ប្រធានអាំងទែរប៉ូល ជាប់អង្កេតពីបទផ្សំគំនិតប្រព្រឹត្តទារុណកម្ម
តុលាការបារាំងបានបើកអង្កេតថ្មីមួយទៀត ប្រឆាំងនឹងប្រធានអាំងទែរប៉ូល ជាតិអេមីរ៉ាត់អារ៉ាប់រួម លោក អាមេដ អាល់រ៉ៃស៊ី ពីបទបានផ្សំគំនិតធ្វើទារុណកម្ម ជនសង្ស័យជាប់ឃុំ នៅក្នុងប្រទេសរបស់លោក និងដែលកាលក្នុងពេលលោកនៅជាអ្នកទទួលខុសត្រូវជាន់ខ្ពស់ប៉ូលិសរបស់រាជាណាចក្រអារ៉ាប៊ីសាអូឌីត។ ការបើកអង្កេតនេះធ្វើឡើងក្រោយពីមានបណ្តឹងរបស់ពលរដ្ឋអង់គ្លេសពីរនាក់។
ចុះផ្សាយនៅថ្ងៃ៖
ស្តាប់ - ០២:១១
តុលាការប្រឆាំងភេរវកម្មបារាំង បានគូសបញ្ជាក់នៅថ្ងៃពុធទី១១ឧសភា ២០២២នេះ ថាបានប្រគល់ភារកិច្ចអង្កេតទៅឱ្យចៅក្រមស៊ីបអង្កេតក្រុងប៉ារីសហើយ ដើម្បីបំភ្លឺសំណុំរឿងចោទប្រកាន់លោកប្រធានអាំងទែរប៉ូល ពីបទធ្វើទារុណកម្មនិងចាប់ឃុំឃាំងមនុស្សដោយគ្មានឆ្លងកាត់តុលាការ នៅរវាងពីឆ្នាំ ២០១៨និងឆ្នាំ២០១៩។
ដោយសំអាងលើសមត្ថកិច្ចសកលរបស់បារាំងដែលអនុញ្ញាតឱ្យតុលាការបើកអង្កេតប្រឆាំងរាល់គ្រប់បុគ្គលជាប់សង្ស័យប្រព្រឹត្តអំពើព្រៃផ្សៃ ឱ្យតែនៅស្នាក់នៅលើទឹកដីបារាំង ដើមចោទជាជនជាតិអង់គ្លេសទាំងពីរ បានសន្យានៅថ្ងៃនេះ ផ្តល់ភស្តុតាងទាក់ទងនឹងការធ្វើទារុណកម្ម នៅពេលចៅក្រមស៊ើបអង្កេតកោះហៅមកសាកសួរចម្លើយ។
ដើមចោទទីមួយ លោក Matthew Hedges ដែលជាសាស្ត្រាចារ្យ និង អ្នកស្រាវជ្រាវថ្នាក់បណ្ឌិត ស្តីពីស្ថាប័នសន្តិសុខនៅអេមីរ៉ាតអារ៉ាប់រួម នៅសកលវិទ្យាល័យDurhamអង់គ្លេស បានរៀបរាប់អំពីទារុណកម្ម លើផ្លូវកាយ និងផ្លូវអារម្មណ៍យ៉ាងធ្ងន់ធ្ងរបំផុត ក្នុងអំឡុងពេលជាប់សង្ស័យ និងជាប់ឃុំដោយអយុត្តិធម៌ ចំនួន៧ខែ កាលពីឆ្នាំ២០១៨ ពីបទចារកិច្ច មុននឹងត្រូវបានតុលាការកាត់ទោសឱ្យជាប់ពន្ធនាគារអស់មួយជីវិត និងលើកទោសឱ្យវិញ ក្រោមសម្ពាធអន្តរជាតិ។ ចំណែកលោក Ali Issa Ahmad ដែលជាភ្នាក់ងារសន្តិសុខវិញ បានរៀបរាប់ក្នុងថ្ងៃតែមួយដែរថា លោកបានរងការវាយដំ យ៉ាងខ្លាំង ក្នុងពេលជាប់់ឃុំមួយខែ កាលពីឆ្នាំ២០១៩ នៅប្រទេសអេមីរ៉ាតអារ៉ាប់រួម ពីបទបានពាក់អាវយឺតមានទង់ជាតិកាតា ពេលធ្វើដំណើរទៅតាមដានការប្រកួតកីឡាបាល់ទាត់ដណ្តើមពានរង្វាន់អាស៊ី។
តុលាការប្រឆាំងភេវកម្មបារាំង បានបើកអង្កេតបឋមមួយរួចហើយកាលពីខែមីនាប្រឆាំងនឹងលោកអាល់រ៉ៃស៊ី ពីបទធ្វើទារុណកម្មនិងប្រើអំពើព្រៃផ្សៃលើសកម្មជនសិទ្ធិមនុស្ស តាមរយៈបណ្តឹងរបស់អង្គការGulf Center For Human Rights។
ស្ថានទូតអារ៉ាប៊ីសាអូឌីត មិនបញ្ចេញប្រតិកម្មអ្វីទាក់ទងនឹងសំណុំរឿងអង្កេតប្រឆាំងលោកអាល់រ៉ៃស៊ីទេ។ តែកាលពីខែវិច្ឆិកា ពេលលោកអាល់រ៉ៃស៊ីជាប់ឆ្នោតជាប្រធានអាំងទែរប៉ូល ក្រសួងការបរទេសអារ៉ាប៊ីសាអូឌីត ធ្លាប់បានព្រលយថា ក្រោមការដឹកនាំរបស់លោក អាល់រ៉ៃស៊ី វិស័យប៉ូលិសបានស្គាល់ទំនើបកម្មច្រើន និងមិនអនុគ្រោះឱ្យប៉ូលិសបំពានលើជនសង្ស័យណាទេ ដូច្នេះរាល់គ្រប់បណ្តឹងប្រឆាំងលោកអាល់រ៉ៃស៊ីគ្មានតម្លៃឡើយនិងត្រូវច្រានចោលទាំងអស់។ នាមជាប្រធានអាំងទែរប៉ូល លោកអាល់រ៉ៃស៊ីនឹងប្រើអភ័យឯកសិទ្ធិការពារខ្លួនឬ ? បើតាមប្រភពសិទ្ធិនឹងសំណុំរឿង នេះជាសិទ្ធិសម្រេចរបស់ចៅក្រមស៊ើបអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ