ក្រោយការចាក់សម្លាប់គ្រូបង្រៀនម្នាក់ បារាំងប្រកាសអាសន្នភេរវកម្ម
នៅក្នុងប្រទេសបារាំង រដ្ឋាភិបាលបានប្រកាសដាក់ប្រទេសក្នុងស្ថានភាពអាសន្នភេរវកម្មចាប់ពីថ្ងៃសៅរ៍ ទី១៤ តុលា។ ការប្រកាសនេះបានធ្វើឡើងក្រោយពីមានយុវជនម្នាក់បានប្រើកាំបិតចាក់សម្លាប់គ្រូបង្រៀនម្នាក់នៅក្នុងវិទ្យាល័យមួយនៃខេត្ត Arras ស្ថិតប៉ែកខាងជើងប្រទេសនាព្រឹកថ្ងៃសុក្រ ទី១៣ តុលា។ ប្រធានាធិបតីលោកម៉ាក្រុងដែលអមដំណើរដោយរដ្ឋមន្រ្តីមហាផ្ទៃ និងអប់រំបានធ្វើដំណើរទៅកាន់កន្លែងកើតហេតុ និងបានចាត់ទុកទង្វើសម្លាប់គ្រូបង្រៀនជាអំពើភេរវកម្មអ៊ីស្លាមជ្រុលនិយម។
ចុះផ្សាយនៅថ្ងៃ៖
ស្តាប់ - ០៣:២២
ជាមួយនឹងការប្រកាសដាក់ប្រទេសក្នុងស្ថានភាពអាសន្នភេរវកម្ម រដ្ឋាភិបាលបានដាក់ពង្រាយកម្លាំងទាហានរហូតដល់ ៧ ០០០នាក់នៅទូទាំងប្រទេស នេះជាការប្រកាសរបស់វិមានប្រធានាធិបតីអេលីហ្សេក្នុងថ្ងៃសៅរ៍ ទី១៤ តុលា។ តាមវិមានអេលីហ្សេ ការដាក់ពង្រាយកម្លាំងទាហាននេះនឹងចាប់ផ្តើមពីពេលនេះរហូតដល់យប់ថ្ងៃចន្ទ ទី១៦ តុលា និងរហូតដល់មានការចេញសេចក្តីជូនដំណឹងថ្មី។ គួរបញ្ជាក់ថា កម្លាំងទាហាន ឬហៅកម្លាំងសង់ទីនែលនេះជាកម្លាំងប្រឆាំងភេរវនិយមដែលបារាំងតែងដាក់ពង្រាយនៅពេលប្រទេសស្ថិតក្នុងភាពអាសន្នភេរវកម្ម។
ការពង្រាយកម្លាំងសង់ទីនែលជាថ្មីពេលនេះបានធ្វើឡើង ក្រោយពីមានយុវជនម្នាក់បានប្រើកាំបិតចាក់សម្លាប់គ្រូបង្រៀនម្នាក់ឈ្មោះ Dominique Bernard និងធ្វើឲ្យរបួស ២នាក់ ក្នុងនោះមានម្នាក់ជាគ្រូបង្រៀន និងម្នាក់ទៀតជាភ្នាក់ងារសន្តិសុខក្នុងថ្ងៃសុក្រ ទី១៣ តុលា។ មានអាយុ ៥៧ឆ្នាំ លោក Dominique Bernard ជាគ្រូបង្រៀនភាសាបារាំងនៅវិទ្យាល័យ Gambetta-Carnot ក្នុងខេត្ត Arras ស្ថិតប៉ែកខាងជើងប្រទេស។ ចំណែកខ្មាន់កាំបិតជាយុវជនឈ្មោះ Mohammed Mogouchkov កើតក្នុង ២០០៣ នៅក្នុងប្រទេសរុស្ស៊ី។ ឃាតកររូបនេះបានមករស់នៅក្នុងប្រទេសបារាំងជាមួយគ្រួសារចាប់តាំងពីឆ្នាំ ២០០៨។
មួយវិញទៀត វិទ្យាល័យដែល Mohammed Mogouchkov បានចូលចាក់គ្រូបង្រៀនជាវិទ្យាល័យដែលរូបគេធ្លាប់បានរៀនសូត្រ។ កំណត់សម្គាល់មួយទៀត ឈ្មោះជន Mohammed Mogouchkov មាននៅក្នុងបញ្ជីប៉ូលិសជាជនអ៊ីស្លាមជ្រុលនិយមដែលស្ថិតក្រោមការតាមដាន និងឃ្លាំមើលរបស់ស្ថាប័នស៊ើបការសម្ងាត់។ ប្រធានាធិបតីលោកម៉ាក្រុងដែលបានធ្វើដំណើរទៅកាន់កន្លែងកើតហេតុក្នុងថ្ងៃសុក្រ ទី១៣ តុលាបានចាត់ទុកទង្វើសម្លាប់គ្រូបង្រៀនជាអំពើភេរវកម្មអ៊ីស្លាមជ្រុលនិយម។ ចំណែករដ្ឋមន្រ្តីមហាផ្ទៃលោក Gérald Darmanin បានគូសបញ្ជាក់ថា ទង្វើរបស់ Mohammed Mogouchkov អាចមានជាប់ទាក់ទងនឹងអ្វីដែលកំពុងកើតមាននៅមជ្ឈិបូព៌ា។
ចំណែករដ្ឋមន្រ្តីអប់រំលោក Gabriel Attal បានប្រកាសពីការដាក់ពង្រាយបុគ្គលិកសន្តិសុខចំនួន ១ ០០០នាក់នៅតាមគ្រឹះស្ថានអប់រំទាំងអស់ និងបញ្ជាក់ថា គ្រឹះស្ថានអប់រំទាំង ៥០០កន្លែងនៅទូទាំងប្រទេសបើកទ្វារក្នុងថ្ងៃសៅរ៍ ទី១៤ តុលា។ តាមលោក Attal ពិធីជួបជុំ និងគោរពវិញ្ញាណក្ខន្ទនឹងរៀបចំនៅថ្ងៃចន្ទ ទី១៦ តុលា។ គួររម្លឹកថាការពី ៣ឆ្នាំមុន ពោលក្នុងថ្ងៃទី១៦ តុលា ២០២០ មានគ្រូបង្រៀនប្រវត្តិសាស្រ្តម្នាក់ឈ្មោះ Samuel Paty វ័យ ៤៧ឆ្នាំត្រូវបានជនអ៊ីស្លាមជ្រុលនិយមឈ្មោះ Abdoullakh Anzorov វ័យ ១៨ឆ្នាំសម្លាប់ដោយកាត់ក្បាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ