នូវែលសេឡង់៖ លោក គ្រីស ហិបគិនស៍ ត្រូវតែងតាំងជានាយករដ្ឋមន្ត្រី
នៅប្រទេសនូវែលសេឡង់ រដ្ឋមន្ត្រីទទួលបន្ទុកដោះស្រាយបញ្ហាជំងឺកូវីដ១៩ Chris Hipkins ត្រូវតែងតាំងជានាយករដ្ឋមន្ត្រី។ ការតែងតែបេក្ខភាពនាយករដ្ឋមន្ត្រីថ្មីនេះ គឺធ្វើឡើងតែ ៤៨ ម៉ោងប៉ុណ្ណោះ ក្រោយពីអ្នកស្រី Jacinda Ardern សុំលាឈប់ពីតំណែងនាយករដ្ឋមន្ត្រី ដោយសារតែ «ហត់នឿយខ្សោយកម្លាំង» និង«សុំទុកពេលវេលាមើលថែកូន»។
ចុះផ្សាយនៅថ្ងៃ៖
ស្តាប់ - ០២:០២
មានអាយុ៤៤ឆ្នាំ លោក គ្រីស ហិបគិនស៍ គឺជារដ្ឋមន្ត្រីក្រសួងនគរបាល និងដែលត្រូវគេចាត់ទុកថា ជា«មនុស្សរឹងមាំ» និង«មានសមត្ថភាព»។ ក្នុងអំលុងពេលជំងឺរាតត្បាលសកល គឺរូបលោករដ្ឋមន្ត្រីនេះហើយ ដែលបានទទួលបន្ទុកដោះស្រាយបញ្ហាជំងឺកូវីដ១៩ ដោយប្រើវិធានការតឹងរឹងបិទប្រទេស ទើបនឹងបើកប្រទេសវិញ នៅខែសីហា២០២២ ប៉ុណ្ណោះ។
តាមប្រភពពីមន្ត្រីរបស់បក្សកាន់អំណាច គឺ នៅរសៀលថ្ងៃអាទិត្យ លោក Chris Hipkins ត្រូវតែទទួលការតែងតាំងជា ប្រធានគណបក្សឈ្នះឆ្នោត ជាមុនសិន មុននឹងត្រូវ តែងតាំងជាបន្ទាប់ និងជាផ្លូវការ ឲ្យក្លាយជា នាយករដ្ឋមន្ត្រី ជំនាន់ទី៤១ ដឹកនាំប្រទេសនូវែលសេឡង់។
លោក គ្រីស ហិបគិនស៍ ធ្លាប់ធ្វើជាអ្នកតំណាងរាស្ត្រ ចំនួន ១៤ ឆ្នាំ និងជាទីប្រឹក្សាអតីតនាយករដ្ឋមន្ត្រី Helen Clark ហើយលោកក៏ធ្លាប់ធ្វើជាទីប្រឹក្សាផ្តល់យោបល់ដល់រដ្ឋមន្ត្រីអប់រំ ដល់ទៅពីររូប មុននឹងដល់វេនខ្លួនលោកឡើងកាន់តំណែងរដ្ឋមន្ត្រីអប់រំជាតិនិងសេវាសាធារណៈ។ ជាតំណែងដែលលោកទទួលបន្ទុកកាន់ការងារ បាន ៥ ឆ្នាំ រួចមក លោកក្លាយជារដ្ឋមន្ត្រីក្រសួងនគរបាល។ នៅចំពោះមុខអ្នកសារព័ត៌មាន លោកប្រកាសថា «ខ្លួនជាមនុស្សត្រង់ និងចេះគិតគូរដល់អ្នកដទៃ»។
អ្នកវិភាគនយោបាយម្នាក់នៅនូវែលសេឡង់ ជំនាញខាងសរសេរបទវិចារណកថា ក៏បានរៀបរាប់ដែរថា លោក គ្រីស ហិបគិនស៍ គឺជាមនុស្សឆាប់ទទួលអារម្មណ៍រំភើបឬតក់ស្លុត ជាជនគួរឲ្យរាប់អាន, ជាមនុស្សរឹងប៉ឹង និងមានសមត្ថភាព។ ចំណែកឯ រដ្ឋមន្ត្រីក្រសួងយុត្តិធម៌ Kiri Allan ដែលជាបេក្ខជនប្រកួតប្រជែងតំណែងនាយករដ្ឋមន្ត្រីម្នាក់ដែរ បានទទួលស្គាល់សមត្ថភាពរបស់លោក គ្រីស ហិបគិនស៍ ថាបុគ្គលនេះនឹងក្លាយជា នាយករដ្ឋមន្ត្រីថ្មីដ៏ខ្លាំងអស្ចារ្យ។
នៅវិស័យកីឡា លោក គ្រីស ហិបគិនស៍ ប្រកាសប្រាប់សាធារណជនថា លោកចូលចិត្តជិះកង់ និង ហែលទឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ