លោកអូបាម៉ា៖សិទ្ធិសេរីភាពបញ្ចេញមតិមិនមែនជាការគំរាមកំហែងដល់ស្ថិរភាពប្រទេសទេ
ថ្ងៃអង្គារ ទី២៤ ឧសភានេះជាថ្ងៃទី២ នៃដំណើរទស្សនកិច្ចរយៈពេល ៣ថ្ងៃរបស់លោកប្រធានាធិបតីអាមេរិកបារ៉ាក់ អូបាម៉ាក្នុងទឹកដីវៀតណាម។ បន្ទាប់ពីបានបំពេញការងារផ្លូវទូតពេញមួយថ្ងៃចន្ទតាមរយៈការលើកទ័ណ្ឌកម្មហាមលក់អាវុធឲ្យវៀតណាម និងជំនួបជាមួយថ្នាក់ដឹកនាំជាន់ខ្ពស់វៀតណាមមក នៅថ្ងៃនេះ លោកអូបាម៉ាបានជួបសន្ទនាជាមួយក្រុមតំណាងសង្គមស៊ីវិល និងបានថ្លែងសុន្ទរកថាដែលខ្លឹមសារផ្តោតសំខាន់លើបញ្ហាសិទ្ធិមនុស្សដែលជារឿងដ៏រសើប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០២
មានប្រធានបទសំខាន់ចំនួនពីរនៃដំណើរទស្សនកិច្ចក្នុងថ្ងៃទី២ របស់លោកបារ៉ាក់ អូបាម៉ានៅវៀតណាម ទី១ គឺប្រធានបទក្តៅ និងរសើបទាក់ទងនឹងសិទ្ធិមនុស្ស និងប្រធានបទទី២ គឺផ្តោតសំខាន់លើការរឹតចំណងពាណិជ្ជកម្ម និងសេដកិច្ចរវាងអតីតប្រទេសគូសត្រូវទាំងពីរ។ ប្រធានបទក្តៅ និងរសើបទាក់ទងនឹងសិទ្ធិមនុស្សត្រូវបានធ្វើឡើងតាមរយៈជំនួបជាមួយក្រុមតំណាងសង្គមស៊ីវិល រួមទាំងក្រុមអ្នកប្រឆាំងរដ្ឋាភិបាលវៀតណាម និងបន្តដោយសុន្ទរកថាការពារសិទ្ធិសេរីភាពក្នុងការបញ្ចេញមតិ។
នៅក្នុងជំនួបជាមួយក្រុមតំណាងសង្គមស៊ីវិល រួមទាំងក្រុមប្រឆាំងរដ្ឋាភិបាលវៀតណាមដែលរៀបចំនៅក្នុងស្ថានទូតអាមេរិកប្រចាំក្រុងហាណូយ សេតវិមានមិនបានប្រាប់ឲ្យដឹងជាមុនពីបញ្ជីឈ្មោះមនុស្សដែលត្រូវចូលរួមទេ តែមានសកម្មជនប្រឆាំង រួមទាំងមេធាវីការពារសកម្មជនប្រឆាំងមួយចំនួនផងត្រូវបានប៉ូលិសវៀតណាមចាប់ខ្លួន និងរារាំងមិនឲ្យធ្វើដំណើរទៅស្ថានទូតអាមេរិក។ អ្វីដែលលោកអូបាម៉ាចង់ឮផ្ទាល់ត្រចៀកពីក្រុមតំណាងសង្គមស៊ីវិល និងក្រុមសកម្មជនប្រឆាំង គឺបំណងប្រាថ្នា និងក្តីបារម្ភរបស់ពួកគេ។
ប៉ុន្មានម៉ោងក្រោយពីជំនួបជាមួយក្រុមតំណាងសង្គមស៊ីវិល លោកអូបាម៉ាបានថ្លែងសុន្ទរកថានៅចំពោះមុខអ្នកចូលរួមជាង ២ ០០០នាក់ និងដែលត្រូវបានផ្សាយបន្តផ្ទាល់តាមទូរទស្សន៍ក្នុងស្រុក។ នៅក្នុងសុន្ទរកថានោះ លោកអូបាម៉ាបានសង្កត់ធ្ងន់លើសិទ្ធិសេរីភាពក្នុងការបញ្ចេញមតិ សិទ្ធិសេរីភាពសារព័ត៌មាន និងសិទ្ធិសេរីភាពក្នុងការជួបជុំ។ លោកអូបាម៉ាបានអះអាងថា ការធានាឲ្យមានសិទ្ធិសេរីភាពក្នុងការបញ្ចេញមតិមិនមែនជាការគំរាមកំហែងដល់ស្ថិរភាពរបស់ប្រទេសឡើយ និងបន្ថែមថា នៅពេលដែលមានសិទ្ធិសេរីភាពសារព័ត៌មានពេញលេញ នោះប្រជាជនមានទំនុកទុកចិត្តលើប្រព័ន្ធដឹកនាំ។
វៀតណាមស្តាប់ តែមិនភ្ញាក់ផ្អើលចំពោះការលើកឡើងរបស់លោកអូបាម៉ា
បញ្ហាសិទ្ធិមនុស្សជាបញ្ហាដែលពិបាកនិយាយចុះសម្រុងគ្នារវាងប្រទេសពីរដែលមានរបបដឹកនាំផ្ទុយគ្នាស្រឡះ។ នៅម្ខាង ជាប្រទេសបិតាលទ្ធិប្រជាធិបតេយ្យ និងនៅម្ខាងទៀត ជាប្រទេសបិតាកុម្មុយនិស្ត។ តែរបបក្រុងហាណូយមិនសូវជាភ្ញាក់ផ្អើល និងក៏មិនសូវជាយកចិត្តទុកដាក់ប៉ុន្មានទេ ព្រោះថា វាជាទម្លាប់ប្រពៃណីមួយទៅហើយរបស់អាមេរិកដែលទៅទីណាត្រូវតែឃោសនាសាបព្រោះតម្លៃលទ្ធិប្រជាធិបតេយ្យ ពិសេសនៅក្នុងប្រទេសកាន់អំណាចផ្តាច់ការ។ ចំណែករដ្ឋបាលអាមេរិកាំងក៏បានដឹងដែរថា ខ្លួនត្រូវតែនិយាយដោយចៀសមិនរួច ទោះតិច ឬច្រើន និងដោយប្រយោល ឬដោយផ្ទាល់ក្តី ព្រោះបើពុំនោះសោតទេ អាមេរិកខ្លួនឯងនឹងត្រូវទទួលរងការរិះគន់បកវិញជាមិនខាន។
នៅក្នុងជំនួបជាមួយលោកប្រធានាធិបតីវៀតណាម Tran Dai Quang លោកអូបាម៉ាក៏បានលើកយកបញ្ហាសិទ្ធិមនុស្សទៅនិយាយជាមួយសមភាគីវៀតណាម ដោយបានរម្លឹកពីទស្សនៈខុសគ្នារវាងហាណូយ និងវ៉ាស៊ីនតោននៅក្នុងរឿងដ៏រសើបមួយនេះ។ ជាចម្លើយខ្លីតបវិញតាមភាសាទូត លោក Tran Dai Quang បានបញ្ជាក់ដោយធានាថា រដ្ឋាភិបាលមានគោលនយោបាយសំដៅការពារ និងគោរពសិទ្ធិមនុស្ស។ យ៉ាងណាក៏ដោយ ក្រុមអង្គការការពារសិទ្ធិមនុស្ស ដូចយ៉ាង Human Rights Watch បានសម្តែងការសោកស្តាយដែលលោកអូបាម៉ាបាននិយាយសើរៗ និងលូកដៃមិនសូវជ្រៅនៅក្នុងបញ្ហាសិទ្ធិមនុស្សនៅវៀតណាម។
ពីសត្រូវក្លាយជាដៃគូមិនអាចខ្វះបាន
គេអាចនិយាយបានថា ការដែលលោកអូបាម៉ាបាននិយាយសើរៗ និងលូកដៃមិនសូវជ្រៅនៅក្នុងបញ្ហាសិទ្ធិមនុស្ស គឺមកពីខ្លាចបាត់បង់ប្រយោជន៍សេដ្ឋកិច្ច។ ចូរកុំភ្លេចថា នយោបាយការបរទេសអាមេរិកក្នុងជំនាន់លោកប្រធានាធិបតីបារ៉ាក់ អូបាម៉ា គឺផ្តោតសំខាន់ និងឲ្យតម្លៃខ្លាំងលើតំបន់អាស៊ីប៉ាស៊ីហ្វិកជាងតំបន់ផ្សេងក្នុងលោក។ ការដែលលោកអូបាម៉ាបានប្រកាសលើកទ័ណ្ឌកម្មហាមលក់អាវុធឲ្យវៀតណាមចេញជាភស្តុតាងមួយដែលបញ្ជាក់ថា អាមេរិកចង់ពង្រឹងបន្ថែមកិច្ចសហប្រតិបត្តិការពាណិជ្ជកម្ម និងសេដ្ឋកិច្ចជាមួយអតីតប្រទេសសត្រូវរបស់ខ្លួន។
កាលពីមុន អាមេរិកបានដាក់លក្ខខណ្ឌថា បើវៀតណាមគោរពសិទ្ធិមនុស្ស និងសិទ្ធិសេរីភាពសារព័ត៌មាន ទើបអាមេរិកយល់ព្រមលប់ការហាមលក់អាវុធឲ្យវៀតណាម។ តែឥឡូវនេះ ស្ថានការណ៍សិទ្ធិមនុស្សនៅវៀតណាមអត់ចម្រើនទៅមុខ និងកាន់តែដុនដាប ចុះហេតុអ្វីបានជាអាមេរិកបែរជាសុទ្ធចិត្តលប់ចោល។ តើទង្វើរបៀបនេះមិនមែនដើម្បីប្រយោជន៍សេដ្ឋកិច្ចទេ ឬយ៉ាងណា?។ នៅក្នុងសុន្ទរកថាថ្លែងទៅកាន់ពលរដ្ឋវៀតណាម លោកអូបាម៉ាមិនញញើតនឹងប្រើឃ្លាមួយថា ថ្ងៃនេះ វៀតណាម និងអាមេរិកជាប្រទេសដៃគូ។
ជាមួយនឹងពលរដ្ឋវៀតណាម ៩០លាននាក់ អាមេរិកពិតជាយល់មិនច្រឡំទេថា វៀតណាមជាប្រទេសដែលមានសក្តានុពលសេដ្ឋកិច្ចធំណាស់នៅអាស៊ីអាគ្នេយ៍។ គ្រាន់តែក្នុងរយៈពេលពីឆ្នាំ ១៩៩៥ ដល់ឆ្នាំ ២០១៥ ទំហំនៃការដោះដូរពាណិជ្ជកម្មរវាងអាមេរិក និងវៀតណាមបានកើនពី ៤៥០លានដុល្លាររហូតដល់ទៅ ៤៥ ០០០លានដុល្លារ។
អាមេរិក និងវៀតណាមត្រូវការគ្នាទៅវិញ ទៅមក
ការដែលអាមេរិក និងវៀតណាមបានរំកិលរកគ្នាឆាប់រហ័សដូចផ្លេកបន្ទោរ និងបានក្លាយជាដៃគូយ៉ាងស្អិតរមួតពេលនេះ មកពីប្រទេសអតីតគូសត្រូវទាំងពីរត្រូវការគ្នាទៅវិញទៅមក។ អាមេរិកត្រូវការវៀតណាមដើម្បីប្រយោជន៍សេដ្ឋកិច្ច និងដើម្បីបង្កើនឥទ្ធិពលរបស់ខ្លួននៅក្នុងតំបន់ប្រឈមនឹងឥទ្ធិពលរបស់ចិន។ ចំណែកវៀតណាមត្រូវការអាមេរិកដើម្បីប្រយោជន៍សេដ្ឋកិច្ច និងយកអាមេរិកធ្វើជាបង្អែកដើម្បីទប់នឹងចិននៅក្នុងជម្លោះសមុទ្រចិនខាងត្បូង។
នៅត្រង់ចំណុចនេះ លោកអូបាម៉ាបានយល់ និងដឹងច្បាស់ណាស់ពីតម្រូវការរបស់វៀតណាម និងពីអ្វីដែលវៀតណាមចង់ ឮពីមាត់របស់គាត់។ អ៊ីចឹងហើយបានជានៅក្នុងសុន្ទរកថាថ្ងៃនេះ លោកអូបាម៉ាមិនភ្លេចនិយាយពីជម្លោះនៅក្នុងសមុទ្រចិនទេ តែបានត្រឹមអំពាវនាវឲ្យមានដំណោះស្រាយតាមផ្លូវសន្តិវិធី និងឆ្លៀតដាក់ផ្លែផ្កាដាក់ចិនថា ប្រទេសធំមិនត្រូវបំភិតបំភ័យប្រទេសតូចទេ។ ចូរកុំភ្លេចថា អាមេរិកដែលមានប្រយោជន៍ជាមួយចិន និងត្រូវការចិនមិនទៅល្ងង់ទាត់ចិនចាប់វៀតណាមទេ គឺព្យាយាមឈរនៅកណ្តាលដើម្បីស៊ីទាំងសងខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ