ជំនួបកំពូលអាកាសធាតុ៖សម្បូរតែទ្រឹស្តី និងពាក្យសន្យា តែការអនុវត្តន៍ជាក់ស្តែងមានតិចតួច
ចុះផ្សាយនៅថ្ងៃ៖
ស្តាប់ - ០៦:៣៧
ចប់ហើយជំនួបកំពូលស្តីពីបញ្ហាអាកាសធាតុដែលបានរៀបចំរយៈពេលមួយថ្ងៃនៅក្នុងទីក្រុងញូយ៉ក សហរដ្ឋអាមេរិក។ ជំនួបកំពូលដែលបានចូលរួមដោយប្រមុខរដ្ឋ និងប្រមុខរដ្ឋាភិបាលប្រមាណជា ១២០នាក់នៅទូទំាងពិភពលោក ព្រមទំាងអ្នកតំណាងរោងចក្រ សហគ្រាស និងអង្គការក្រៅរដ្ឋាភិបាលនានាជាង ២០០នាក់ផ្សេងទៀត។ ក៏ដូចជានៅក្នុងជំនួបកំពូលមុនៗដែរ កម្មវត្ថុសំខាន់គឺសំដៅកាត់បន្ថយឧស្ម័នផ្ទះកញ្ចក់នៅក្នុងភពផែនដី និងការស្វែងរកថវិកាដើម្បីជួយបណ្តាប្រទេសក្រីក្រដែលកំពុងរងគ្រោះដោយការបំពុលបរិយាសពីសំណាក់ប្រទេសអ្នកមាន និងប្រទេសកំពុងអភិវឌ្ឍន៍។
លោកអគ្គលេខាធិការអង្គការសហប្រជាជាតិបាន គីមូនជាអ្នកផ្តួចផ្តើមគំនិតរៀបចំជំនួបកំពូលស្តីពីបញ្ហាអាកាសធាតុ ទន្ទឹមគ្នានឹងមហាសន្និបាតអង្គការសហប្រជាជាតិប្រចំាឆ្នំាលើកទី៦៩ ដែលបានចាប់ផ្តើមបើកជាផ្លូវការនៅថ្ងៃពុធ ទី២៤ កញ្ញានេះ។ មួយវិញទៀត ការបើកឲ្យមានជំនួបកំពូលស្តីពីអាកាសធាតុពេលនេះក៏ជាការត្រៀមរៀបចំសន្និសីទមួយស្តីពីបញ្ហាអាកាសធាតុដែលគ្រោងធ្វើនៅក្នុងប្រទេសបារំាងនាដំណាច់ឆ្នំា ២០១៥ ខាងមុខ។ កម្មវត្ថុនៃជំនួបកំពូល គឺសំដៅកាត់បន្ថយឧស្ម័នផ្ទះកញ្ចក់នៅក្នុងបរិយាកាស ព្រោះចូរកុំភ្លេចថា កំណើនឧស្ម័នផ្ទះកញ្ចក់ជាដើមចមនៃការឡើងកំដៅនៅក្នុងបរិយាកាសពិភពលោកសព្វថ្ងៃ។
អ្វីដែលលោកបាន គីមូនចង់ដាស់ស្មារតីថ្នាក់ដឹកនំាពិភពលោកនៅក្នុងជំនួបកំពូលពេលនេះ គឺសុំកុំឲ្យពួកគេភ្លេចពីពាក្យសន្យារបស់ខ្លួននាជំនួបកំពូលកាលពីឆ្នំា ២០០៩ នៅក្នុងទីក្រុងកូប៉ិនហាក ប្រទេសដាណឺម៉ាក។ កាលណោះ ជំនួបកំពូលបានសម្រេចបង្កើតមូលនិធិបៃតងមួយរបស់អង្គការសហប្រជាជាតិសម្រាប់ជួយបណ្តាប្រទេសក្រីក្រដែលកំពុងរងគ្រោះដោយការបំពុលបរិយាកាស។ នៅក្នុងមូលនិធិបៃតងនោះ ក្រុមប្រទេសអ្នកមានបានសន្យាឲ្យលុយចំនួន ១០ ០០០លានដុល្លារគិតត្រឹមដំណាច់ឆ្នំា ២០១៤ នេះ និងសន្យាបង់វិភាគទានប្រចំាឆ្នំាចំនួន ១០០ ០០០លានដុល្លារចាប់ពីឆ្នំា ២០២០ ទៅ។ តែមកទល់ថ្ងៃនេះ មូលនិធីបៃតងទើបទទួលបានលុយតែ ២ ៣០០លានដុល្លារប៉ុណ្ណោះ។
ប្រទេសនីមួយៗមានកាតព្វកិច្ចកាត់បន្ថយឧស្ម័នផ្ទះកញ្ចក់ដូចគ្នា
ការកាត់បន្ថយឧស្ម័នផ្ទះកញ្ចក់ គឺជាកាតព្វកិច្ចរបស់ប្រទេសនីមួយៗ ដោយមិនថាជាប្រទេសអភិវឌ្ឍន៍ ប្រទេសកំពុងអភិវឌ្ឍន៍ ប្រទេសកំពុងមានសេដ្ឋកិច្ចជឿនលឿន ឬមួយក៏ប្រទេសក្រីក្រទេ។ លោកប្រធានាធិបតីអាមេរិកអូបាម៉ាបានអំពាវនាវឲ្យមានកិច្ចព្រមព្រៀងចុងក្រោយមួយស្តីពីបញ្ហាអាកាសធាតុនៅក្នុងសន្និសីទដែលគ្រោងរៀបចំក្នុងប្រទេសបារំាងនាដំណាច់ឆ្នំា ២០១៥ ខាងមុខ។ លោកអូបាម៉ាបានយល់ឃើញថា អាកាសធាតុពិភពលោកបានផ្លាស់ប្តូរលឿនជាងការខិតខំប្រឹងប្រែងទប់ស្កាត់របស់យើងទៅទៀត និងថា គ្មានប្រទេសណាមួយដែលត្រូវធ្វើមិនដឹង មិនឮនោះទេ។ ទន្ទឹមគ្នានេះ លោកអូបាម៉ាក៏បានទទួលស្គាល់ថា អាមេរិក និងចិន ជាប្រទេសពីរដែលបានបំពុល និងកំពុងបន្តបំពុលបរិយាកាសពិភពលោកខ្លំាងជាងគេ។ ចំណែកបារំាងដែលចង់បង្ហាញជាប្រទេសគំរូសម្រាប់អ្នកផ្សេង លោកប្រធានាធិបតីហ្រ្វង់ស័រ ហូឡង់បានប្រកាសដាក់លុយចំនួន ១ ០០០លានដុល្លារទៅក្នុងមូលនិធីបៃតងរបស់អង្គការសហប្រជាជាតិ និងបានអំពាវនាវឲ្យប្រទេសផ្សេងធ្វើដូចខ្លួន។
យ៉ាងណាក៏ដោយ គេមិនអាចនិយាយថា ជំនួបកំពូលពេលនេះបានទទួលបរាជ័យទេ ព្រោះមានកម្មវត្ថុមួយចំនួនត្រូវបានព្រមព្រៀងគ្នា។ ទី១ បញ្ឈប់ការបង្ហិនបង្ហោចព្រៃឈើ ឬការកាប់ព្រៃឈើចាប់ពីពេលនេះដល់ឆ្នំា ២០៣០ ទី២ បង្កើនចំនួនការប្រើរថយន្តដើរដោយអគ្គិសនីនៅក្នុងទីក្រុងឲ្យបាន ៣០% ចាប់ពីពេលនេះដល់ឆ្នំា ២០៣០។ ទន្ទឹមគ្នានេះ រដ្ឋាភិបាល និងក្រុមអ្នកវិនិយោគក៏បានសន្យារួមគ្នាក្នុងការប្រមូលលុយឲ្យបានជាង ២០០ ០០០លានដុល្លារចាប់ពីពេលនេះដល់ដំណាច់ឆ្នំា ២០១៥ សម្រាប់ចំណាយទប់ស្កាត់ការផ្លាស់ប្តូរអាកាសធាតុក្នុងលោក។ ទំាងនេះសុទ្ធសឹងជាសំណើមួយដែលគ្មានលក្ខណៈបង្ខិតបង្ខំ តែអង្គការសហប្រជាជាតិបានយល់ឃើញថា បើគេអាចសម្រេចបាននូវគម្រោងទំាងអស់នេះមែន នោះពិភពលោកនឹងអាចកាត់បន្ថយបរិមាណឧស្ម័នកាបូនិចពី ៤ ៥០០លានតោន ទៅ ៨ ៨០០លានតោនក្នុងមួយឆ្នំាៗចាប់ពីពេលនេះដល់ឆ្នំា ២០៣០។
សេដ្ឋកិច្ចជាឧបសគ្គចម្បងក្នុងការសម្រេចឲ្យបាននូវកិច្ចព្រមព្រៀងមួយដើម្បីបរិយាកាសពិភពលោកគ្មានផ្សែងពុល
ជារួមគេសង្កេតឃើញថា បញ្ហាកាត់បន្ថយឧស្ម័នផ្ទះកញ្ចក់ គឺជាបញ្ហាមួយដែលគេពិបាកនឹងរកបានកិច្ចព្រមព្រៀងរួមសម្រាប់ទំាងអស់។ ប្រទេសដែលកំពុងប្រទាញប្រទង់គ្នាខ្លំាង គឺអាមេរិក និងចិន ព្រោះជាប្រទេសដែលកំពុងបំពុលបរិយាកាសខ្លំាងជាងគេ។ ចិនដែលជាប្រទេសកំពុងមានឧស្សាហកម្មជឿនលឿនតែងតែអះអាងថា ខ្លួនមិនជាប់កាតព្វកិច្ចនឹងការកាត់បន្ថយឧស្ម័នផ្ទះកញ្ចក់ទេ។ តែការអះអាងរបៀបនេះរបស់ចិនត្រូវបានប្រទេសមហាអំណាចឧស្សាហកម្មមួយចំនួនដូចយ៉ាងអាមេរិកមិនសុទ្ធចិត្ត ព្រោះគេយល់ថា ចិនដែលបានដណ្តើមចំណាត់ថ្នាក់ទី២ ជាមហាអំណាចសេដ្ឋកិច្ចពិភពលោកលែងជាប្រទេសកំពុងអភិវឌ្ឍន៍ទៀតឡើយ។ ជាទូទៅ ការខ្វែងគំនិតគ្នាជុំវិញការបន្ថយឧស្ម័នផ្ទះកញ្ចក់ទៅក្នុងបរិយាកាសបានកើតមានទំាងនៅក្នុងរង្វង់ប្រទេសអភិវឌ្ឍន៍ដូចគ្នា និងប្រទេសកំពុងអភិវឌ្ឍន៍គ្នាឯង។
ពិតណាស់ថា ប្រទេសកំពុងអភិវឌ្ឍន៍បានចាត់ទុកការកាត់បន្ថយឧស្ម័នផ្ទះកញ្ចក់ថា ជាកាតាព្វកិច្ចរួមអស់គ្នា។ តែទន្ទឹមគ្នានេះ ពួកគេក៏បានទាមទារឲ្យពិនិត្យមើលលើស្ថានភាពជាក់ស្តែងរបស់ប្រទេសនីមួយៗដោយធ្វើយ៉ាងណា កុំឲ្យប៉ះពាល់ដល់ផលប្រយោជន៍សេដ្ឋកិច្ចរបស់ពួកគេ។ ជាក់ស្តែងដូចប្រទេសចិនដែលកំណើនសេដ្ឋកិច្ចសព្វថ្ងៃ គឺជាផ្លៃផ្កាបានមកពីសកម្មភាពដ៏មមាញឹករបស់រោងចក្រ សហគ្រាសរាប់សិបពាន់នៅក្នុងទឹកដីចិន តែគឺរោងចក្រ សហគ្រាសទំាងអស់នោះហើយដែលកំពុងចាក់ចោលឧស្ម័នផ្ទះកញ្ចក់ជារៀងរាល់ថ្ងៃ។ សម្រាប់ទីក្រុងប៉េកំាង ការកាត់បន្ថយ ឧស្ម័នផ្ទះកញ្ចក់មានន័យស្មើនឹងផ្អាកដំណើរការរោងចក្រទំាងនោះ។
ដូច្នេះឃើញថា គឺផលប្រយោជន៍សេដ្ឋកិច្ចដែលបាននិងកំពុងធ្វើឲ្យពិភពលោកពិបាកនិយាយចុះសម្រុងគ្នាក្នុងការស្វែងរកនូវកិច្ចព្រមព្រៀងរួមមួយសម្រាប់បរិយាកាសពិភពលោកគ្មានផ្សែងពុល។ អ៊ីចឹងហើយបានជាកម្តៅនៃភពផែនដីកំពង់បន្តឡើងជារៀងរាល់ឆ្នំានិងដែលគ្មាននរណាម្នាក់ ហ៊ានឆ្លើយថា មិនមែនជាកំហុសរបស់ខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ