WWF៖ នៅក្នុងរយៈពេល៤០ឆ្នាំ ចំនួនសត្វព្រៃថយចុះពាក់កណ្តាល
ចុះផ្សាយនៅថ្ងៃ៖
ស្តាប់ - ០៦:៥៦
នៅថ្ងៃអង្គារ ទី ៣០ កញ្ញា អង្គការការពារសត្វព្រៃ WWF បានចេញរបាយការណ៍មួយដែលបង្ហាញថា ចំនួនសត្វព្រៃ នៅលើគោក ក្នុងអាកាស និងក្នុងទឹកបានថយចុះ ពាក់កណ្តាល ប្រមាណ៥២ភាគរយក្នុងរយៈពេល ៤០ឆ្នាំចុងក្រោយនេះ។ តាមរបាយការណ៍ដែលមានឈ្មោះថា ផែនដីដែលគេកំពុងរស់នៅ ឆ្នាំ ២០១៤ ជីវិតជីវចម្រុះ រួមទាំងសត្វព្រៃ នៅតែរងការគំរាម កំហែងមិនឈប់ឈរ និងច្រើនជាងការគិតទុកដោយសារសកម្មភាពរបស់មនុស្ស។
ចំនួនសត្វព្រៃថយចុះដល់ទៅពាក់កណ្តាល រហូតធ្វើឲ្យអង្គការការពារសត្វព្រៃទាញសញ្ញាអាសន្ន នៅក្នុងរបាយការណ៍របស់ខ្លួនចេញផ្សាយនៅថ្ងៃអង្គារ។ អង្គការការពារសត្វព្រៃធ្លាប់បានចេញរបាយការណ៍មួយ កាលពីឆ្នាំ ២០១២ ដែលបង្ហាញថាសត្វព្រៃបានថយចុះចំនួន ២៨ភាគរយ។ ប៉ុន្តែ តាមប្រធានរបស់អង្គការWWF ដោយមកពីរបៀបគណនាថ្មី គេរក ឃើញថា តាមពិតចំនួនសត្វព្រៃបានថយចុះច្រើនជាងចំនួនដែលគេធ្លាប់គណនាកាលពីពេលមុនទៅទៀត។
កាលពីមុន គេធ្វើការសិក្សាទៅលើចំនួនគំរូសត្វព្រៃ តែជាងពីរពាន់ក្បាល។ ប៉ុន្តែ លើកនេះ គេបានសិក្សាលម្អិតទៅលើសត្វ គ្រប់ប្រភេទ ប្រមាណ ១០ ៣៨០ ក្បាល ដែលមានជីវិតនៅលើភពផែនដី មិនថា សត្វរស់នៅលើគោក ក្នុងទឹក ឬលើអាកាស។ តាមរបាយការណ៍ សត្វព្រៃ និងជីវចម្រុះបានបាត់បង់ជាងពាក់កណ្តាល ក្នុងចន្លោះឆ្នាំ ១៩៧០ និងឆ្នាំ ២០១០។ តាមអ្នកជំនាញ ទំនោរថយចុះចំនួនសត្វព្រៃទំនងជានឹងមិនបង្អន់ល្បឿនទេ បើមើលទៅលើសកម្មភាពអភិវឌ្ឍន៍នៅលើផែនដីបច្ចុប្បន្ន។
មនុស្សជាអ្នកទទួលខុសត្រូវចំបងដែលធ្វើឲ្យជីវិតជីវចម្រុះ និងសត្វព្រៃថយចុះខ្លាំង។ មនុស្សបានពង្រីកកន្លែងរស់នៅ កន្លែងអភិវឌ្ឍន៍ កាប់ព្រៃឈើ ឬនេសាទ បរបាញ់នៅក្នុងតំបន់រស់នៅរបស់សត្វព្រៃ និងជីវិតជីវចម្រុះផ្សេងទៀត។ ការប្រែប្រួលអាកាសធាតុ ដែលបង្កឡើងដោយការបំពុលបរិស្ថានរបស់មនុស្សក៏ធ្វើឲ្យ ចំនួនសត្វព្រៃថយចុះដែរ។
តាមរបាយការណ៍ មនុស្សកើនពីជាង ៣ពាន់លាននាក់ នៅឆ្នាំ ១៩៦១ មក៧ពាន់លាននាក់ នៅពេលបច្ចុប្បន្ននេះ។ គេប៉ាន់ប្រមាណថា ចំនួនប្រជាជនក្នុងពិភពលោកនឹងកើនដល់ជាង ៩ពាន់លាននាក់ នៅឆ្នាំ ២០៥០ និងកើនដល់១១ពាន់លាននៅឆ្នាំ ២១០០។ នៅពេលដែលមនុស្សត្រូវការកន្លែងតាំងទី នោះប្រាកដណាស់ ជំរកសត្វព្រៃ នឹងត្រូវរួញកាន់តែតូច ដោយការឈ្លានពានរបស់ក្រុមមនុស្ស។
មនុស្សកើនឡើង តម្រូវការ ប្រើប្រាស់របស់មនុស្សក៏កើនឡើងដែរ។ ប៉ុន្តែ តាមអ្នកសរសេររបាយការណ៍ ចំនួនកើនឡើងរបស់មនុស្សមិនសមាមាត្រ មិនស៊ីគ្នានឹងចំនួនធនធានដែលធម្មជាតិផ្តល់ឲ្យនោះទេ។ មនុស្សប្រើប្រាស់ ធនធានធម្មជាតិ ច្រើនជ្រុល ក្នុងពេលគេធ្វើសកម្មភាពតិចតួចសម្រាប់ការមានជីវិតរបស់ធនធានធម្មជាតិ។
ជារួម ចំនួនសត្វព្រៃថយចុះដោយសារតែអំពើរបស់មនុស្ស។ កសិកម្ម ទន្ទ្រានដីរបស់មនុស្សទៅក្នុងតំបន់ព្រៃ ការពង្រីកកន្លែងរស់នៅរបស់មនុស្ស ការកាប់ព្រៃឈៃដែលជាជំរករបស់សត្វព្រៃ ការសាងសង់ទំនប់វារីអគ្គិសនី និងប្រព័ន្ធធារាសាស្រ្ត គឺជាសកម្មភាពដែលធ្វើឲ្យជីវចម្រុះ និងសត្វព្រៃថយចុះ។
គេត្រូវការផែនដីមួយកន្លះដើម្បីទប់ទល់នឹងតម្រូវការរបស់ប្រជាជនក្នុងពិភពលោក
តាមរបាយការណ៍ ប្រទេសអ្នកមានជាអ្នកចូលរួមចំណែកធ្វើឲ្យចំនួនសត្វព្រៃ ធ្លាក់ចុះ ច្រើនជាងគេ។ នៅឆ្នាំ ២០១០ ដោយមើលទៅលើអត្រាប្រជាជន ប្រទេសកូវ៉ែត ជាអ្នកចូលរួមធ្វើឲ្យសត្វព្រៃថយចុះ។ បន្ទាប់មក គឺកាតា អារ៉ាប៊ី សាអូឌីត ដាណឺម៉ាក ប៊ែលហ្សិក សិង្ហបុរី។ ប្រទេសអ្នកមាន ប៉ុន្តែ មានប្រជាជនតិច ត្រូវទទួលខុសត្រូវធ្វើឲ្យសត្វព្រៃថយចុះ ព្រោះថា ប្រទេសអ្នកមានទាំងនេះចូលចិត្តប្រើប្រាស់ផលិតផលធនធានធម្មជាតិរបស់ប្រទេសដទៃ។ គេបានឲ្យឧទាហរណ៍ថា ប្រសិនបើប្រជាជនក្នុងពិភពលោកចង់រស់នៅ របៀបប្រជាជនកាតា នោះគេត្រូវការផែនដីដល់ទៅ ៤ ដើម្បីទប់ទល់នឹងតម្រូវការ។ ឬ ផែនដី ៣,៩ បើសិនគេប្រកាន់ចរិកប្រើប្រាស់ធនធានធម្មជាតិ ដូចប្រជាជនអាមេរិក។
តំបន់ដែលសត្វព្រៃថយចុះច្រើនជាង គឺនៅតំបន់អាមេរិកឡាទីន ដែលតំណាងឲ្យការធ្លាក់ចុះនៃជីវចម្រុះ និងសត្វព្រៃ ដល់ទៅ ៨៣ភាគរយ។ បន្ទាប់មក គឺតំបន់អាស៊ីប៉ាស៊ីហ្វិកតែម្តង ដែលជីវិតសត្វព្រៃត្រូវបានគំរាមកំហែង និងថយចុះខ្លាំង។ នៅក្នុងចំណោមសត្វព្រៃទាំងអស់ មិនថា នៅលើគោក ក្នុងទឹក ឬលើអាកាស គឺសត្វមានជីវិតនៅក្នុងទឹកសាបដែលរងគ្រោះខ្លាំងគេ ដោយសារ ធ្លាក់ថយចុះដល់ទៅ៧៦ភាគរយ។ ចំណែកសត្វនៅលើគោក និងនៅក្នុងសមុទ្រ បានធ្លាក់ចុះប្រមាណ៣៦ភាគរយ ដោយសារតែការប្រមាញ់ និងនេសាទច្រើនហួសហេតុរបស់មនុស្ស។
បើមើលទៅសកម្មភាពផុសផុលរបស់មនុស្ស និងនយោបាយមិនសូវសកម្មរបស់រដ្ឋាភិបាល ដើម្បីលុបបំបាត់ការជួញដូរសត្វព្រៃ ឬការប្រើប្រាស់សត្វព្រៃ គេពិបាកនឹងជឿថា ចំនួនសត្វព្រៃ នឹងមិនថយចុះ ពីពេលនេះ ទៅអនាគត។ តាមពិត ការពារពូជសត្វព្រៃ និងជីវចម្រុះ គឺដើម្បីការរស់រានមានជីវិតរបស់មនុស្សជាតិ ទៅថ្ងៃអនាគត។
នៅពេលដែលភាពក្រីក្រ នៅគ្របដណ្តប់ផ្ទៃដីភាគច្រើនរបស់ផែនដីនៅឡើយ មនុស្សត្រូវការបរិភោគ ត្រូវការរស់ ជាមួយនឹងការបរបាញ់សាច់សត្វ ឬត្រូវនេសាទ កាប់ឈើ ដើម្បីយកមកប្រើប្រាស់ប្រចាំថ្ងៃ។ ក៏ប៉ុន្តែ ធនធានធម្មជាតិ ដ៏គួរអភ័ព្វ ជាពិសេសសត្វនៅក្នុងទឹក កើតមានជីវិត ឬលូតលាស់មិនទាន់នឹងតម្រូវការមាត់របស់មនុស្សទេ។ តាមអង្គការការពារសត្វព្រៃ WWF បើ បើសិនមនុស្សចេះដាំដើមឈើ ឈប់បរបាញ់សត្វព្រៃច្រើនលើសកំណត់ និងកាត់បន្ថយការបញ្ចេញឧស្ម័នពុល ដែលធ្វើឲ្យមានការប្រែប្រួលអាកាសធាតុ នោះមនុស្សនឹងនៅតែអាចយកផលចំណេញពីធនធានធម្មជាតិ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ