ប្រមុខការទូតអាមេរិកស្វាគមថៃដែលជួយជំរុញអាមេរិកនៅអាស៊ី
នៅថ្ងៃអាទិត្យទី ១០កក្កដា២០២២នេះ សហរដ្ឋអាមេរិកនិងថៃ បានចុះកិច្ចព្រមព្រៀងពង្រឹងពង្រីកទំនាក់ទំនាក់រវាងប្រទេសទាំងពីរ ដែលរឹងមាំស្រេចទៅហើយ ឱ្យកាន់តែរឹងមាំបន្ថែមទៀត។ លោកប្រមុខការទូតអាមេរិក លោក អង់តូនី ប្លីងកិន ថែមទាំងបានស្វាគមថៃ ដែលបានដើរតួនាទីជួយអាមេរិកនៅក្នុងអាស៊ីអាគ្នេយ៍ដែលជាតំបន់ដ៏គន្លឹះក្នុងការប្រកួតប្រជែងជាមួយចិន។ ក្នុងដំណើរទស្សនកិច្ចនៅទីក្រុងបាងកកនេះ លោករដ្ឋមន្ត្រីការបរទេសអាមេរិក ក៏មានបំណងស្វែងរកគំនិតថ្មីដើម្បីស្តារប្រជាធិបតេយ្យនៅភូមា។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងកិច្ចព្រមព្រៀងពង្រីកចំណងមិត្តភាពថៃ-អាមេរិក រដ្ឋមន្ត្រីការបរទេសប្រទេសទាំងពីរ បានប្តេជ្ញាជំរុញភាពជាដៃគូក្នុងវិស័យអាកាសធាតុ អនុវត្តច្បាប់និងកិច្ចសហប្រតិបត្តិការក្នុងវិស័យសន្តិសុខ ឱ្យបានកាន់វិវឌ្ឍជឿនលឿនឡើង។ បើតាមការគូសបញ្ជាក់របស់លោក អង់តូនី ប្លីងកិន ថៃបានថែមទាំងអនុម័តផែនការសេដ្ឋកិច្ចដឹកនាំដោយអាមេរិកសម្រាប់តំបន់អាស៊ីទៀតផង។ ថៃជាសម្ព័ន្ធមិត្តដ៏ចំណាស់ជាងគេបំផុតរបស់អាមេរិក និងជាដៃគូដ៏សំខាន់ប្រចាំតំបន់ឥណ្ឌូប៉ាស៊ីហ្វិក ដែលក្លាយជាតំបន់ប្រកួតប្រជែងប្រចាំសតវត្សរ៍ទី២១។ តែថៃក៏ជាដៃគូដ៏សំខាន់របស់ចិនដែរ។
រដ្ឋបាលលោកបៃដិន បានបង្កើនកិច្ចខិតខំប្រឹងប្រែង និងប្រឹងរឹតចំណងទំនាក់ទំនងជាមួយតំបន់អាស៊ីប៉ាស៊ីហ្វិកខ្លាំងណាស់ ដើម្បីទប់ទល់ចិនដែលរីកធំធាត់ជាលំដាប់នៅអាស៊ី។ សម្រាប់សហរដ្ឋអាមេរិក ចិនគឺជាគូប្រជែងរបស់អាមេរិក ដ៏ចំបងនៅលើពិភពលោក។ ប៉ុន្តែប្រទេសទាំងពីរទើបបានរកឃើញការសម្រុះសម្រួលគ្នាបន្ធូរបន្ថយភាពតានតឹង នៅថ្ងៃសៅរ៍ម្សិលមិញ ក្នុងជំនួបរវាងលោក អង់តូនី ប្លីងកិន ជាមួយប្រមុខការទូតចិនលោក វ៉ាងយី នៅក្រុងបាលីប្រទេសឥណ្ឌូណេស៊ី។
លោកប្រមុខការទូតអាមេរិក ក៏បានចូលជួបនាយករដ្ឋមន្ត្រីថៃ លោក ប្រាយុទ្ធ ចាន់អូចាផងដែរ ដើម្បីជជែកពិភាក្សាអំពីការពង្រីកកិច្ចសហប្រតិបត្តិការ និងពិសេសអំពីវិបត្តិភូមា។ ក្រោយជួបសន្ទនាជាមួយក្រុមមេដឹកនាំយុវជនភូមានៅទីក្រុងបាងកក លោក អង់តូនី ប្លីងកិន បានអំពាវនាវ នៅចំពោះមុខអ្នកសារព័ត៌មាន ឱ្យក្រុមប្រជាជាតិអាស៊ីអាគ្នេយ៍ (អាស៊ាន) ដាក់សម្ពាធលើរបបសឹកភូមា និងប្រកាសថាចិនមានចំណែកទទួលផលប្រយោជន៍ពីស្តារប្រជាធិបតេយ្យនៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ