ការគំរាមកំហែងភេរវកម្ម៖ អាជ្ញាធរបារាំងសន្យាចាប់មនុស្ស ដែលផ្ញើសារកុហកថាមានភេរវកម្មដាក់គ្រាប់បែក
ប៉ុន្មានថ្ងៃចុងក្រោយនេះ នៅបារាំង អាជ្ញាធរបានរឹតបន្តឹងសន្តិសុខយ៉ាងខ្លាំង ដោយខ្លាចក្រែងមានការវាយប្រហារភេរវកម្ម។ ទន្ទឹមគ្នានេះ មានការផ្ញើសារបោកប្រាស់កុហកជាញឹកញាប់ ពីជនអនាមិក ថាមានការដាក់គ្រាប់បែកធ្វើភេរវកម្ម នៅតាមទីតាំងមហាជននានា ជាក់ស្តែងដូចជានៅសារមន្ទីរ និងនៅព្រលានយន្តហោះជាដើម។ រដ្ឋាភិបាលបារាំង បានសន្យាថានឹងចាប់ជនអគតិម្ចាស់សារកុហកទាំងនោះ មកទទួលទោសដោយមិនបន្ធូរដៃឡើយ។
ចុះផ្សាយនៅថ្ងៃ៖
ស្តាប់ - ០៣:០៧
លោករដ្ឋមន្ត្រីក្រសួងយុត្តិធម៌បារាំង បានឲ្យដឹងថា គិតត្រឹមថ្ងៃសុក្រទី២០តុលា សមត្ថកិច្ចបានបើកការស៊ើបអង្កេតចំនួន២២ករណី ទាក់ទិននឹងការផ្ញើសារកុហកថាមានការដាក់គ្រាប់បែក ធ្វើភេរវកម្ម បង្កឲ្យផ្អើលឈូឆរ។ លោកបានលើកឡើងថា ជនដែលជាអ្នកបានផ្ញើសារកុហកទាំងអស់នេះ គឺជាមនុស្សដែលលេងសើចដោយគ្មានការទទួលខុសត្រូវ។ ការលេងសើចនេះ ធ្វើឲ្យសង្គមមានបរិយាកាសភ័យចលាចល ហើយជាងនេះទៀត ធ្វើឲ្យរាំងស្ទះដល់ដំណើរការការងារ របស់សេវាដឹកជញ្ជូនសាធារណៈ មិនថានៅស្ថានីយ៍រថភ្លើង នៅព្រលានយន្តហោះ ព្រោះសមត្ថកិច្ចត្រូវបិទខ្ទប់ជម្លៀសមនុស្សចេញដើម្បីការពារសុវត្ថិភាព មុននឹងដឹងការពិតថាវាជាការលេងសើច។
ដូចគ្នាដែរ លោករដ្ឋមន្ត្រីក្រសួងដឹកជញ្ជូនបារាំង បានលើកឡើង កាលពីល្ងាចថ្ងៃសុក្រថា អាជ្ញាធរនឹងមិនលេងសើចជាមួយក្រុមមនុស្សអគតិ ដែលបានផ្ញើសារកុហកបោកប្រាស់ ថាមានការដាក់គ្រាប់បែកធ្វើភេរវកម្មទាំងនោះឡើយ។ លោកអះអាងថា ម្ចាស់សារកុហកទាំងនោះ អាចប្រឈមនឹងទោសព្រហ្មទណ្ឌ ជាប់ពន្ធនាគារពី ២ទៅ៣ឆ្នាំ ព្រមជាមួយទោសពិន័យជាប្រាក់ច្រើនម៉ឺនអឺរ៉ូថែមទៀត។
សូមបញ្ជាក់ ករណីប្រកាសអាសន្នភេរវកម្មបានកើតឡើងជាច្រើនលើកច្រើនសារ ប៉ុន្មានថ្ងៃមកនេះ នៅតាមទីតាំងទេសចរណ៍ធំៗរបស់បារាំង ជាក់ស្តែងនៅព្រះបរមរាជវាំង Versailles និងនៅសារមន្ទីរ Louvre កណ្តាលក្រុងប៉ារីសជាដើម។ អាជ្ញាធរបានជម្លៀសមនុស្សចេញយ៉ាងតក់ក្រហល់ស្លន់ស្លោ មុននឹងដឹងថាជាដំណឹងបានមកពីការផ្តល់ព៏ត៌មានកុហកបោកប្រាស់ពីជនអនាមិក។ ក្រៅពីទីតាំងទេសចរណ៍ ព្រលានយន្តហោះចំនួនយ៉ាងហោច ១៨ នៅបារាំង ព្រមទាំងស្ថានីយ៍រថភ្លើងជាច្រើនផ្សេងទៀត ដែលបានរងគ្រោះដូចគ្នានេះ ធ្វើឲ្យរអាក់រអួលកកស្ទះដល់ការធ្វើដំណើររបស់មនុស្សរាប់ម៉ឺននាក់។
គួរបញ្ជាក់ដែរថា បរិយាកាសភ័យបារម្ភរឿងភេរវកម្មនៅបារាំងនេះ គឺបានកើតឡើងបន្ទាប់ពីមានករណី ជនជីហាតអ៊ីស្លាមម្នាក់ បានចូលទៅក្នុងវិទ្យាល័យមួយនៅក្រុង Arras ភាគខាងជើងប្រទេសបារាំង ហើយបានយកកាំបិតចាក់សម្លាប់គ្រូបង្រៀនម្នាក់ និងធ្វើឲ្យរបួសមនុស្ស៣នាក់ទៀត កាលពីថ្ងៃទី១៣តុលា។ ការភ័យបារម្ភអំពីការវាយប្រហារភេរវកម្មនេះ គឺស្ថិតនៅក្នុងបរិបទដែលសង្គ្រាមរវាងអ៊ីស្រាអែល និងក្រុមហាម៉ាសប៉ាឡេស្ទីនបានផ្ទុះឡើង ប្រមាណសប្តាហ៍មកនេះ ហើយដែលសមត្ថកិច្ចបារាំងបារម្ភថាជនជីហាតអ៊ីស្លាម អាចនឹងឆក់ឱកាស ចេញធ្វើសកម្មភាពសម្លាប់មនុស្សលើទឹកដីបារាំង ក្នុងអំឡុងពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ