អាមេរិកចង់បញ្ចុះបញ្ចូលថៃ ឲ្យដកខ្លួន ឃ្លាតឆ្ងាយពីកូរ៉េខាងជើង
រដ្ឋមន្រ្តីការបរទេសអាមេរិក លោករេច ធីល័រសុន នៅថ្ងៃអង្គារនេះបានធ្វើដំណើរទៅប្រទេសថៃ នៅក្នុងបំណង បញ្ចុះបញ្ចូលរដ្ឋាភិបាលសឹកថៃ ឲ្យកាត់បន្ថយទំនាក់ទំនងពាណិជ្ជកម្មជាមួយកូរ៉េខាងជើង។ ទស្សនកិច្ចមួយថ្ងៃនៅទីក្រុងបាងកក របស់ប្រមុខការទូតអាមេរិក ធ្វើឡើង នៅក្រោយពេលអាមេរិកទាមទារបានសម្រេច ឲ្យក្រុមប្រឹក្សាសន្តិសុខអង្គការសហប្រជាជាតិ ដាក់ទណ្ឌកម្មលើកទី៧ លើកូរ៉េខាងជើង។
ចុះផ្សាយនៅថ្ងៃ៖
ចាប់តាំងពីយោធាធ្វើរដ្ឋប្រហារ ចូលដឹកនាំប្រទេសថៃ នៅឆ្នាំ ២០១៤ នេះជាលើកទី១ ដែលមន្រ្តីជាន់ខ្ពស់របស់អាមេរិក ធ្វើដំណើរទស្សនកិច្ចទៅប្រទេសថៃ។ គោលដៅចំបងនៃទស្សនកិច្ចរបស់ប្រមុខការបរទេសអាមេរិកនៅទីក្រុងបាងកក គឺបញ្ចុះបញ្ចូលឲ្យរដ្ឋាភិបាលសឹកថៃ ឈប់ធ្វើជំនួញ ពាណិជ្ជកម្ម តទៅទៀតជាមួយកូរ៉េខាងជើង។ កូរ៉េខាងជើងដែលទើបរងការដាក់ទណ្ឌកម្មលើកទី ៧ ពីក្រុមប្រឹក្សាសន្តិសុខ អង្គការសហប្រជាជាតិ នៅក្រោយ ការបាញ់សាកល្បង ជាលើកទី២ មីស៊ីលបាលីស្ទីកអន្តរទ្វីបនៅខែកក្កដាកន្លងទៅ។ តាមអាមេរិក ទណ្ឌកម្មសេដ្ឋកិច្ច លើកនេះ របស់ក្រុមប្រឹក្សាសន្តិសុខ នឹងអាចធ្វើឲ្យកូរ៉េខាងជើង ក្នុងមួយឆ្នាំ បាត់បង់ទឹកប្រាក់ ប្រមាណ ១ពាន់លានដុល្លារ។
រដ្ឋមន្រ្តីការបរទេសអាមេរិកមានហេតុផលដែលត្រូវទៅបញ្ចុះបញ្ចូលរដ្ឋាភិបាលថៃ ក្នុងរឿងដាក់សម្ពាធលើកូរ៉េខាងជើង ព្រោះថា ថៃដែលជាសម្ព័ន្ធមិត្តចាស់ឆ្នាំរបស់អាមេរិក នៅតែបន្តមានទំនាក់ទំនង ការទូត និងពាណិជ្ជកម្មទូលំទូលាយជាមួយរបបកុម្មុយនិស្តព្យុងយ៉ាង។ Susan Thornton មន្រ្តីការទូតអាមេរិកដែលធ្វើដំណើរអម លោករេច ធីល័រសុន បាននិយាយប្រាប់អ្នកកាសែត នៅថ្ងៃនេះ ថា អាមេរិក កំពុងបារម្ភកាន់តែខ្លាំង ដែលឃើញ ក្រុមហ៊ុននាំចេញ និងនាំចូល របស់កូរ៉េខាងជើង យកទីក្រុងបាងកកធ្វើជាមជ្ឈមណ្ឌលពាណិជ្ជកម្ម នៅក្នុងតំបន់។
តាមក្រសួងការបរទេសថៃ ការដោះដូរពាណិជ្ជកម្មរវាងថៃ និងកូរ៉េខាងជើង មានចំនួនទឹកប្រាក់ ១២៦លានដុល្លារ នៅឆ្នាំ ២០១៤ ពោល គឺកើនឡើង ៣ដង បើប្រៀបធៀបនឹងឆ្នាំ ២០០៩។ ជាផ្លូវការ កូរ៉េខាងជើង នាំចេញ គ្រឿងអគ្គិសនី និងផលិតផលគីមី ទៅលក់នៅប្រទេសថៃ។ ផ្ទុយមកវិញ ថៃ នាំចេញ ស្ក ត្រី និងកៅស៊ូ ទៅកូរ៉េខាងជើង។
តាមមន្រ្តីអាមេរិក នៅប្រទេសថៃ លោករេច ធីល័រសុននឹងបញ្ចុះបញ្ចូលឲ្យរដ្ឋាភិបាលសឹកថៃ បិទទ្វារក្រុមហ៊ុនកូរ៉េខាងជើងទាំងនោះ ក្នុងគោលដៅ បិទខ្ទប់ទាំងស្រុង ប្រភពចំណូល របស់ក្រុងព្យុងយ៉ាង។ ដើម្បីចាប់គាប បន្ថែម លើកូរ៉េខាងជើង សហរដ្ឋអាមេរិកនឹងទាមទារផងដែរ ឲ្យទីក្រុងបាងកក រឹតបន្តឹង លើការផ្តល់ទិដ្ឋាការដល់ជនជាតិកូរ៉េខាងជើង ដែលរហូតមកដល់នេះ មានលក្ខណៈធូររលុង ពីសំណាក់អាជ្ញាធរថៃ។ រឹតបន្តឹងលើជនជាតិកូរ៉េខាងជើងជាទូទៅ ប៉ុន្តែ លើកលែង ចំពោះជនជាតិកូរ៉េខាងជើង ដែលបានរត់ភៀសខ្លួនចេញពី របបផ្តាច់ការកូរ៉េខាងជើង។ នៅក្នុងន័យនេះ អាមេរិកប្រាថ្នាចង់ឲ្យក្រុងបាងកក សណ្តោសប្រណី ដល់ជនភៀសខ្លួនកូរ៉េខាងជើង ដែលបានប្រើប្រាស់ ទឹកដីថៃ បន្ទាប់ពីចិន ឬម៉ាឡេស៊ី ជាកន្លែងឆ្លងកាត់ សំដៅប្រទេសកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ