Brexit៖ អង់គ្លេសចាកចេញពីអឺរ៉ុបជាផ្លូវការ តែត្រូវស្ថិតក្នុងរយៈពេលអន្តរកាលរហូតដាច់ឆ្នាំ២០២០
ចុះផ្សាយនៅថ្ងៃ៖
ស្តាប់ - ០៦:៣៤
នៅម៉ោង១២យប់ ថ្ងៃទី៣១មករានេះ ប្រទេសអង់គ្លេស នឹងត្រូវចាកចេញពីសហភាពអឺរ៉ុប ជាផ្លូវការហើយ។ មានន័យថាចាប់ពីថ្ងៃទី១កុម្ភៈទៅ អង់គ្លេស នឹងមិនមែនជាសមាជិកនៃសហភាពអឺរ៉ុបទៀតឡើយ។ តែយ៉ាងណា អង់គ្លេស និងសហភាពអឺរ៉ុប បានព្រមព្រៀងគ្នា បន្តរយៈពេលអន្តរកាល រហូតដល់ដាច់ឆ្នាំ២០២០ ដើម្បីចរចាគ្នាស្តីពីទំនាក់ទំនង គ្រប់វិស័យទាំងអស់ ទៅថ្ងៃអនាគត។ ដូច្នេះតើក្នុងរយៈពេលអន្តរកាលនេះ នឹងមានអ្វីផ្លាស់ប្តូរ សម្រាប់ទំនាក់ទំនង រវាងអង់គ្លេស និងសហភាពអឺរ៉ុប?
អង់គ្លេសលែងមានសិទ្ធិអ្វីទាំងអស់ ក្នុងសហភាពអឺរ៉ុប
ការរួមរស់របស់អង់គ្លេស នៅក្នុងមហាគ្រួសារសហភាពអឺរ៉ុប រយៈពេល៤៧ឆ្នាំកន្លងមកនេះ ត្រូវចប់ជាស្ថាពរ នៅថ្ងៃទី៣១មករានេះហើយ។ ចាប់ពីថ្ងៃទី១កុម្ភៈទៅ គឺជាទំព័រថ្មី នៃទំនាក់ទំនងរវាងអង់គ្លេស និងសហភាពអឺរ៉ុប ដែលទំនាក់ទំនងនេះ នៅមិនទាន់មានរូបរាងនៅឡើយទេ។ ហេតុដូច្នេះហើយ បានជាសហភាពអឺរ៉ុប និងអង់គ្លេស បានព្រមព្រៀងគ្នា ស្ថិតក្នុងរយៈពេលអន្តរកាល ១១ខែ ពោលគឺពីថ្ងៃទី១កុម្ភៈ ដល់ថ្ងៃទី៣១ធ្នូ ចុងឆ្នាំ២០២០។
សួរថាតើ ចាប់ពីពេលនេះទៅ ក្នុងការអនុវត្តជាក់ស្តែង វាមានអ្វីប្រែប្រួលខ្លះ? អ្វីដែលប្រែប្រួល គឺថាភាពជាសមាជិកក្នុងសហភាពអឺរ៉ុប របស់អង់គ្លេស ត្រូវចប់ជាស្ថាពរ។ មានន័យថា អង់គ្លេសនឹងលែងមានសិទ្ថិលែងមានចំណែកអ្វីទៀតហើយ នៅក្នុងស្ថាប័ន ឬក្របខណ្ឌប្រជុំទាំងអស់របស់សហភាពអឺរ៉ុប។ កិច្ចប្រជុំកំពូល កិច្ចប្រជុំថ្នាក់រដ្ឋមន្ត្រី ការសម្រេចនានារបស់ក្រុមប្រឹក្សាអឺរ៉ុប និងគណៈកម្មការអឺរ៉ុប គឺលែងមានវត្តមានអង់គ្លេសទៀតហើយ។ នៅសភាអឺរ៉ុបវិញ ក៏លែងមានសមាជិកសភាតំណាងឲ្យប្រជាជនអង់គ្លេសទៀតដែរ។ អង់គ្លេស នឹងក្លាយជាអ្នកដទៃសុទ្ធសាធ។
អង់គ្លេសបន្តនៅក្នុងទីផ្សាររួមអឺរ៉ុប រហូតដល់ចប់សម័យអន្តរកាលចុងឆ្នាំ២០២០
តែអ្វីដែលមិនប្រែប្រួល សម្រាប់រយៈពេល១១ខែនេះ គឺអង់គ្លេស ត្រូវបន្តអនុវត្តបទវិធាន ឬច្បាប់ទាំងអស់ ដែលមានធរមានកន្លងមក របស់សហភាពអឺរ៉ុប រហូតដល់ដាច់ឆ្នាំ២០២០។ មានន័យថា ក្នុងវិស័យពាណិជ្ជកម្ម ការនាំចេញនាំចូល អត្រាពន្ធដារ វិធានច្បាប់ទាក់ទិននឹងចរាចរណ៍មនុស្ស ឬទំនិញ បទដ្ឋានស្តង់ដារទំនិញ ចំណីអាហារ ឬថ្នាំពេទ្យ ពោលគឺទំនាក់ទំនងគ្រប់វិស័យទាំងអស់ មិនថាសុខាភិបាល សន្តិសុខ យុត្តិធម៌ ការអប់រំ ។ល។ គឺថាអង់គ្លេស ត្រូវបន្តគោរពច្បាប់វិធានរួមរបស់សហភាពអឺរ៉ុប ទាំងអស់សិន រហូតទាល់តែដល់ថ្ងៃទី៣១ធ្នូ ទើបផុតសម័យអន្តរកាល។
ក្នុងអំឡុងពេល១១ខែ នៃសម័យអន្តរកាលនេះ សហភាពអឺរ៉ុប និងអង់គ្លេសត្រូវចរចាគ្នា គូសវាសទំនាក់ទំនងទាំងអស់នេះទៅថ្ងៃខាងមុខ ថាតើត្រូវធ្វើដូចម្តេចទៀត ត្រូវរាប់អានគ្នាដោយរបៀបណា ពោលគឺដូចជាមនុស្ស២នាក់ ដែលទើបតែស្គាល់គ្នាថ្មី ហើយត្រូវចាប់ផ្តើមកសាងទំនាក់ទំនងនឹងគ្នា ពីសូន្យទៅ។
១១ខែ ត្រូវចរចាគ្នាឡើងវិញ គ្រប់វិស័យ
យើងមើលបទពិសោធន៍កន្លងមកក៏ដឹងថា ការចរចាគ្នារវាងអឺរ៉ុបនិងអង់គ្លេស មិនមែនជារឿងងាយទេ ព្រោះថាម្នាក់ៗមានគោលជំហរ ចង់ការពារផលប្រយោជន៍រៀងៗខ្លួន។ ១១ខែ គឺតិចណាស់ សម្រាប់ការចរចា។ មានអ្នកវិភាគខ្លះ បានលើកឡើងថា អង់គ្លេស និងសហភាពអឺរ៉ុប ប្រាកដជាពន្យារពេលសម័យអន្តរកាលនេះ ថែម១ឆ្នាំ ឬក៏អាច២ឆ្នាំទៀតផងក៏មិនដឹង។ បើសិនចង់ពន្យារ គឺអង់គ្លេសត្រូវដាក់ពាក្យសុំ ឲ្យបានមុនថ្ងៃទី១ខែកក្កដា។
តែយ៉ាងណា លោកបូរីស ចនសុន នាយករដ្ឋមន្ត្រីអង់គ្លេស ធ្លាប់បានអះអាងហើយ ថាលោកមិនចង់បន្តរយៈពេលអន្តរកាលនេះឲ្យយូរហួសពី១១ខែទេ។ លោកចនសុន ចង់ធ្វើវាឲ្យដាច់ស្រេចអស់ មុនដាច់ឆ្នាំ២០២០។ ទាក់ទិននឹងអនាគតទំនាក់ទំនងពាណិជ្ជកម្ម រវាងសហភាពអឺរ៉ុប និងអង់គ្លេស គឺលោកបូរីស ចនសុន បានបញ្ជាក់ថា លោកចង់យកគំរូ តាមកិច្ចព្រមព្រៀងពាណិជ្ជកម្មសេរី ដែលអឺរ៉ុបបានចុះហត្ថលេខា ជាមួយកាណាដា។ មានគំរូស្រាប់អ្វីៗនឹងលឿនរហ័ស។
តែយ៉ាងណា ក្រៅពីទំនាក់ទំនងពាណិជ្ជកម្ម នៅមានវិស័យផ្សេងទៀត ដែលត្រូវរកឲ្យបាននូវកិច្ចព្រមព្រៀងដែរ។ ដូចជាផ្នែកសន្តិសុខ កិច្ចសហប្រតិបត្តិការនៃប្រព័ន្ធយុត្តិធម៌ កិច្ចសហប្រតិបត្តិការក្នុងវិស័យអប់រំ វិស័យសុខាភិបាលជាដើម។ លោកស្រី អៀរស៊ូឡា វ៉ុន ដឺឡេយិន ប្រធានគណៈកម្មការអឺរ៉ុប បានទទួលស្គាល់ថា រយៈពេល១១ខែខ្លីណាស់ សម្រាប់ចរចាលើបញ្ហាទាំងអស់នេះ។ សម្រាប់ភាគីអឺរ៉ុប គេមិនមែនចង់រត់តាមពេលវេលានោះទេ។ កិច្ចព្រមព្រៀងនីមួយៗ ត្រូវមានខ្លឹមសារការពារផលប្រយោជន៍គេ មិនមែនចេះតែចុះហត្ថលេខាឲ្យតែបានៗ ដោយសារខ្លាចដល់ពេលកំណត់នោះឡើយ។
អាចនឹងគ្មានកិច្ចព្រមព្រៀង ពេលផុតកំណត់រយៈពេលអន្តរកាល
បញ្ហានេះហើយ ដែលជាការព្រួយបារម្ភ។ សេណារីយ៉ូនេះ អាចនឹងកើតឡើងបាន ដូចពេលកន្លងមក។ ដល់ថ្ងៃកំណត់នៅតែចរចាគ្នាមិនត្រូវ។ ទាក់ទិននឹងបញ្ហានេះ លោកស្រី ប្រធានគណៈកម្មការអឺរ៉ុប បានលើកឡើងថា ភាគីទាំង២ច្បាស់ជាត្រូវសម្រេចចិត្ត រើសយកតែវិស័យអាទិភាពមួយចំនួន មកចរចាមុនសិន។ មានន័យថា បើមិនបានទាំងអស់ ក៏ត្រូវបានកិច្ចព្រមព្រៀងក្នុងវិស័យសំខាន់ៗមុនដែរ។ វិស័យសំខាន់នោះ គឺទំនាក់ទំនងពាណិជ្ជកម្ម ចរាចរណ៍ទំនិញ ចរាចរណ៍មនុស្ស អត្រាពន្ធដារ និងស្តង់ដាទំនិញគ្រប់ប្រភេទជាដើម។
បើដល់ថ្ងៃទី១មករា ឆ្នាំ២០២១ នៅតែគ្មានកិច្ចព្រមព្រៀង គឺមានន័យថា អង់គ្លេសនឹងត្រូវចាកចេញពីទីផ្សាររួមរបស់អឺរ៉ុប ដោយពុំមានកិច្ចព្រមព្រៀងអ្វីទាំងអស់។ បញ្ហានេះនឹងធ្វើឲ្យមានការលំបាក វិបត្តិសេដ្ឋកិច្ចប្រាកដជាកើតមានសម្រាប់ក្រុមហ៊ុន សហគ្រាសមិនថាខាងប្រទេសទាំង២៧របស់អឺរ៉ុប មិនថាខាងអង់គ្លេស។ ប្រទេសមួយចំនួន ដូចជាបារាំងជាដើម ដែលមានព្រំដែនជាប់ជាមួយអង់គ្លេស តាមរយៈផ្លូវក្រោមសមុទ្រ គឺគេបានត្រៀមជើងព្រួលរួចខ្លះហើយ ទាក់ទិននឹងការត្រួតពិនិត្យទំនិញ។
ភាពមិនប្រាកដប្រជានេះ ធ្វើឲ្យមានការបារម្ភខ្លាំងណាស់ ដល់ការរកស៊ី ការវិនិយោគ ក៏ដូចជាការរស់នៅរបស់ប្រជាជនអឺរ៉ុប និងប្រជាជនអង់គ្លេស ដែលត្រូវទៅធ្វើការ ឬរស់នៅឆ្លងប្រទេស។ បើគ្មានកិច្ចព្រមព្រៀង ពីនេះរហូតដល់ចុងឆ្នាំ២០២០ទេ អ្វីៗនឹងរញ៉េរញ៉ៃ គ្មានអត្ថបទច្បាប់ចាត់ចែងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ