កម្រិតចំនួននៃការចាក់វ៉ាក់សាំងកុមារ បានកើនឡើងវិញក្នុងឆ្នាំ២០២២ ក្រោយចប់វិបត្តិកូវីដ១៩
ការចាក់វ៉ាក់សាំងកុមារ នៅទូទាំងពិភពលោក បានចាប់ផ្តើមកើនឡើង ឡើងវិញហើយ។ នេះបើផ្អែកតាមតួលេខ ផ្សាយដោយអង្គការសុខភាពពិភពលោក នៅថ្ងៃអង្គារទី១៨កក្កដានេះ។ បើប្រៀបធៀបទៅឆ្នាំ២០២១ ក្នុងឆ្នាំ២០២២កន្លងទៅ ចំនួនកុមារដែលបានទទួលការចាក់វ៉ាក់សាំង បានកើនឡើងប្រមាណ៤លាននាក់។ តែយ៉ាងណា យោងតាមអ្នកជំនាញ កម្រិតកើនឡើងនៃការចាក់វ៉ាក់សាំងកុមារនេះ គឺមានគំលាយគ្នារវាងប្រទេសនីមួយៗ ហើយក៏នៅមិនទាន់ដល់កម្រិតខ្ពស់ ស្មើនឹងពេល មុនមានវិបត្តិកូវីដ១៩ដែរ។
ចុះផ្សាយនៅថ្ងៃ៖
ស្តាប់ - ០២:២២
លោកអគ្គលេខាធិការអង្គការសុខភាពពិភពលោក បានលើកឡើងថា តួលេខចុងក្រោយនេះ គួរជាទីត្រេកអរណាស់ ដែលការចាក់វ៉ាក់សាំងបង្ការនានា ទៅលើកុមារ បានមានសន្ទុះឡើងវិញ បន្ទាប់ពីវិបត្តិកូវីដ១៩បានចប់។ ឆ្នាំ២០២១ យ៉ាងហោចណាស់ កុមារចំនួន២៤លាន៤សែននាក់ មិនបានទទួលការចាក់វ៉ាក់សាំងទេ។ តែនៅឆ្នាំ២០២២ ចំនួននេះ បានថយចុះ មកត្រឹម២០លាន៥សែននាក់។ មានន័យថា មានកុមារចំនួនប្រមាណ៤លាននាក់បន្ថែមទៀត ដែលបានទទួលការចាក់វ៉ាក់សាំង។
លោកស្រី Kate O’Brien មន្ត្រីទទួលបន្ទុកផ្នែកវ៉ាក់សាំងបង្ការ នៃអង្គការសុខភាពពិភពលោក បានលើកឡើងថា តួលេខកើនឡើងនេះ គឺជាដំណឹងល្អ និងជំរុញទឹកចិត្តឲ្យប្រឹងប្រែងបន្ថែមទៀត នៅក្នុងយុទ្ធនាការចាក់វ៉ាក់សាំងកុមារ។ តែយ៉ាងណា លោកស្រីទទួលស្គាល់ថា វានៅតែមានកម្រិតទាបជាងកម្រិតមុនមានវិបត្តិកូវីដ១៩ ពោលគឺកាលពីមុនមានកូវីដ១៩ ជាមធ្យមមានកុមារប្រមាណ១៨លាន៤សែននាក់ ដែលមិនបានទទួលការចាក់វ៉ាក់សាំង។
ជាងនេះទៀត ការស្ទុះឡើងវិញនៃការចាក់វ៉ាក់សាំងកុមារនេះ គឺមានភាពមិនស្មើគ្នាទេ នៅទូទាំងពិភពលោក។ លោកស្រីបញ្ជាក់ថា យោងតាមតួលេខ ប្រទេសអ្នកមានជាទូទៅ បានស្ទុះឡើងលឿនជាងប្រទេសក្រីក្រ នៅក្នុងការត្រលប់ទៅអនុវត្តយុទ្ធនាការចាក់វ៉ាក់សាំងកុមារវិញ បន្ទាប់ពីចប់វិបត្តិកូវីដ១៩។ ដោយឡែក ប្រទេសកំពុងអភិវឌ្ឍន៍ខ្លះ ដែលមានផ្ទៃដីធំ និងប្រជាជនច្រើន តួយ៉ាង ដូចជាឥណ្ឌា និងឥណ្ឌូណេស៊ី ជាដើម ក៏បានចាប់ផ្តើមចាក់វ៉ាក់សាំងកុមារបានច្រើនឡើងវិញដែរ ក្នុងឆ្នាំ២០២២កន្លងទៅ។ ចំណុចវិជ្ជមាននេះ គឺដោយសារ រដ្ឋាភិបាលប្រទេសទាំងនេះ មានយន្តការ និងគោលនយោបាយជាអាចិន្ត្រៃយ៍ ក្នុងការចាក់វ៉ាក់សាំងកុមារ តាំងតែពីមុនមានវិបត្តិកូវីដ១៩ម្លេះ តួយ៉ាងដូចជាបង់ក្លាដែស ណេប៉ាល់ និងកេនយ៉ា ជាដើម។
ដោយឡែក លោកស្រី Kate O’Brien បានថ្លែងការបារម្ភថា មានចំណុចមួយដែលធ្វើឲ្យនៅតែភ័យព្រួយ គឺកម្រិតចំនួនចាក់វ៉ាក់សាំងជម្ងឺកញ្ជ្រិល ដែលហាក់ដូចជាមិនស្ទុះឡើងទាល់តែសោះ។ ជម្ងឺកញ្ជ្រិលគឺជាជម្ងឺឆ្លង ដ៏គ្រោះថ្នាក់បំផុតសម្រាប់កុមារ។ ឆ្នាំ២០១៩ កម្រិតចាក់វ៉ាក់សាំងជម្ងឺកញ្ជ្រិល មានចំនួន៨៦% តែឆ្នាំ២០២១ បានធ្លាក់មកនៅ៨១% ហើយបានឡើងបន្តិចបណ្ណោះ នៅឆ្នាំ២០២២ មកត្រឹម៨៣%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ