UNICEF៖ ប្រទេសអ្នកមាន បង្កើតឲ្យមានលក្ខខណ្ឌជីវិតដ៏គ្រោះថ្នាក់ សម្រាប់កុមារទូទាំងពិភពលោក
បណ្តាប្រទេសអ្នកមាន បាននិងកំពុងតែបង្កើតឲ្យមាន លក្ខខណ្ឌជីវិតដ៏គ្រោះថា្នក់ សម្រាប់កុមារមិនត្រឹមតែក្នុងស្រុករបស់ខ្លួនទេ គឺកុមារនៅទូទាំងពិភពលោក។ នេះបើផ្អែកតាមការសន្និដ្ឋាន របស់របាយការណ៍ចេញផ្សាយនៅថ្ងៃអង្គារ ទី២៤ឧសភានេះ ដោយមជ្ឈមណ្ឌលស្រាវជ្រាវ Innocenti នៃអង្គការ UNICEF។ អ្នកជំនាញបានអំពាវនាវ ឲ្យកាត់បន្ថយការផលិតកាកសំណល់ ព្រមទាំងសារធាតុពុលនៅក្នុងបរិយាកាស និងនៅក្នុងទឹកជាដើម។
ចុះផ្សាយនៅថ្ងៃ៖
ស្តាប់ - ០២:៥២
មជ្ឈមណ្ឌលស្រាវជ្រាវ Innocenti បានធ្វើការសិក្សានៅតាមបណ្តាប្រទេសចំនួន៣៩ ដែលជាសមាជិកនៃអង្គការសហប្រតិបត្តិការអភិវឌ្ឍន៍សេដ្ឋកិច្ច ហៅកាត់ថា OCDE និងសមាជិកសហភាពអឺរ៉ុប។ ជាការសិក្សាដែលផ្តោតទៅលើ ផលប៉ះពាល់ផ្សេងៗមកលើសុខភាពកុមារ បណ្តាលមកពីកត្តាមួយចំនួនដូចជា ថ្នាំកសិកម្ម សំណើមក្នុងផ្ទះ សារធាតុសំណ ពន្លឺ និងកាកសំណល់ផ្សេងៗទៀត។
ជាការសន្និដ្ឋាន ក្នុងចំណោមប្រទេសទាំង៣៩នេះ គ្មានប្រទេសណាមួយ ដែលបានផ្តល់ឲ្យនូវលក្ខខណ្ឌបរិស្ថានរស់នៅ ដែលបរិសុទ្ធស្អាតឲ្យដល់កុមារទេ បើទោះបីកម្រិតមានមិនដូចគ្នា ពីប្រទេសមួយទៅប្រទេសមួយក៏ដោយ។ ខណៈដែល អេស្ប៉ាញ ព័រទុយហ្កាល់ និងអៀរឡង់ បានផ្តល់នូវកត្តាល្អជាច្រើន ដល់បរិស្ថានរបស់នៅរបស់កុមារគ្រាន់បើជាងគេ អូស្ត្រាលី ប៊ែលហ្ស៊ិក កាណាដា អាមេរិកឯនោះវិញ មិនបានធានាឲ្យមាននូវលក្ខខណ្ឌជីវិតល្អប្រសើរសម្រាប់កុមារទេ។
ភាគច្រើននៃប្រទេសអ្នកមានទាំងនេះ មិនត្រឹមតែមិនបានផ្តល់ឲ្យ នូវក្របខណ្ឌបរិស្ថានរស់នៅ ដែលស្អាតបរិសុទ្ធឲ្យដល់កុមារខ្លួនទេ តែលើសពេលនេះ ប្រទេសទាំងនេះបានចូលរួមក្នុងបំផ្លាញបរិស្ថានជីវិតរស់នៅ របស់កុមារនៅតាមប្រទេសក្រីក្រផ្សេងទៀត ទូទាំងពិភពលោក។ នេះបើផ្អែកតាមការលើកឡើង របស់លោកស្រី Gunilla Olsson នាយិកាមជ្ឈមណ្ឌល Innocenti។ ជាការចូលរួម តាមរយៈការប្រើប្រាស់ទំនិញ ការបញ្ចេញឧស្ម័នកាបូនិកក្នុងបរិយាកាស ព្រមទាំងកាកសំណល់គ្រោះថ្នាក់ ដែលប្រទេសអ្នកមានយកទៅចោល នៅតាមប្រទេសប្រទេសក្រីក្រជាដើម។
យ៉ាងហោចណាស់ កុមារ២០លាននាក់ នៅតាមប្រទេសទាំង៣៩ គឺមានកម្រិតសារធាតុសំណក្នុងឈាមខ្ពស់ខ្លាំង។ ហ្វាំងឡង់ អ៊ីស្លង់ ន័រវែស ស្ថិតនៅលំដាប់ជួរមុខគេ ដែលផ្តល់ឲ្យនូវបរិស្ថានជីវិតល្អប្រសើរខ្លាំងដល់កុមារ តែទន្ទឹមគ្នានេះប្រទេសទាំងនេះ ស្ថិតនៅចុងប៉ូចគេ បើនិយាយពីផលប៉ះពាល់ទៅលើភពផែនដីទាំងមូល ដោយសារតែការបញ្ចេញឧស្ម័នកាបូនិក ការចោលកាកសំណល់អេឡិចត្រូនិក និងកម្រិតនៃការប្រើប្រាស់ទំនិញដែលខ្ពស់ខ្លាំង។
ប្រទេសខ្លះដូចជា ឡេតូនី ព័រទុយហ្កាល់ អង់គ្លេស ហុងគ្រីជាដើម គឺកុមារម្នាក់ក្នុងចំណោម៥នាក់ ប្រឈមនឹងបញ្ហាកម្រិតសំណើមខ្លាំងនៅក្នុងផ្ទះ។ កុមារភាគច្រើន ស្រូបខ្យល់ដង្ហើមចូលទៅ ដែលមានសារធាតុពុល មិនថាក្នុងផ្ទះ ឬនៅខាងក្រៅ ជាក់ស្តែងដូចជានៅមិចស៊ិក និងជប៉ុន។ ចំណែក នៅហូឡង់ អ៊ីស្រាអែល ប៊ែលហ្ស៊ិក ប៉ូឡូញ ឆេក និងស្វ៊ីសជាដើម គឺកុមារម្នាក់ក្នុងចំនោម១២នាក់ ប្រឈមនឹងសារធាតុពុល បណ្តាលមកពីថ្នាំគីមីសម្លាប់សត្វល្អិត និងសម្លាប់ស្មៅដែលគេប្រើក្នុងកសិកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ