បារាំងរងការរិះគន់នៅអង្គការសហប្រជាជាតិ រឿងប៉ូលិសរើសអើងពូជសាសន៍និងប្រើអំពើហិង្សា
សមាជិកអង្គការសហប្រជាជាតិទាំង១៩៣ប្រទេស តែងជួបជុំគ្នា ជារឿយៗ ដើម្បីពិនិត្យមើលស្ថានភាពសិទ្ធិមនុស្សនៅក្នុងប្រទេសនីមួយហើយផ្តល់អនុសាសន៍ឱ្យគ្នា។ នៅថ្ងៃចន្ទទី ១ឧសភានេះ ប្រទេសបារាំងរងការរិះគន់ខ្លាំងជាងគេ។ ប្រឆាំងអន្តោប្រវេសន៍ ធ្វើប្រតិបត្តិការឆែកឆេរអាស្រ័យលើរូបរាងពណ៌សម្បុរ ប៉ូលិសប្រើអំពើហិង្សា ... ទាំងនេះសុទ្ធសឹងជាពាក្យរិះគន់ បារាំង ដែលកំពុងលាន់ឮពេញអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ប្រទេសជាច្រើន រាប់ទាំងសហរដ្ឋអាមេរិក ព្រមទាំងទុយនីស៊ីផង បានចេញសេចក្តីអំពាវនាវឱ្យបារាំងបង្កើនការប្រឹងប្រែងប្រយុទ្ធប្រឆាំង នឹងអំពើឧក្រិដ្ឋ ឬអំពើហិង្សាដោយហេតុតែការស្អប់ខ្ពើមសាសនា (អ៊ីស្លាម) ប្រកាន់ពូជសាសន៍ (ពូជជ្វីហ្វ)។ កងកម្លាំងរក្សាសណ្តាប់ធ្នាប់និងសន្តិសុខមិនគួរណាធ្វើប្រតិបត្តិការដោយរើសមុខរើសអត្តសញ្ញាណទេ។ នេះជាសំដីថ្ងូចថ្ងូររបស់ប្រេស៊ីលនិងជប៉ុន។ ឯអាហ្វ្រិកខាងត្បូង បានស្នើសុំឱ្យបារាំងចាត់វិធានការយ៉ាងណាធានាឱ្យមានការអង្កេតឯករាជ្យ នៅពេលប៉ូលិសមានពាក់ព័ន្ធនឹងករណីរើងអើងប្រកាន់ពូជសាសន៍។
ក្រុមប្រទេសនៅអឺរ៉ុប ដូចយ៉ាង ស៊ុយអែត ន័រវែស និងដាណឺម៉ាក លុចសំបួរ ចាប់អារម្មណ៍ជាពិសេសនឹងអំពើហិង្សាប៉ូលិសក្នុងប្រតិបត្តិការរក្សាសណ្តាប់ធ្នាប់ ពេលមានបាតុកម្មម្តងៗ ដោយជំរុញឱ្យបារាំងគិតគូរមើលនយោបាយរក្សាសណ្តាប់ធ្នាប់សង្គមឡើងវិញ ឬត្រូវតែដាក់ទុកអ្នកទទួលខុសត្រូវ។ នេះបើតាមសំណើរបស់ម៉ាឡេស៊ី។
រុស្ស៊ី វេណេស៊ុយអេឡា និងអ៊ីរ៉ង់ ដែលធ្លាប់ត្រូវអង្គការសហប្រជាជាតិ និងអង្គការការពារសិទ្ធិមនុស្ស ថ្កោលទោសជាញឹកញយពីបទរំលោភសិទ្ធិមនុស្សយ៉ាងធ្ងន់ធ្ងរ ក៏បានបន្ទោសបារាំងរឿងប៉ូលិសប្រើអំពើហិង្សាដែរ ដោយយល់ថាបារាំងប្រើវិធានការតឹងនិងជួនហិង្សាក្នុងការបំបែកបាតុករសន្តិនិយម។
ពាក្យរិះគន់ក៏មានលាន់ឮកាន់តែច្រើនដែរនៅក្នុងប្រទេសជុំវិញការប្រើកម្លាំងហួសហេតុរបស់កងកម្លាំងមានសមត្ថិកិច្ច។ តំណាងរដ្ឋាភិបាលតែងអះអាងជានិច្ចថា ការប្រើកម្លាំងស្ថិតក្រោមត្រួតពិនិត្យយ៉ាងហ្មត់ចត់បំផុត ឱ្យតែខុសនឹងមានការពិន័យភ្លាម។ ប៉ុន្តែនៅចំពោះមុខអង្គការសហប្រជាជាតិ ប្រតិភូបារាំង មិនឆ្លើយតបទៅនឹងពាក្យរិះគន់ទេ តែបានប្រៀបប្រដូច ការរើសអើងពូជសាសន៍និងការស្អប់ខ្ពើមពូជជ្វីហ្វ ថាជាថ្នាំពុល សម្រាប់របបសាធារណរដ្ឋ។
ក្រៅអំពីរងការរិះគន់ជុំវិញអំពើហិង្សាប៉ូលិស រដ្ឋជាច្រើនផ្សេងទៀត ក៏បានជំរុញឱ្យបារាំងគិតគូរការពារសិទ្ធិស្ត្រី នៅចំពោះមុខអំពើហិង្សាក្នុងគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ