វិបត្តិថាមពល៖ ក្រុមហ៊ុនផលិតថាមពលធំៗទាំង៣របស់បារាំង អំពាវនាវឲ្យកាត់បន្ថយការប្រើប្រាស់អគ្គិសនី
បារាំង ក៏ដូចជាប្រទេសទាំងអស់នៅអឺរ៉ុប កំពុងតែប្រឈមនឹងវិបត្តិខ្វះថាមពលអគ្គិសនីប្រើប្រាស់ ដោយសារតែវិបត្តិសង្គ្រាមនៅអ៊ុយក្រែន។ ក្រុមហ៊ុនផលិតថាមពលធំៗទាំង៣នៅបារាំង បានរួមគ្នាចេញលិខិតចំហ កាលពីថ្ងៃអាទិត្យម្សិលមិញ អំពាវនាវឲ្យប្រជាជន ក៏ដូចជាសហគ្រាសទាំងអស់នៅបារាំង ត្រូវផ្លាស់ប្តូរទំលាប់ ហើយងាកមកសន្សំសំចៃការប្រើប្រាស់ចរន្តអគ្គិសនី ដើម្បីត្រៀមបង្កាសម្រាប់រដូវរងារខាងមុខ។
ចុះផ្សាយនៅថ្ងៃ៖
ស្តាប់ - ០២:១៤
អគ្គនាយកក្រុមហ៊ុនផលិតថាមពលធំៗទាំង៣របស់បារាំង គឺ Total EDF និង Engie បានរួមគ្នាធ្វើលិខិតចំហមួយ ដើម្បីប្រាប់ទៅកាន់អ្នកប្រើប្រាស់ទាំងអស់ ថាត្រូវតែចាប់ផ្តើមសន្សំសំចៃការប្រើប្រាស់ថាមពល។ អគ្គនាយកទាំង៣បានលើកឡើងថា ដោយសារសង្គ្រាមនៅអ៊ុយក្រែន រុស្ស៊ីបានកាត់បន្ថយការបង្ហូរឧស្ម័នមកកាន់អឺរ៉ុប។ ទន្ទឹមគ្នានេះ អឺរ៉ុបកំពុងជួបបញ្ហាមួយចំនួន មិនទាន់អាចផលិតចរន្តអគ្គិសនីបានគ្រប់នៅឡើយ។
គឺក្នុងហេតុផលនេះ ដែលប្រជាពលរដ្ឋ រួមទាំងសហគ្រាសទាំងអស់ ត្រូវតែរួមគ្នា ផ្លាស់ប្តូរទំលាប់នៃការប្រើប្រាស់ ងាកមកសន្សំសំចៃ ដើម្បីអនុញ្ញាតឲ្យប្រព័ន្ធអគ្គិសនី អាចមានលទ្ធភាពត្រៀមលក្ខណៈសម្រាប់រដូវរងារខាងមុខ។ នៅរវាងចុងឆ្នាំនេះ នឹងអាចមានបញ្ហាប្រឈមជាច្រើនមកបន្ថែម ដូចជាតម្រូវការអគ្គិសនីឡើងខ្ពស់ ភាពមិនប្រាកដប្រជាផ្នែកបច្ចេកទេស ព្រមទាំងអាចមានវិបត្តិភូមិសាស្ត្រនយោបាយថ្មីណាមួយទៀត។
អគ្គនាយកទាំង៣ បានប្រកាស ឲ្យគ្រប់គ្នាត្រូវយល់ពីស្ថានការណ៍លំបាកនេះ ហើយត្រូវចាប់ផ្តើមពីពេលឥឡូវនេះ ដើម្បីសន្សំសំចៃប្រភពថាមពលទាំងអស់ មិនថាចរន្តអគ្គិសនី ឧស្ម័ន ឬថាមពលប្រេងឥន្ធនៈនោះទេ។
គួរបញ្ជាក់ថា បារាំងមានគម្រោងបំពេញស្តុកឧស្ម័នរបស់ខ្លួន ឲ្យបានពេញ១០០% នៅរវាងចុងរដូវក្តៅនេះ ដើម្បីត្រៀមប្រើនៅរដូវរងារខាងមុខ។ បន្ថែមពីនេះ លោកស្រីនាយករដ្ឋមន្ត្រីអាលីហ្សាបែត ប៊នបានប្រកាសកាលពីថ្ងៃព្រហស្បតិ៍ថា បារាំងនឹងចាប់ផ្តើមសាងសង់កំពុងផែស្តុកម៉េតានដ៏ធំមួយ នៅទីក្រុងអាវរ៍ ដើម្បីរំដោះខ្លួនឈប់ប្រើឧស្ម័នរបស់រុស្ស៊ី។
ដោយឡែក ប្រឈមនឹងបញ្ហាអាចខ្វះចរន្តអគ្គិសនីប្រើ នៅរដូវរងារខាងមុខនេះ ក្រសួងអន្តរកម្មថាមពលបារាំង បានបញ្ជាក់នៅរសៀលថ្ងៃអាទិត្យថា បារាំងនឹងដាក់ឲ្យដំណើរការឡើងវិញជាបណ្តោះអាសន្ន នូវរោងចក្រអគ្គិសនីដើរដោយចំហេះធ្យូងថ្ម នៅតំបន់ Saint-Avold ដែលទើបតែបានបិទកាលពីចុងខែមីនាកន្លងទៅ។ យ៉ាងណាក៏ដោយក្រសួងនៅតែអះអាងថា ទោះបើកដំណើរការរោងចក្រនេះវិញ តែទំហំអគ្គិសនីដើរដោយធ្យូងថ្ម មានមិនលើស ១%នៃទំហំអគ្គិសនីទាំងអស់ទេ ហើយកម្មវត្ថុរបស់រដ្ឋាភិបាលក៏មិនប្តូរដែរ គឺសន្យាឈប់ប្រើទាំងស្រុងនូវអគ្គីសនីដើរដដោយចំហេះធ្យូងថ្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ