ស្លូវ៉ាគី៖ គណបក្សមានទំនោរគាំទ្ររុស្ស៊ី ឈ្នះឆ្នោត ឈានទៅបង្កើតរដ្ឋាភិបាលចម្រុះ
ថ្ងៃចន្ទទី២តុលា បណ្តាសារព័ត៌មានអឺរ៉ុបបានចុះផ្សាយព្រោងព្រាត ដោយបង្ហាញការព្រួយបារម្ភទាក់ទិនប្រទេសស្លូវ៉ាគី ដែលអាចនឹងធ្លាក់ចូលទៅក្នុងដៃគ្រប់គ្រងអំណាច របស់ក្រុមស្តាំនិយមជ្រុល ដែលមានទំនោរគាំទ្ររុស្ស៊ី ហើយប្រឆាំងនឹងអឺរ៉ុប។ យោងតាមលទ្ធផលបណ្តោះអាសន្ន នៃការបោះឆ្នោតសភាមុនអាណត្តិ កាលពីថ្ងៃអាទិត្យទី១តុលា គឺគណបក្សស្តាំនិយមជ្រុលរបស់លោក Robert Fico បានទទួលសំឡេងឆ្នោតនាំមុខគេ ប្រមាណ២៣% ខណៈគណបក្សកណ្តាលសេរីនិយមស្លូវ៉ាគី បានទទួលត្រឹម១៨%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
យោងតាមលទ្ធផលនេះ គណបក្ស Smer-SD របស់លោក Robert Fico ដែលគេស្គាល់ថាជាអ្នកគោរពស្រឡាញ់លោកពូទីននោះ បានទទួលអាសនៈចំនួន ៤២ ក្នុងចំណោម១៥០នៃសភាជាតិស្លូវ៉ាគី ខណៈបក្សកណ្តាលសេរីនិយម ទំនោរទៅខាងអឺរ៉ុបបានទទួល៣២អាសនៈ។ លោកស្រី Suzana Caputova ប្រធានាធិបតីស្លូវ៉ាគី បានប្រកាសកាលពីល្ងាចថ្ងៃអាទិត្យថា លោកស្រីនឹងប្រគល់តួនាទីជូនលោក Robert Fico ដើម្បីរៀបចំ បង្កើតរដ្ឋាភិបាលចម្រុះ ដោយគោរពទៅតាមរដ្ឋធម្មនុញ្ញ។
សូមបញ្ជាក់ថា លោក Robert Fico មានអាយុ៥៩ឆ្នាំ ធ្លាប់ជាអតីតនាយករដ្ឋមន្ត្រីស្លូវ៉ាគី គឺជាអ្នកនយោបាយមាត់ឆៅរិះគន់អឺរ៉ុបមិនសំចៃមាត់។ ក្រៅពីមានទំនោរគាំទ្រលោកពូទីន និងរុស្ស៊ី លោកម្នាក់នេះ ធ្លាប់បានប្រកាសថា នៅពេលលោកត្រលប់មកកាន់អំណាចវិញ លោកនឹងបញ្ឈប់មិនឲ្យស្លូវ៉ាគី បញ្ជូនគ្រាប់កាំភ្លើងទៅជួយអ៊ុយក្រែន សូម្បីតែមួយគ្រាប់។ លោក Robert Fico អះអាងថា ស្លូវ៉ាគីមានបញ្ហាធំៗផ្សេងទៀត ដែលត្រូវដោះស្រាយ សំខាន់ជាងរឿងសង្គ្រាមនៅអ៊ុយក្រែន។
គួរបញ្ជាក់ថា ផ្អែកតាមការវិភាគជាច្រើន បានឲ្យដឹងថា រដ្ឋាភិបាលថ្មីដែលនឹងដឹកនាំដោយ លោក Robert Fico នឹងធ្វើឲ្យប្រែប្រួលទាំងស្រុង ដល់គោលនយោបាយការបរទេសរបស់ស្លូវ៉ាគី។ ពោលគឺស្លូវ៉ាគី អាចដឹងឈានក្លាយដូចហុងគ្រី ដែលមានជំហរប្រឆាំងនឹងសមាហរណ្ណកម្មរួមក្នុងសហភាពអឺរ៉ុប។ ការសម្រេចនានាក្នុងក្របខណ្ឌអឺរ៉ុប ដែលត្រូវការសំឡេងជាឯកច្ឆ័ន្ទ តួយ៉ាងនៅក្នុងផែនការជួយទំនុកបំរុងអ៊ុយក្រែនជាដើមនោះ គឺនឹងត្រូវរាំងស្ទះជាក់ជាមិនខាន ដោយសារតែគោលជំហររឹងរូសរបស់រដ្ឋាភិបាលថ្មីស្លូវ៉ាគី ។
យ៉ាងណាក៏ដោយ នៅថ្ងៃចន្ទ ទី២តុលា លោក ឌីមីទ្រី គូឡេបា ប្រមុខការទូតអ៊ុយក្រែន បានលើកឡើងថា អ៊ុយក្រែនគោរពការសម្រេចចិត្តរបស់ប្រជាជនស្លូវ៉ាគី ដែលបានសំដែងមតិតាមសន្លឹកឆ្នោត ជ្រើសរើសគណបក្សស្តាំនិយមជ្រុលរបស់លោក Robert Fico។ តែយ៉ាងណាក៏ដោយ លោករដ្ឋមន្ត្រីការបរទសអ៊ុយក្រែន បានបញ្ជាក់ថា សម្រាប់ពេលនេះ គេត្រូវរងចាំមើលសមាសភាពជាក់ស្តែង នៃរដ្ឋាភិបាលចម្រុះស្លូវ៉ាគីជាមុនសិន ដើម្បីអាចប៉ាន់ស្មានបាន ថាវាជះឥទ្ធិពលអាក្រក់កម្រិតណា មកលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ