ឥណ្ឌូណេស៊ី៖ លោកវីដូដូស្បថចូលកាន់តំណែង បញ្ហាប្រឈមធំៗកំពុងរង់ចាំ
ចុះផ្សាយនៅថ្ងៃ៖
ស្តាប់ - ០៥:១១
លោកវីដូដូ (Joko Widodo) ដែលបានជាប់ឆ្នោតជាប្រធានាធិបតីឥណ្ឌូណេស៊ី កាលពីខែកក្កដា បានស្បថចូលកាន់តំណែងជាផ្លូវការនៅថ្ងៃចន្ទនេះ។ ក៏ប៉ុន្តែ ប្រធានាធិបតីថ្មី ដែលមាននយោបាយកំណែទម្រង់យ៉ាងច្រើន អាចនឹងត្រូវប្រឈមមុខនឹងបញ្ហាស្មុគស្មាញ នៅក្នុងការអនុវត្តនយោបាយកំណែទម្រង់នេះ។
ពិធីស្បថចូលកាន់តំណែងរបស់លោកវីដូដូ ដែលមានការចូលរួមពីសំណាក់ឥស្សរជនបរទេសមួយចំនួន ដូចជា លោកចន ឃែរី រដ្ឋមន្រ្តីការបរទេសអាមេរិក លោកថូនី អ៊ែបត នាយករដ្ឋមន្រ្តីអូស្រ្តាលី លោកលី សៀនឡុង នាយករដ្ឋមន្រ្តីសិង្ហបុរី ព្រមទាំងថ្នាក់ដឹកនាំផ្សេងទៀតមកពីបណ្តាប្រទេសអាស៊ាន គឺជាការបើកទំព័រសករាជថ្មីមួយ សម្រាប់ឥណ្ឌូណេស៊ី។ លោកវីដូដូ គឺជាប្រធានាធិបតីឥណ្ឌូណេស៊ីដំបូងបង្អស់ ដែលមិនមានជាប់ពាក់ព័ន្ធនឹងអតីតរបបសឹកផ្តាច់ការរបស់លោកស៊ូហារតូ។
លោកវីដូដូ ត្រូវបានគេស្គាល់ថាជាអ្នកនយោបាយ ដែលមានប្រភពដើមចេញពីស្រទាប់ប្រជាជនសាមញ្ញធម្មតា ជាអ្នកនយោបាយ ដែលដុះពន្លកចេញពីនយោបាយថ្នាក់មូលដ្ឋាន និងជាអ្នកនយោបាយជំនាន់ថ្មី មានគំនិតថ្មី របៀបដឹកនាំថ្មី និងនយោបាយកំណែទម្រង់ច្រើន ដែលធ្វើឲ្យគេដាក់ក្តីសង្ឃឹមថា លោកនឹងនាំមកនូវការផ្លាស់ប្តូរច្រើនដល់ឥណ្ឌូណេស៊ី។ ក៏ប៉ុន្តែ ក្នុងពេលជាមួយគ្នា គេក៏មានក្តីបារម្ភផងដែរ អំពីសមត្ថភាពរបស់លោក ក្នុងការយកគំនិតកំណែទម្រង់របស់លោក ទៅអនុវត្តជានយោបាយជាក់ស្តែង។
ឧបសគ្គដ៏ចម្បងបំផុត គឺចលនាប្រឆាំងនៅក្នុងរដ្ឋសភា ដែលគណបក្សរបស់លោកវីដូដូ មានសំឡេងត្រឹមតែ ៣៩%។ គណបក្សដែលគ្រប់គ្រងសំឡេងភាគច្រើននៅសភា គឺគណបក្សរបស់លោកស៊ូប៊ីយ៉ាន់តូ (Prabowo Subianto) ដែលជាធ្លាប់គូប្រជែងដ៏ជូរចត់របស់លោកវីដូដូ នៅក្នុងការបោះឆ្នោតប្រធានាធិបតី។
នៅក្នុងសន្ទុរកថាក្នុងពិធីស្បថចូលកាន់តំណែង ដែលធ្វើនៅក្នុងវិមានរដ្ឋសភា លោកវីដូដូ បានធ្វើការអំពាវនាវដល់សមាជិកសភាឲ្យមានការរួបរួមគ្នា ដោយលើកឡើងថា “យើងនឹងមិនអាចក្លាយជាប្រជាជាតិដ៏ខ្លាំងពូកែមួយបានទេ ប្រសិនបើយើងនៅតែប្រកាន់គំនិតបែកបាក់គ្នា”។ លោកវីដូដូ ក៏បានលើកឡើង អំពីលោកស៊ូប៊ីយ៉ាន់តូ ដែលជាអតីតគូប្រជែងផងដែរ ដោយចាត់ទុកលោកថាជា “មិត្តដ៏ល្អ” ម្នាក់។
គួររំឭកឡើងវិញថា លោកស៊ូប៊ីយ៉ាន់តូ អតីតឧត្តមសេនីយ៍ និងជាអតីតកូនប្រសាររបស់លោកស៊ូហារតូ ធ្លាប់បានប្រកាសបដិសេធមិនទទួលស្គាល់ជ័យជម្នះរបស់លោកវីដូដូ ព្រមទាំងបានធ្វើការជំទាស់ទៅដល់តុលាការ ដើម្បីទាមទារឲ្យលុបចោលលទ្ធផលបោះឆ្នោត។ ប៉ុន្តែ កាលពីថ្ងៃសុក្រ សប្តាហ៍មុន លោកស៊ូប៊ីយ៉ាន់តូ បានសុខចិត្តប្រកាសទទួលស្គាល់លោកវីដូដូជាប្រធានាធិបតី នៅក្នុងកាយវិកាសម្រុះសម្រួលគ្នា។ ទោះជាយ៉ាងណា គេនៅតែមិនទាន់អាចដឹងប្រាកដច្បាស់ថា តើការផ្សះផ្សាគ្នានេះអាចនឹងស្ថិតស្ថិរនៅបានយូរប៉ុណ្ណា។
ក្រៅពីបញ្ហាប្រឈមខាងផ្នែកនយោបាយ លោកវីដូដូក៏នឹងត្រូវប្រឈមនឹងបញ្ហាធំជាច្រើនផ្សេងទៀតដែរ ដូចជាបញ្ហាសេដ្ឋកិច្ច ដែលបច្ចុប្បន្ននេះកំពុងមានអត្រាកំណើនទាបបំផុតមិនធ្លាប់មាន ក្នុងរយៈពេល ៥ឆ្នាំកន្លងទៅនេះ បញ្ហាពុករលួយដែលនៅតែមានសន្ទុះខ្លាំង បូករួមនឹងបញ្ហាថ្មីមួយទៀត គឺឥទ្ធិពលរបស់ក្រុមជីហាតរដ្ឋអ៊ីស្លាម ដែលអាចបណ្តុះចលនាជ្រុលនិយម នៅក្នុងប្រទេសឥណ្ឌូណេស៊ី ដែលជាប្រទេសមានអ្នកកាន់សាសនាអ៊ីស្លាមច្រើនជាងគេបំផុតនៅលើពិភពលោក។
គួរធ្វើការកត់សម្គាល់ថា ឥណ្ឌូណេស៊ី គឺជាប្រទេសមហាអំណាចសេដ្ឋកិច្ចលំដាប់ទី១នៅក្នុងអាស៊ាន (ជាប់ចំណាត់ថ្នាក់លេខ ៥ នៅអាស៊ី បន្ទាប់ពីចិន ជប៉ុន ឥណ្ឌា និងកូរ៉េខាងត្បូង និងជាប់លេខ ១៦នៅលើពិភពលោក) និងជាប្រទេសមានប្រជាជនច្រើនជាងគេលំដាប់ទី៤ នៅលើពិភពលោក ដោយមានប្រជាជនសរុបដល់ទៅ ២៥០លាននាក់ ក្នុងនោះ ប្រមាណជា ៩០% គឺជាអ្នកកាន់សាសនាអ៊ីស្លាម។ ក្នុងរយៈពេល ១០ឆ្នាំចុងក្រោយនេះ ឥណ្ឌូណេស៊ី មានអត្រាកំណើនសេដ្ឋកិច្ចខ្ពស់ ក្នុងចន្លោះ ពី ៥% ទៅ ៦% ក៏ប៉ុន្តែ ប្រជាជនឥណ្ឌូណេស៊ីរហូតដល់ទៅជាង ១០០លាននាក់ មានប្រាក់ចំណូលតិចជាង ២ដុល្លារ ក្នុង១ថ្ងៃ (បន្ទាត់ក្រីក្រកំណត់ដោយធនាគារពិភពលោក គឺ ១,២៥ដុល្លារក្នុងមួយថ្ងៃ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ