តុលាការឥណ្ឌូណេស៊ីកាត់ទោសអ្នកកាសែតបារំាងពីរនាក់ឲ្យជាប់គុកពីរខែកន្លះ
អ្នកសារព័ត៌មានជនជាតិបារាំងពីរនាក់ ដែលបានទៅយកព័ត៌មាន នៅតំបន់ ប៉ាពូអាស៊ី ភាគខាងកើតប្រទេសឥណ្ឌូណេស៊ី ត្រូវបានតុលាការកាត់ទោស ឲ្យជាប់ពន្ធនាគារ២ខែកន្លះ។ តុលាការឥណ្ឌូណេស៊ីចោទអ្នកកាសែតទាំងពីរថា បានរំលោភបំពានច្បាប់ ព្រោះមានទិដ្ឋាការជាអ្នកទេសចរណ៍ ប៉ុន្តែបែជាទៅយកព័ត៌មាន ក្នុងនាមជាអ្នកកាសែត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
អ្នកកាសែតបារាំងពីរនាក់ ម្នាក់ជាភេទប្រុស អាយុ ៤០ឆ្នាំ ឈ្មោះ Thomas Dandois និងម្នាក់ទៀត ភេទស្រី អាយុ២៩ឆ្នាំ ឈ្មោះ Valentine Bourrat ត្រូវបានតុលាការ ក្រុង ចាយ៉ាពុរ៉ា ភាគខាងកើតប្រទេសឥណ្ឌូណេស៊ី កាត់ទោសឲ្យជាប់ពន្ធនាគាររយៈពេល ២ខែកន្លះ។ ប៉ុន្តែដោយសាទោសនេះ រាប់បញ្ចូលទាំងរយៈពេលនៃការឃុំខ្លួនបណ្តោះអាសន្ន អ្នកកាសែតទាំងពីរនឹងត្រូវបានដោះលែងនៅ ថ្ងៃចន្ទសប្តាហ៍ក្រោយ ព្រោះថា អ្នកកាសែតទាំងពីរត្រូវបានជាប់ឃុំបណ្តោះអាសន្ន អស់ជាងពីរខែមកហើយ។ តុលាការឥណ្ឌូណេស៊ីបានចោទប្រកាន់អ្នកកាសែតបារាំងទាំងពីរ ថាបានរំលោភបំពានលើច្បាប់អន្តោប្រវេសន៍ ដោយកាន់ទិដ្ឋាការជាអ្នកទេសចរណ៍ តែបែជាទៅយកព័ត៌មាន ក្នុងនាមជាអ្នកកាសែត ដោយគ្មានការអនុញ្ញាតត្រឹមត្រូវ។
សូមរំលឹកថា អ្នកកាសែតទាំងពីរត្រូវបានអាជ្ញាធរឥណ្ឌូណេស៊ីចាប់ខ្លួន ក្នុងខៈណៈពេលដែលអ្នកកាសែតទាំងពីរ បានចុះទៅយកព័ត៌មាន ជាមួយក្រុមឧទ្ទាមជនជាតិប៉ាពូ នៅក្នុងតំបន់ប៉ាពូអាស៊ី។ ក្រុមឧទ្ទាមជនជាតិប៉ាពូ បានប្រយុទ្ធទាមទារឯករាជ្យ អស់ជាច្រើនទសវត្សមកហើយ ដើម្បីផ្តាច់ខ្លូនចេញពីឥណ្ឌូណេស៊ី។ មុនការចាប់ខ្លួនអ្នកកាសែតបារាំងទាំងពីរប៉ុន្មានថ្ងៃ មានការបាញ់តបតគ្នាមួយ រវាងក្រុមឧទ្ទាមប៉ាពូ និងនគរបាលឥណ្ឌូនេស៊ី ដែលក្នុងហេតុការណ៍នោះ មានស្លាប់ក្រុមជនជាតិប៉ាពូ៥នាក់ និងនគរបាលឥណ្ឌូណេស៊ី២នាក់។
កន្លងមក អាជ្ញាធរឥណ្ឌូណេស៊ី បានត្រួតពិនិត្យយ៉ាងតឹងរឹង មិនឲ្យមានអ្នកកាសែត ចុះទៅយកព័ត៌មាននៅតំបន់នេះ ប្តេសផ្តាស បាននោះទេ។ អ្នកកាសែតដែលចង់ទៅយកព័ត៌មាន ត្រូវស្នើសុំទិដ្ឋាការក្នុងនាមជាអ្នកកាសែត ជាមុន ប៉ុន្តែអាជ្ញាធរកម្រនឹងសម្រេចផ្តល់ឲ្យណាស់។ អង្គការ Human Rights Watch ក៏ដូចជាអង្គការក្រៅរដ្ឋាភិបាលជាច្រើនទៀត ធ្លាប់បានចេញរបាយការណ៍ជាញឹកញាប់ រិះគន់រដ្ឋាភិបាលឥណ្ឌូណេស៊ី ថាបានរឹតបន្តឹងសិទ្ធិសេរីភាព របស់ប្រជាជនប៉ាពូ។ មានរបាយការណ៍ជាច្រើនបានបន្ថែមថា មន្រ្តីឥណ្ឌូណេស៊ី បានប្រព្រឹត្តិអំពើពុករលួយយ៉ាងបើកចំហរ កេងប្រវញ្ញយកធនធានធម្មជាតិក្នុងតំបន់នេះ ទៅលក់យកលុយច្រកហោប៉ៅតែរៀងៗខ្លួន ទុកឲ្យប្រជាជនប៉ាពូដែលជាម្ចាស់ស្រុក រងទុក្ខវេទនា។ មួយវិញទៀត រដ្ឋាភិបាល បានទាំងរឹតត្បិត មិនឲ្យមានអ្នកកាសែតបរទេស ចុះមកយកព័តមាន ក្នុងតំបន់នេះបានឡើយ។
ទោះបីជាយ៉ាងណា ដំណឹងល្អនាពេលនេះគឺអ្នកកាសែតទាំងពីរ នឹងត្រូវដោះលែងក្នុងរយៈពេលប៉ុន្មានថ្ងៃទៀតប៉ុណ្ណោះ។ ប៉ុន្តែ ការកាត់ទោសទៅលើអ្នកយកព័ត៌មាន វាបានជះឥទ្ធិពលអាក្រក់ ទៅដល់កេរ្តិ៍ឈ្មោះរបស់ឥណ្ឌូនេស៊ី។ ឥណ្ឌូនេស៊ី ប្រៀបបានដូចជា គោដំបៅខ្នង ដែលខឹតខំរារាំងមិនឲ្យអ្នកកាសែតបរទេស ទៅយកព័ត៌មាន នៅតំបន់ប៉ាពូអាស៊ី ព្រោះមិនចង់ឲ្យគេឯងដឹងឮ ពីអំពើអាក្រក់របស់ខ្លួន ដែលធ្វើទៅលើជនជាតិប៉ាពូ ម្ចាស់ស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ