ ប៉ុន្តែ ក្រុមហ៊ុនផលិតទឹកដោះគោ បានប្រើវិធីផ្សាយពាណិជ្ជកម្ម បែបវាយលុក និងបំបាក់ទឹកចិត្តមិនឱ្យអ្នកជាម្តាយបំបៅទឹកដោះកូនទេ។ នេះបើតាមការចោទប្រកាន់របស់អង្គការសុខភាពពិភពលោក។
ចុះផ្សាយនៅថ្ងៃ៖
ការផ្សាយពាណិជ្ជកម្មលក់ទឹកដោះគោកូនក្មេង មានសុះសាយទូទៅ ពេញពិភពលោក។ ហើយអ្នកជាឪពុកម្តាយជាងពាក់កណ្តាលរងឥទ្ធិពលពីការផ្សាយពាណិជ្ជកម្មនេះ ក្នុងការសម្រេចចិត្តបំបៅដោះកូន។ នេះបើតាមអង្គការសុខភាពពិភពលោក ដែលបានចោទប្រកាន់ដោយចំៗ ថា ក្រុមហ៊ុនផលិតទឹកដោះគោក្មេង បានប្រើយុទ្ធសាស្ត្រពាណិជ្ជកម្ម បែប “អសីលធម៌” គិតដល់ប្រយោជន៍ក្រុមហ៊ុនច្រើនជាងសុខភាពក្មេងនិងសុខភាពសាធារណៈ។
បើតាមរបាយការណ៍របស់អង្គការសុខភាពពិភពលោកចេញផ្សាយនៅថ្ងៃពុធទី ២៣កុម្ភៈ នេះ ក្រុមហ៊ុនផលិតទឹកដោះគោក្មេង បានចំណាយថវិកាក្នុងមួយឆ្នាំអស់ប្រមាណពី ៣ទៅ៥ពាន់លានដុល្លារ ដើម្បីទាក់ទាញទឹកចិត្តម្តាយឪពុកឱ្យជ្រើសរើសបំបៅកូនដោយទឹកដោះគោ។ ជាការផ្សាយពាណិជ្ជកម្ម បែបវាយលុក បន្លំ ភូតភរ ចាប់ផ្តើមដំបូងដោយសំបកកំប៉ុង និងសារអួតអាងអំពីគុណភាពទឹកដោះគោ ថាផ្សំឡើងដោយសារធាតុជំនួយខួរក្បាលក្មេង ប៉ុន្តែពុំមានអ្វីបញ្ជាក់សោះនៅពេលសិក្សាវិភាគទៅ។ នេះបើតាមប្រសាសន៍ពន្យល់របស់លោក Dr Nigel Rollins ប្រធានដេប៉ាតឺម៉ង់ សុខភាពទារកនៃអង្គការសុខភាពពិភពលោក។ សារភូតភរកុហក មួយទៀត គឺការបំបាក់ទឹកចិត្តអ្នកជាម្តាយឱ្យមិនឱ្យបំបៅដោះកូន ដោយលើកឡើងថា ទឹកដោះម្តាយចាប់អស់ជីវជាតិ ចាប់ពី៦ខែឡើងទៅ។ សារនេះអាចនាំប្រយោជន៍ដល់ក្រុមហ៊ុនខ្លាំងសម្បើមណាស់។
របាយការណ៍សិក្សាក្នុង៨ប្រទេស បានបង្ហាញឱ្យឃើញទៀតថា មានស្ត្រីពរពោះអង់គ្លេស៨៤% វៀតណាម៩២% និងចិន៩៧% រងឥទ្ធិពលខ្លាំងការផ្សាយពាណិជ្ជកម្មឱ្យកូនបៅដោះគោជំនួសការបៅដោះម្តាយ។
អង្គការសុខភាពពិភពលោក និងមូលនិធិអង្គការសហប្រជាជាតិដើម្បីកុមារ (អង្គការយូនីសេហ្វ)ដែលព្យាយាមតាំងពីច្រើនឆ្នាំមកហើយជំរុញឱ្យស្ត្រីបំបៅដោះកូន មិនបន្ទោសស្ត្រីដែលសម្រេចចិត្តឱ្យកូនបៅដបទេ ប៉ុន្តែត្រូវការផ្តល់ព័ត៌មានត្រឹមត្រូវអំពីគុណប្រយោជន៍នៃទឹកដោះម្តាយ។ ទឹកដោះម្តាយជាអាហារដ៏ល្អជាគេបំផុតសម្រាប់ពង្រឹងសរីរាង្គរបស់ទារក។ ពិភពលោកត្រូវតែពង្រឹងនយោបាយ ច្បាប់ និងការវិនិយោគក្នុងវិស័យបំបៅកូន ដើម្បី ធានាថាស្ត្រីជាម្តាយបានគេចរួចពីការផ្សាយពាណិជ្ជកម្មបំពាននិងភូតភរ។ នេះជាសំណូមពររបស់អង្គការសុខភាពពិភពលោក ដែលទទូចឱ្យរដ្ឋជាសមាជិកកំរិតការផ្សាយពាណិជ្ជកម្មទឹកដោះគោក្មេង និងហាមមិនឱ្យបុគ្គលិកសុខាភិបាលទទួលកិច្ចសន្យាផ្សាយពាណិជ្ជកម្មឱ្យក្រុមហ៊ុនអ្នកផលិត/លក់ទឹកដោះគោ។
អង្គការសុខភាពមានច្បាប់គ្រប់គ្រងការផ្សាយពាណិជ្ជកម្មទឹកដោះគោក្មេងតាំងពីឆ្នាំ១៩៨១មក ប៉ុន្តែប្រទេសខ្លះមិនអនុវត្ត និងចែងក្នុងច្បាប់ជាតិទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ