លេចជំងឺរលាកថ្លើមថ្មី មិនស្គាល់ប្រភព លើកុមារ នៅអឺរ៉ុប
បើតាមសេចក្តីប្រកាសរបស់មជ្ឈមណ្ឌលសុខភាពអឺរ៉ុប នៅថ្ងៃអង្គារទី ២០ មេសា ២០២២ មានករណីក្មេងកើតជំងឺរលាកថ្លើមថ្មីម្យ៉ាង លេចឡើងជាដំបូងនៅប្រទេសអង់គ្លេស និងបន្ទាប់មកក្នុងបណ្តាប្រទេសនៅអឺរ៉ុបចំនួនបួនផ្សេងទៀត។ ជាជំងឺរលាកថ្លើមកុមារ មិនស្គាល់ប្រភព ដែលអង្គការសុខភាពពិភពលោក គិតថានឹងអាចមានកើតនៅក្នុងបណ្តាប្រទេសជាច្រើនទៀតនៅថ្ងៃ ខាងមុខ។
ចុះផ្សាយនៅថ្ងៃ៖
ស្តាប់ - ០១:៥២
ករណីរលាកថ្លើមស្រួចស្រាវ ដោយមិនដឹងមូលហេតុ ត្រូវបានអាជ្ញាធរសុខភាពអង់គ្លេសរកឃើញកើតលើកុមារជាដំបូងគេ ចំនួន១០ករណីកាលពី ថ្ងៃទី ១០ ខែមេសា។ ហើយបីថ្ងៃបន្ទាប់ អង់គ្លេសរាប់ឃើញមានឡើងដល់ ៧៤ករណី។ ករណីសង្ស័យមានលេចឡើងជាច្រើនទៀត នៅប្រទេសដាណឺម៉ាក អៀរឡង់ ហូឡង់ និងអេស្ប៉ាញ។ នេះបើតាមសេចក្តីថ្លែងការណ៍លម្អិតរបស់ភ្នាក់ងារការពារនិងត្រួតពិនិត្យជំងឺនៅអឺរ៉ុប។
នៅសហរដ្ឋអាមេរិក ភ្នាក់ងារសុខាភិបាលសង្ស័យថាមានករណីរលាកថ្លើមថ្មីលើកុមារចំនួន ៦ករណីនៅរដ្ឋ អាឡាបាម៉ា និងកំពុងស្រាវជ្រាវរកក្នុងពេញផ្ទៃប្រទេសទៀត។
ចំណែកអង្គការសុខភាពពិភពលោកវិញបានអះអាងនៅថ្ងៃសុក្រទី ១៥មេសា ថាជំងឺរលាកថ្លើមកុមារថ្មីមិនស្គាល់ប្រភពនេះ មានលេចឡើងយ៉ាងហោច៥ករណីនៅអៀរឡង់ និងបីករណីនៅអេស្ប៉ាញ ហើយអាចនឹងមានជាច្រើនករណីបន្ថែមជាបន្តបន្ទាប់ ក្នុងប្រទេសផ្សេងទៀត នៅថ្ងៃនិងសប្តាហ៍ខាងមុខ។
តើជំងឺរលាកថ្លើមថ្មីលើកុមារបណ្តាលមកពីអ្វី ? ភ្នាក់ងារអាមេរិកក៏ដូចជាអង្គការសុខភាពពិភពលោក មិនទាន់អាចបញ្ជាក់អំពីមូលហេតុនៃការបង្កជំងឺនេះទេ ប៉ុន្តែអ្នកស្រាវជ្រាវអង់គ្លេស យល់ថាបើយោលទៅលើលក្ខណៈគ្លីនិកនិងរោគរាតត្បាតវិទ្យា ជំងឺរលាកថ្លើមនេះទំនងបំផុតបណ្តាលមកពីការបង្ករោគ។
ករណីកើតជំងឺរលាកថ្លើមស្រួចស្រាវ ដែលរកមូលហេតុនៃការបង្ករោគមិនឃើញ មិនមែនជាករណីកម្រទេ នៅប្រទេសបារាំង។ បារាំងក៏រកឃើញមានពីរករណីដែរ ប៉ុន្តែមិនហួសហេតុលើសព្វមួយដងទេ និងកំពុងសិក្សាស្រាវជ្រាវរកក្រែងមានដូចករណីរលាកថ្លើមថ្មី។
សូមបញ្ជាក់ថា បើតាមការសិក្សាក្នុងមន្ទីរពិសោធន៍ កុមារកើតជំងឺរលាកថ្លើមថ្មី គ្មានមេរោគជំងឺរលាកថ្លើមប្រភេទ A B C D និង E ដែលពិភពលោកធ្លាប់ស្គាល់កន្លងមកទេ។ គ្មានកុមារឈឺណាម្នាក់បាត់បង់ជីវិតឡើយ ប៉ុន្តែខ្លះត្រូវវះកាត់ប្តូរថ្លើម។ រោគសញ្ញានៃជំងឺរលាកថ្លើមថ្មីលើកុមារភាគច្រើន មានជាអាទិ៍ ឡើងលឿងខ្លាំង ហើយមានអាការៈចុកឆ្អល់ពោះ ឈឺពោះ និង រាគ ក្អួត ប៉ុន្មានសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ