ក្រុមប្រឹក្សាអឺរ៉ុបពិភាក្សាគ្នាពីបញ្ហាឡើងកំដៅផែនដីយ៉ាងត្រដាបត្រដួស
ជំនួបកំពូលអឺរ៉ុបដែលធ្វើឡើងនៅទីក្រុងប្រ៊ុយហ្ស៊ែល បានចាប់ផ្តើមហើយ នៅថ្ងៃព្រហស្បតិ៍ទី ២៣ តុលា។ មុននឹងពិភាក្សាគ្នា អំពីការរីករាលដាល នៃមេរោគអេបូឡា និងប្រធានបទទាក់ទងនឹងបញ្ហាសេដ្ឋកិច្ច ប្រទេសអឺរ៉ុបទាំង២៨ បានជួបពិភាក្សាគ្នានៅថ្ងៃដំបូង ស្តីអំពីបញ្ហាអាកាសធាតុ។ ប្រទេសសមាជិកទំាងអស់ ត្រូវស្វែងរកកិច្ចព្រមព្រៀងរួមមួយ ដើម្បីយកទៅពិភាក្សាតទល់ នាឱកាសសន្និសីទពិភពលោកស្តីពីអាកាសធាតុ នៅចុងឆ្នាំ២០១៥។
ចុះផ្សាយនៅថ្ងៃ៖
ស្តាប់ - ០២:១២
ទប់ស្កាត់ការឡើងកំដៅផែនដី គឺត្រូវកាត់បន្ថយការបញ្ចេញឧស្ម័នពុល ទៅក្នុងបរិយាកាស។ គណៈកម្មការអឺរ៉ុប បានដាក់ស្នើទិសដៅបីចំណុច ឲ្យប្រទេសសមាជិកទាំង២៨សម្រេច នាឱកាសជំនួបកំពូលនេះ។ ទីមួយ គឺត្រូវកាត់បន្ថយ ការបញ្ចេញឧស្ម័នពុល ឲ្យបាន៤០ ភាគរយ។ ទីពីរ គឺបង្កើនការប្រើប្រាស់ថាមពលដែលមិនចេះរីងស្ងួត ឲ្យបានដល់២៤ភាគរយ។ ទីបី គឺត្រូវសន្សំសំចៃ ការប្រើប្រាស់ចរន្តអគ្គីសនី ឲ្យបាន៣០ភាគរយ។
សូមបញ្ជាក់ថា ឧស្ម័នពុលដែលជាប្រភពចំបង ក្នុងការឡើងកំដៅផែនដី គឺជាលទ្ធផលនៃការផលិតចរន្តអគ្គីសនី និងថាមពលផ្សេងៗ ដោយប្រើប្រាស់ប្រេងឥន្ធនៈ និងធ្យូងថ្ម។ យានយន្ត ឡានម៉ូតូ និងរោងចក្រសហក្រាសធំៗ ដែលប្រើប្រាស់ប្រេង បានបញ្ចេញផ្សែងពុលនេះ រាប់លានតោន មួយឆ្នាំៗ ទៅក្នុងបរិយាកាស។ មិនត្រឹមតែប៉ុណ្ណោះ ជាមួយនឹងបច្ចេកវិទ្យាទំនើបបច្ចុប្បន្ន បរិក្ខាអគ្គីសនីមានកាន់តែសំបូរបែប ដែលធ្វើឲ្យការប្រើប្រាស់ចរន្តអគ្គីសនី កាន់តែកើនឡើងពីមួយថ្ងៃទៅមួយថ្ងៃ។ ពិភពលោកកំពុងតែមានការព្រួយបារម្ភ ដោយសាតែ ភពផែនដីកាន់តែក្តៅទៅៗ នឹងបង្កជាគ្រោះធម្មជាតិ និងគ្រោះរាំងស្ងួតនៅតាមតំបន់ជាច្រើន។
ទោះបីជាយ៉ាងណា ការពិភាក្សាគ្នា នៅក្នុងកិច្ចប្រជុំកំពូល របស់ក្រុមប្រឹក្សាអឺរ៉ុប ហាក់មានភាពតានតឹងណាស់ ព្រោះថាប្រទេសសមាជិកទាំង២៨ មាននិន្នាការមិនដូចគ្នា រីឯលទ្ធភាពក៏មិនស្មើគ្នា។ កាត់បន្ថយការប្រើប្រាស់អគ្គីសនី និងប្រេងសាំង មានន័យថា វាប៉ះពាល់ដោយផ្ទាល់ ទៅដល់សេដ្ឋកិច្ច និងការរីកចំរើនរបស់ប្រទេសមួយ។ ប្រទេសធំៗដូចជាបារាំង អង់គ្លេស និងអាល្លឺម៉ង់ មានរោងចក្រផលិតអគ្គីសនីដើរដោយប្រព័ន្ធនុយក្លេអ៊ែរ។ ដូច្នេះ វាងាយស្រួលទេ សម្រាប់ពួកគេ ក្នុងការកាត់បន្ថយការបញ្ចេញឧស្ម័នពុល។ រីឯប្រទេសមួយចំនួនដូចជាប៉ូឡូញវិញ មិនអាចកាត់បន្ថយការបញ្ចេញឧស្ម័នពុលបានងាយៗទេ ព្រោះគេត្រូវការប្រើប្រាស់ធ្យូងថ្ម ដើម្បីដុតធ្វើជាចរន្តអគ្គីសនី។
អាល្លឺម៉ង់ ដែលជាប្រទេសឈានមុខគេ ក្នុងការកាត់បន្ថយការបញ្ចេញឧស្ម័នពុល ដោយបានបង្កើនការផលិតចរន្តអគ្គីសនី ដោយថាមពលព្រះអាទិត្យ និងខ្យល់សមុទ្រ ហើយនឹងការប្រើប្រាស់ឧស្ម័នធម្មជាតិជាដើម។ យ៉ាងណាក៏ដោយ មន្រី្តការទូតអាល្លឺម៉ង់ បានសំដែងនូវទុទិ្ទដ្ឋិនិយម ជុំវិញលទ្ធផលនៃការពិភាក្សាគ្នានេះ។ ប្រទេសតូចៗ បានត្អូញត្អែរ ថាប្រទេសធំៗ បានដាក់កំហឹតធ្ងន់ធ្ងរពេក ដែលពួកគេមិនអាចធ្វើទៅបាន។ មួយវិញទៀត ប្រទេសសមាជិកតូចៗទាំងនោះ នៅមិនទាន់មានបច្ចេកវិទ្យាជឿនលឿន ដើម្បីផលិតថាមពលអគ្គីសនី ដោយមិនបាច់ប្រើប្រេងឥន្ធនៈ រឺធ្យូងថ្ម បាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ