OMS/WHO សម្រេចអនុញ្ញាត វ៉ាក់សាំងបង្ការជំងឺគ្រុនចាញ់ មួយប្រភេទទៀតសម្រាប់កុមារ
អង្គការសុខភាពពិភពលោក ទើបតែបានសម្រេចអនុញ្ញាត ឲ្យផលិតលក់និងចែកចាយ វ៉ាក់សាំងបង្ការមួយប្រភេទទៀត ប្រឆាំងនឹងជំងឺគ្រុនចាញ់ សម្រាប់ចាក់ទៅលើកុមារ។ វ៉ាក់សាំងប្រភេទថ្មីនេះ មានឈ្មោះថា R21/Matrix-M ដែលត្រូវបានក្រុមអ្នកជំនាញឱសថនៃអង្គការសុខភាពពិភពលោក ទទួលស្គាល់ថា មានប្រសិទ្ធភាពខ្ពស់ និងគួរឲ្យទុកចិត្តបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥១
លោកប្រធានអង្គការសុខភាពពិភពលោក បានថ្លែងទៅកាន់អ្នកកាសែតថា ក្នុងនាមលោកជាអ្នកស្រាវជ្រាវម្នាក់ជំនាញជំងឺគ្រុនចាញ់ លោកធ្លាប់សុបិនជាយូរមកហើយ ចង់បាននូវថ្នាំវ៉ាក់សាំងបង្ការមួយ ដែលមានប្រសិទ្ធភាពនិងគួរជាទីទុកចិត្ត ដើម្បីជួយស្រោចស្រង់ជីវិតកុមារ។ ឥឡូវពេលនេះ សុបិនក្លាយជាការពិតហើយ ហើយមិនមែនវ៉ាក់សាំងតែមួយទេ គឺមានដល់ទៅ២។
ផ្អែកតាមក្រុមជំនាញផ្នែកវ៉ាក់សាំង និងក្រុមប្រឹក្សាគោលនយោបាយប្រយុទ្ធប្រឆាំងជំងឺគ្រុនចាញ់ នៃអង្គការសុខភាពពិភពលោក គឺគេផ្តល់អនុសាសាន៍ឲ្យចាក់វ៉ាក់សាំងប្រភេទទី២នេះ ទៅលើកុមារ ដើម្បីកាត់បន្ថយហានិភ័យប្រឈមនឹងការឆ្លងជំងឺគ្រុនចាញ់។ លោកស្រីវេជ្ជបណ្ឌិត Kate O’Brien ប្រធានផ្នែកវ៉ាក់សាំងនៃអង្គការសុខភាពពិភពលោក បញ្ជាក់ថា អ្នកជំនាញមួយក្រុមទៀត កំពុងតែធ្វើការវាយតម្លៃ លើដំណើរការផលិត និងបទដ្ឋានស្តង់ដារ នៃវ៉ាក់សាំងថ្មីនេះ។ នៅពេលរួចរាល់ហើយ អង្គការUnicef និង សម្ព័ន្ធភាពវ៉ាក់សាំង (GAVI) អាចនឹងចាប់ផ្តើមប្រើប្រាស់វ៉ាក់សាំងនេះទៅលើកុមារ។ ចំណែកការផលិតវ៉ាក់សាំង នឹងត្រូវប្រគល់ទៅឲ្យ Serum Institute of India។ យ៉ាងណាមិញ អាជ្ញាធរសុខាភិបាលហ្កាណា នីហ្សេរីយ៉ា និងបួគីណាហ្វាសូ បានអនុញ្ញាតប្រើប្រាស់វ៉ាក់សាំងថ្មីនេះរួចរាល់ហើយ
សូមបញ្ជាក់ដែរថា កាលពីឆ្នាំ២០២១ អង្គការសុខភាពពិភពលោកបានផ្តល់ការអនុញ្ញាត វ៉ាក់សាំងបង្ការជំងឺគ្រុនចាញ់លើកដំបូងគេបង្អស់ ឈ្មោះ RTS.S ដែលផលិតដោយសហគ្រាសអង់គ្លេស GSK។ ចាប់ពីឆ្នាំ២០១៩មក គេបានចាក់វ៉ាក់សាំង RTS.S ចំនួន១លាន៧សែនដូស នៅប្រទេស៣នៅអាហ្វ្រិក គឺហ្កាណា កេនយ៉ា និងម៉ាឡាវី។
ផ្អែកតាមអ្នកជំនាញ វ៉ាក់សាំងទាំង២នេះ មានប្រសិទ្ធភាពប្រហាក់ប្រហែលគ្នា ពោលគឺខ្ទង់ ៧៥% ប្រសិនបើគេប្រើប្រាស់វាក្នុងលក្ខខណ្ឌដូចគ្នា។ វ៉ាក់សាំងប្រភេទថ្មី មានតម្លៃប្រមាណ ២ ទៅ ៤ដុល្លារ ក្នុងមួយដូស។ អង្គការសុខភាពពិភពលោក បានថ្លែងអបអរចំពោះការបោះជំហានទៅមុខគួរជាទីត្រេកអរ នៅក្នុងវិស័យនេះ ដោយគេរំពឹងថា ពីនេះដល់ឆ្នាំ២០៣០ គេនឹងអាចចាក់វ៉ាក់សាំងប្រឆាំងជំងឺគ្រុនចាញ់ ឲ្យបាន១០០លានដូសក្នុងមួយឆ្នាំ។
គួរបញ្ជាក់ថា ជំងឺគ្រុនចាញ់ជាជំងឺដ៏ចំណាស់មួយ ចម្លងដោយសត្វមូស ដែលអាចបង្កឲ្យមានអាការក្តៅខ្លួនខ្លាំង ឈឺក្បាល និងរងារស្រៀវស្រាញ អាចឈានទៅដល់ករណីស្លាប់ ប្រសិនបើគ្មានការព្យាបាលទាន់ពេលវេលា។ ក្នុងឆ្នាំ២០២១ ជំងឺគ្រុនចាញ់ បានផ្តាច់ជីវិតមនុស្ស យ៉ាងហោច ៦១៩០០០នាក់ នៅទូទាំងពិភពលោក។ បើគិតពីឆ្នាំ២០០០មក គឺចំនួនមនុស្សស្លាប់ដោយជំងឺគ្រុនចាញ់បានចុះថយពាក់កណ្តាល។ តែយ៉ាងណា កុមារនៅអាហ្វ្រិក នៅតែប្រឈមខ្លាំងជាងគេដោយសារជំងឺឆ្លងនេះ។ ផ្អែកតាមលោកស្រីសាស្ត្រាចារ្យ Megan Greichar នៅសកលវិទ្យាល័យCornell សហរដ្ឋអាមេរិក គឺគេមិនអាចប្រយុទ្ធយកឈ្នះជំងឺគ្រុនចាញ់បានដោយងាយទេ ព្រោះថាមេរោគនេះ បានបំប្លែងខ្លួនជាប្រចាំ ធ្វើឲ្យថ្នាំព្យាបាល ឬវ៉ាក់សាំង មិនសូវមានប្រសិទ្ធភាព។
ដោយឡែក ក្រៅពីវ៉ាក់សាំងបង្ការជំងឺគ្រុនចាញ់ប្រភេទថ្មីនេះ អង្គការសុខភាពពិភពលោក ក៏បានទើបតែបានបើកភ្លើងខៀវ អនុញ្ញាតវ៉ាក់សាំងមួយប្រភេទទៀត បង្ការជំងឺគ្រុនឈាម ឈ្មោះ Qdenga សម្រាប់អាយុ ពី៦ទៅ១៦ឆ្នាំ និងវ៉ាក់សាំងបង្ការជំងឺរលាកស្រោមខួរក្បាល ឈ្មោះMen5CV ដែលមានតួនាទី ទៅសម្លាប់បាក់តេរីទាំង៥មុខ ដែលជាអ្នកបង្កឲ្យមានជំងឺរលាកស្រោមខួរក្បាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ