អង់គ្លេងរងការរិះគន់ខ្លាំង ក្រោយសភាអនុម័តច្បាប់ចាប់បញ្ជូនអន្តោប្រវេសន៍ខុសច្បាប់ទៅរវ៉ាន់ដា
សភាអង់គ្លេសបានបោះឆ្នោតអនុម័តកាលពីយប់ថ្ងៃចន្ទ ឈានចូលថ្ងៃអង្គារទី២៣មេសា នូវច្បាប់ថ្មីដ៏ចម្រូងចម្រាសមួយ ដែលបានស្នើដោយរដ្ឋាភិបាលលោករីស៊ី ស៊ូណាក់។ ច្បាប់នេះ នឹងអនុញ្ញាតឲ្យអាជ្ញាធរអង់គ្លេស អាចចាប់បញ្ជូនជនអន្តោប្រវេសន៍ខុសច្បាប់ យកទៅកាន់ប្រទេសរវ៉ាន់ដា។ ក្រោយដំណឹងនៃការអនុម័តច្បាប់នេះ អង់គ្លេសបានរងនូវការរិះគន់ជាខ្លាំង ពីសំណាក់អង្គការសហប្រជាជាតិ ក្រុមប្រឹក្សាទ្វីបអឺរ៉ុប និងអង្គការសិទ្ធិមនុស្សនានា។
ចុះផ្សាយនៅថ្ងៃ៖
ស្តាប់ - ០៤:០៧
បន្ទាប់ពីរុញឲ្យគ្នាចុះឡើងច្រើនដង រវាងសភាជាន់ទាបនិងសភាជាន់ខ្ពស់អង់គ្លេស ទីបំផុតសភាអង់គ្លេសបានបោះឆ្នោតអនុម័តលើច្បាប់គ្រប់គ្រងអន្តោប្រវេសន៍ថ្មីមួយ ដែលច្បាប់នេះនឹងអនុញ្ញាតឲ្យអាជ្ញាធរអង់គ្លេស ចាប់បញ្ជូនជនអន្តោប្រវេសន៍ដែលបានចូលមកដល់ទឹកដីអង់គ្លេសដោយខុសច្បាប់ យកទៅកាន់ប្រទេសរវ៉ាន់ដា។ ច្បាប់នេះ បានចាត់ទុកថារវ៉ាន់ដា គឺជាប្រទេសដែលមានសុវត្ថិភាព។ តាមការគ្រោងទុក រដ្ឋាភិបាលអង់គ្លេសបានត្រៀមមនុស្សជាច្រើនរយនាក់ ជាក់ស្តែងដូចជាចៅក្រមជាច្រើននាក់ ដើម្បីពន្លឿននីតិវិធី បិទសំណុំរឿងស្នើសុំសិទ្ធិជ្រកកោន របស់ជនអន្តោប្រវេសន៍ប្រមាណ២២០០នាក់ ក្នុងតំណាក់កាលដំបូង។
សូមបញ្ជាក់ថា រដ្ឋាភិបាលអង់គ្លេសបានចុះកិច្ចព្រមព្រៀងមួយ ជាមួយរវ៉ាន់ដា ដោយប្រទេសនេះ សុខចិត្តទទួលយកជនអន្តោប្រវេសន៍ខុសច្បាប់ពីអង់គ្លេស ជាថ្នូរនឹងថវិកាដ៏ច្រើនសន្ធឹក។ យ៉ាងណាមិញ នៅព្រឹកថ្ងៃអង្គារទី២៣មេសា រដ្ឋាភិបាលរវ៉ាន់ដាបានឲ្យដឹងថាខ្លួនសប្បាយចិត្តណាស់ ដែលសភាអង់គ្លេសបានអនុម័តច្បាប់នេះ។
កាលពីថ្ងៃចន្ទទី២២មេសា លោករីស៊ី ស៊ូណាក់ នាយករដ្ឋមន្ត្រីអង់គ្លេសដែលជាអ្នកផ្តើមគំនិតធ្វើច្បាប់នេះ បានលើកឡើងថា រដ្ឋាភិបាលលោកបានត្រៀមខ្លួនរួចហើយ នឹងចាប់បញ្ជូនជនអន្តោប្រវេសន៍ខុសច្បាប់ទៅកាន់រវ៉ាន់ដា ក្នុងរវាង១០ ទៅ១២សប្តាហ៍ទៀត បន្ទាប់ពីច្បាប់ថ្មីចូលជាធរមាន។ នៅចំពោះមុខអ្នកកាសែត លោករីស៊ី ស៊ូណាក់បានអះអាងទៀតថា យន្តហោះបានត្រៀមរួចរាល់អស់ហើយ ដោយគ្មាននរណាអាចមករារាំងប្រតិបត្តិការនេះបានទេ។ តែយ៉ាងណា បើផ្អែកតាមបណ្តាញព័ត៌មានអង់គ្លេសខ្លះ គឺរដ្ឋាភិបាលលោកស៊ូណាក់ មានការលំបាកណាស់ក្នុងការរកក្រុមហ៊ុនដឹកជញ្ជូនតាមយន្តហោះ។
គួរបញ្ជាក់ថា ការអនុម័តច្បាប់ថ្មីរបស់អង់គ្លេសនេះ បានបង្កឲ្យមានការរិះគន់ជាខ្លាំង។ លោក Enver Salomon តំណាងអង្គការ Refugee Council បានលើកឡើងថា រដ្ឋាភិបាលអង់គ្លេស គួរណាតែចំណាយកម្លាំងនិងពេលវេលា ទៅពិនិត្យពាក្យសុំសិទ្ធិជ្រកកោនរបស់ជនភៀសខ្លួន ឲ្យបានត្រឹមត្រូវយុត្តិធម៌វិញល្អជាង។ ឧត្តមស្នងការសិទ្ធិមនុស្សនៃអង្គការសហប្រជាជាតិ បានអំពាវនាវថាអង់គ្លេសត្រូវតែពិចារណាឡើងវិញឲ្យបានច្បាស់ ព្រោះថាច្បាប់នេះ ដើរបញ្រ្ចាស ពីគោលការគ្រិះនៃសិទ្ធិមនុស្ស។ កាលពីថ្ងៃចន្ទ អ្នករាយការណ៍ពិសេសផ្នែកជួញដូរមនុស្សនិងអន្តោប្រវេសន៍ នៃអង្គការសហប្រជាជាតិ បាននិយាយបង្កាថាក្រុមហ៊ុនដឹកជញ្ជូនតាមយន្តហោះ ដែលចូលរួមដឹកជនអន្តោប្រទេសន៍ទៅបំបរបង់ចោលនៅរវ៉ាន់ដា អាចនឹងជាប់ទោសពីបទសមគំនិត បំពានសិទ្ធិមនុស្ស។
លោក Michael O’Flaherty ស្នងការសិទ្ធិមនុស្សនៃក្រុមប្រឹក្សាទ្វីបអឺរ៉ុប ដែលអង់គ្លេសក៏ជាសមាជិកដែរនោះ បានលើកឡើងថា ច្បាប់ថ្មីរបស់អង់គ្លេសនេះ អនុញ្ញាតឲ្យមានការចាប់បញ្ជូនជនអន្តោប្រវេសន៍ទៅកាន់រវ៉ាន់ដា ទាំងដែលសំណុំឯកសារពាក្យសុំសិទ្ធិជ្រកកោនរបស់ពួកគេ មិនត្រូវបានតុលាការអង់គ្លេសយកទៅពិនិត្យ។ លោកបន្តថា យោងតាមមាត្រា៣ នៃសន្ធិសញ្ញាអឺរ៉ុបស្តីពីសិទ្ធិមនុស្ស គឺអង់គ្លេសគ្មានសិទ្ធិបណ្តេញចេញ ឬចាប់បញ្ជូនអ្នកដាក់ពាក្យសុំសិទ្ធិជ្រកកោនជាជនភៀសខ្លួន ទៅកាន់ប្រទេសដើម ឬទៅកាន់ប្រទេសទី៣នោះទេ។ ជាងនេះទៀត ច្បាប់ថ្មីរបស់អង់គ្លេសនេះ ថែមទាំងបានបិទផ្លូវ មិនឲ្យតុលាការអង់គ្លេស ពិនិត្យពិចារណាថាប្រទេសរវ៉ាន់ដា ពិតជាទីកន្លែងមានសុវត្ថិភាពឬក៏អត់ ហើយគ្មានយន្តការច្បាស់លាស់ណាមួយ ដែលនឹងមកធានាអះអាងថា អាជ្ញាធររវ៉ាន់ដា នឹងមិនបណ្តេញជនអន្តោប្រវេសន៍ទាំងនោះ ទៅកាន់ប្រទេសផ្សេងទៀតឡើយ។
គួររំលឹកថា ជាច្រើនឆ្នាំមកហើយ ដែលជនអន្តោប្រវេសន៍មកពីស៊ីរី អាហ្វហ្កានីស្ថាន ប៉ាគីស្ថាន អ៊ីរ៉ាក់ និងបណ្តាប្រទេសអាហ្វ្រិកច្រើនទៀត បានសំរុកទៅអង់គ្លេស ដោយបានផ្សងជីវិតជិះទូកពោងតូចៗ ឆ្លងសមុទ្រManche ពីបារាំងទៅអង់គ្លេស។ ករណីលិចទូកស្លាប់មនុស្ស តែងតែកើតមានជារឿយៗ ជាក់ស្តែងនៅថ្ងៃទី២៤មេសានេះ គឺមានស្លាប់៥នាក់ទៀត។ ឆ្នាំ២០២២ ជនអន្តោប្រវេសន៍ដែលបានជិះទូកទៅដល់អង់គ្លេស មានចំនួនដល់ទៅជាង៤៥០០០នាក់ មុននឹងធ្លាក់ចុះមកត្រឹមជិត៣០០០០នាក់ នៅឆ្នាំ២០២៣។ តែគិតពីដើមឆ្នាំ២០២៤នេះ ចំនួនជនអន្តោប្រវេសន៍ជិះទូកពោងឆ្លងសមុទ្រManche បានកើនឡើងដល់ទៅ២០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ