ទិវាសិទ្ធិនារីអន្តរជាតិ៖អឺរ៉ុបអនុម័តទណ្ឌកម្មប្រឆាំងនឹងអំពើហិង្សាផ្លូវភេទ និងការរំលោភសិទ្ធិស្រ្តី
ថ្ងៃអង្គារ ទី៧ មីនា ពោលមួយថ្ងៃមុនទិវានារីអន្តរជាតិ ៨ មីនា សហភាពអឺរ៉ុបបានអនុម័តទណ្ឌកម្មប្រឆាំងបុគ្គល និងអង្គភាពណាដែលមានជាប់ពាក់ព័ន្ធនឹងអំពើហិង្សាផ្លូវភេទ និងការរំលោភសិទ្ធិស្រ្តី។ នៅក្នុងជំហានដំបូង មាន ៦ប្រទេសបានជាប់ក្នុងបញ្ជីទណ្ឌកម្មរបស់សហភាពអឺរ៉ុប គឺអាហ្វហ្កានីស្ថាន អ៊ីរ៉ង់ រុស្ស៊ី ស៊ូដង់ខាងត្បូង ស៊ីរី និងប្រទេសភូមា។ តែសហភាពអឺរ៉ុបមិនភ្លេចបញ្ជាក់ពីការបន្ថែមប្រទេសផ្សេងទៀតទៅក្នុងបញ្ជីទណ្ឌកម្មរបស់ខ្លួនទេ។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងប្រទេសអាហ្វហ្កានីស្ថាន អ្នកដឹកនាំក្នុងរដ្ឋាភិបាលលីបង់ចំនួនពីរនាក់បានជាប់ក្នុងបញ្ជីទណ្ឌកម្មបង្កកទ្រព្យសម្បតិ្តពីសហភាពអឺរ៉ុប គឺរដ្ឋមន្រ្តីក្រសួងអប់រំ និងរដ្ឋមន្រ្តីទទួលបន្ទុកផ្សព្វផ្សាយគុណធម៌ និងបង្ការ។ នៅក្នុងប្រទេសរុស្ស៊ី ទណ្ឌកម្មរបស់សហភាពអឺរ៉ុបបានដាក់សំដៅលើអ្នកទទួលខុសត្រូវប៉ូលីសចំនួន ២នាក់ និងអ្នកទទួលខុសត្រូវជាន់ខ្ពស់យោធាចំនួន ២នាក់។ អ្នកទទួលខុសត្រូវប៉ូលីសទាំងពីរនាក់បានជាប់ចោទពីបទចាប់មនុស្សដោយបំពាន និងការធ្វើទារុណកម្មលើបាតុករដែលប្រឆាំងសង្គ្រាម។ ចំណែកអ្នកទទួលខុសត្រូវជាន់ខ្ពស់យោធាទាំងពីរនាក់បានជាប់ចោទក្នុងបទអំពើហិង្សាផ្លូវភេទ និងរំលោភប្រព្រឹត្តិដោយកូនទាហានរបស់ខ្លួននៅអ៊ុយក្រែនក្នុងខែមីនា និងមេសាឆ្នាំ ២០២២។
នៅស៊ូដង់ខាងត្បូង មេកងស្វាយត្រានគាំទ្ររដ្ឋាភិបាលចំនួនពីរនាក់បានជាប់ចោទពីបទប្រើអំពើហិង្សាផ្លូវភេទជាប់ជាប្រចាំដូចជាតាក់តិកសង្រ្គាម។ នៅក្នុងប្រទេសភូមា មានអនុរដ្ឋមន្ត្រីមហាផ្ទៃ និងមជ្ឈមណ្ឌលឃុំឃាំង សួរចម្លើយចំនួនពីរកន្លែងបានស្ថិតក្នុងបញ្ជីទណ្ឌកម្មអឺរ៉ុប។ អនុរដ្ឋមន្ត្រីមហាផ្ទៃបានជាប់ចោទពីបទអនុញ្ញាតឱ្យបុគ្គលិកសន្តិសុខយោធាក្រោមអំណាចរបស់ខ្លួនប្រើវិធីចាប់សម្រាតដោយបង្ខំ ការរំលោភ ការឆក់អគ្គិសនី ការដុតប្រដាប់ផ្លូវភេទ និងការប្រើហិង្សាហួសហេតុទៅលើបុរស ស្រ្តីកំពុងជាប់ឃុំ និងក្នុងពេលសួរចម្លើយ ពិសេសសមាជិកនៃសមាគមអ្នកស្រឡាញ់ភេទដូចគ្នា។
ករណីដាក់ទណ្ឌកម្មលើមន្ទីរឃុំឃាំងក៏មាននៅអ៊ីរ៉ង់ ពិសេសមន្ទីរឃុំឃាំងសម្រាប់ស្រ្តីដែលអ្នកទោសត្រូវបានក្រុមឆ្មាំគុកចាប់រំលោភ ឬគំរាមរំលោភដើម្បីទទួលបានចម្លើយសារភាព។ លោកវ៉ូក័រ ហុកស្រ្តា រដ្ឋមន្រ្តីការបរទេសហូឡង់បានគូសបញ្ជាក់ថា តាមរយៈការដាក់ទណ្ឌកម្មនេះ សហភាពអឺរ៉ុបចង់បញ្ជូនសារទៅកាន់ជនដៃដល់ផង និងជនរងគ្រោះផង។ សារសម្រាប់ជនដៃដល់គឺថា ឧក្រិដ្ឋកម្មរបស់ពួកគេនឹងមិនអាចគ្មានទោសឡើយ ហើយសារសម្រាប់ជនរងគ្រោះគឺថា សហភាពះអឺរ៉ុបនឹងការពារ គាំទ្រ ទោះជនរងគ្រោះនៅទីណាក៏ដោយក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ