របាយការណ៍ថា ក្មេងជំនាន់ក្រោយបារាំងក៏រើសអើងភេទខ្លាំងដែរ
ទោះបីមានការបញ្ជ្រាបព័ត៌មានឱ្យយល់ដឹងអំពីសិទ្ធិស្ត្រី និងការបំផុសចលនាប្រឆាំងនឹងការមាក់ងាយលើស្ត្រី #Metooយ៉ាងណាក្តី ក៏ការរើងអើងភេទបន្តកប់នៅក្នុងផ្នត់គំនិតរបស់យុវជនបារាំង ជាជំនាន់ក្រោយ។ នេះបើតាមរបាយការណ៍របស់ឧត្តមប្រឹក្សាផ្នែកសមភាពបារាំង ដែលជាស្ថាប័នឯករាជ្យ ដោយបានស្នើសុំឱ្យមានចំណាត់ការលើខ្លឹមសារបង្ហោះផ្សាយតាមប្រព័ន្ធឌីជីថល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
គំនិតមាក់ងាយស្ត្រីភេទមិនបានថមថយទេនៅប្រទេសបារាំង។ ផ្ទុយវិញ ការរើងអើងខ្លះមានបូកផ្សំដោយភាពហិង្សាងជាមុនផងសម្រាប់ក្មេងជំនាន់ក្រោយ។ និយាយជារួម របាយការណ៍របស់ឧត្តមប្រឹក្សាសមភាពជាតិ បានសម្គាល់ឃើញថា សង្គមបារាំងនៅតែរើសអើងភេទ ក្នុងគ្រប់សណ្ឋានទាំងអស់ មិនថានៅក្នុងស្ថាប័នសាធារណៈ ឯកជន អាជីព ឬឃោសនាព័ត៌មានទេ ...
មនុស្សទូទៅសុទ្ធតែយល់ដឹងនិងទទួលស្គាល់ថាមានការមាក់ងាយប្រកាន់ភេទ តែដោយជាក់ស្តែង ពួកគេពិសេសបុរសតែម្តងមិនខ្វល់ឡើយ។ នេះបើតាមរបាយការណ៍ដដែល ដែលមានតួលេខផ្លូវការជាបង្អែក បញ្ជាក់ថាស្ត្រីចំនួន៨០%បានអះអាងមានអារម្មណ៍រងការមាក់ងាយព្រោះខ្លួនជាស្រី។ ១៤%បានរងបៀតបៀនផ្លូវភេទ ៣៧%បានរងការបង្ខំឱ្យរួមរក្ស ដោយគ្មានការការពារ ដោយឥទ្ធិពលស្រាឬគ្រឿងញៀន។ ដោយហេតុខ្លាចគេមើលងាយ ស្រ្តីភាគច្រើន (៩លើ១០) បង្ខំចិត្តបោះបង់សិទ្ធិរបស់ខ្លួន ដូចជាពាក់កណ្តាលមិនហ៊ានចេញក្រៅ ឬធ្វើសកម្មភាពម្នាក់ឯង ឬ ស្លៀកពាក់តាមចិត្តចង់។ ៨លើ១០នាក់មិនហ៊ានចូលផ្ទះម្នាក់ឯងនៅពេលយប់។
ចំណែកខាងបុរសវិញ ពួកគេមិនគិតថាខ្លួនជាដើមហេតុនៃការមើលស្រាលស្ត្រីភេទទេ ។ ថាបុរសចំណាស់លើសពី៦៥ឆ្នាំចុះ នៅសល់កំអែលគំនិតអភិរក្សនិយមខ្លាំងចំពោះតួនាទីខ្លួនជាប្រុស តែក្មេងជំនាន់ក្រោយអាយុក្រោម៣៥ឆ្នាំ ដល់ទៅមួយភាគបួន យល់ថាពេលខ្លះប្រុសត្រូវប្រើអំពើហិង្សាទើបគេខ្លាច។ នៅក្នុងរបាយការណ៍ ឧត្តមប្រឹក្សាសមភាពបារាំង ព្រួយបារម្ភកាន់តែខ្លាំងបន្ថែមទៀត ចំពោះបាតុភូតវាយប្រហារបែបបុរសនិយមអនឡាញ លើបណ្តាញសង្គមដើម្បីបំបិទមាត់ស្ត្រី ឬបំបាក់ស្ត្រី តាមរយៈអំពើហិង្សា អំពើអាសអាភាសផ្លូវភេទ... ការរើសអើងស្រ្តីធម្មតា ទៅជាការរើសអើងយ៉ាងហិង្សា ដែលអាជ្ញាធរត្រូវមានសកម្មភាព អប់រំទ្រង់ទ្រាយធំតាំងពីក្មេង និងចាត់វិធានការគ្រប់គ្រងប្រព័ន្ធអ៊ីនធ័រនែត។ នេះបើតាមសំណើរបស់លោកស្រី ស៊ីលវី ព្យ៉ែរប្រូសូឡែត ប្រធានឧត្តមប្រឹក្សាសមភាពបារាំង ដែលត្រូវចូលជួបលោកប្រធានាធិបតីអេម៉ាណុយអែល ម៉ាក្រុង នៅថ្ងៃពុធ ទី២៥មករា ទិវាប្រយុទ្ធប្រឆាំងនឹងការប្រកាន់ភេទ ដើម្បីផ្តល់អនុសាសន៍ឱ្យបង្កើត អាជ្ញាធរឯករាជ្យជាន់ខ្ពស់ប្រយុទ្ធប្រឆាំងនឹងអំពើហិង្សាប្រកាន់ភេទក្នុងជួរនយោបាយ ព្រមទាំងផ្តល់មធ្យោបាយហិរញ្ញវត្ថុនិងកម្លាំងមនុស្សសម្រាប់ទទួលបន្ទុកដោះស្រាយអំពើហិង្សាក្នុងគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ