៦នាក់ស្លាប់ក្នុងគ្រោះថ្នាក់ក្រឡាប់រថភ្លើងនៅក្បែរក្រុងប៉ារីស
ចុះផ្សាយនៅថ្ងៃ៖
គ្រោះថ្នាក់ក្រឡាប់រថភ្លើង នៅក្បែរក្រុងប៉ារីស កាលពីល្ងាចថ្ងៃសុក្រ បានបណ្តាលឲ្យមនុស្សយ៉ាងតិច ៦នាក់ស្លាប់ និងប្រមាណជា ៧០នាក់ផ្សេងទៀតរងរបួស ក្នុងនោះ មាន ៩នាក់របួសធ្ងន់ធ្ងរ។ អាជ្ញាធរបារាំងកំពុងធ្វើការស៊ើបអង្កេត ដើម្បីស្វែងរកមូលហេតុនៃគ្រោះថ្នាក់នេះ ក៏ប៉ុន្តែ តាមសេចក្តីសន្និដ្ឋានជាជំហានដំបូង គ្រោះថ្នាក់នេះបង្កឡើងដោយភាពមិនប្រក្រតីនៅត្រង់ផ្លូវបំបែករថភ្លើង។
ហេតុការណ៍កើតឡើង នៅម៉ោង ៥ និង ១៥នាទីល្ងាចថ្ងៃសុក្រ (ម៉ោងនៅទីក្រុងប៉ារីស)។ រថភ្លើងដែលជួបនឹងគ្រោះថ្នាក់នេះ មិនមែនជារថភ្លើងទំនើបដែលមានល្បឿនលឿន (TGV) ទេ ប៉ុន្តែ ជាប្រភេទរថភ្លើងធម្មតា។ រថភ្លើងនេះមានដឹកអ្នកដំណើរប្រហែលជា ៣៧០នាក់ ចេញដំណើរពីប៉ារីស ឆ្ពោះទៅខេត្តប៉ែកខាងត្បូងប្រទេសបារាំង។ ក៏ប៉ុន្តែ ចេញពីប៉ារីសបានប្រហែលជាជិត ៣០គីឡូម៉ែត្រ នៅពេលកំពុងបើកក្នុងល្បឿន ១៣៧គីឡូម៉ែត្រក្នុងមួយម៉ោង ក៏ស្រាប់តែរថភ្លើងត្រូវដាច់ជាពីរកំណាត់ ហើយមួយកំណាត់ផ្នែកខាងក្រោយ ដែលមាន ៤ទូ ក៏ត្រូវក្រឡាប់។
សំណួរ-តើគេអាចដឹងហើយឬនៅថា តើគ្រោះថ្នាក់ក្រឡាប់រថភ្លើងនេះបណ្តាលមកពីមូលហេតុអ្វី?
មកទល់នឹងពេលនេះ ប្រតិបត្តិការសង្រ្គោះទើបនឹងត្រូវបិទបញ្ចប់ ហើយការស៊ើបអង្កេតទើបនឹងចាប់ផ្តើមធ្វើ។ ដូច្នេះ គេនៅមិនទាន់អាចធ្វើការសន្និដ្ឋានអ្វីឲ្យបានពិតប្រាកដនៅឡើយទេ។
ក៏ប៉ុន្តែ បើទោះជាមិនទាន់មានលទ្ធផលស៊ើបអង្កេតផ្លូវការក៏ដោយ គេបានធ្វើការសន្និដ្ឋានជាបឋមថា គ្រោះថ្នាក់នេះមិនមែនបណ្តាលមកពីកំហុសអ្នកបើករថភ្លើងទេ។ ប្រធានក្រុមហ៊ុនរថភ្លើងបារាំង បានឲ្យដឹង នៅព្រឹកថ្ងៃសៅរ៍នេះថា គេរកឃើញតម្រ៉ុយខ្លះៗ ដែលអាចឲ្យគេធ្វើការសន្និដ្ឋានជាជំហានដំបូងថា គ្រោះថ្នាក់ក្រឡាប់រថភ្លើងម្សិលមិញនេះ គឺបណ្តាលមកពីបញ្ហាតំណផ្លូវរថភ្លើង នៅត្រង់ផ្លូវបំបែក។
តាមពិតទៅ គ្រាន់តែមានដំណឹងពីគ្រោះថ្នាក់ក្រឡាប់រថភ្លើងនេះភ្លាម គេនាំគ្នាសង្ស័យទៅលើស្ថានភាពចាស់រេចរឹលនៃផ្លូវដែក តាំងពីដើមទីម៉្លេះ ព្រោះបញ្ហានេះ ធ្លាប់ជារឿងចម្រូងចម្រាសជាច្រើនឆ្នាំមកហើយ ដោយគេនាំគ្នារិះគន់រដ្ឋាភិបាលថា មិនបានគិតគូរបោះទុនវិនិយោគ ដើម្បីធ្វើទំនើបកម្មប្រព័ន្ធផ្លូវដែកឲ្យស្របទៅនឹងតម្រូវការ។
កន្លងមក ទាំងរដ្ឋាភិបាលបារាំង ទាំងក្រុមហ៊ុនអយស្ម័យានបារាំង ដែលជាក្រុមហ៊ុនរបស់រដ្ឋ ក៏សុទ្ធតែធ្លាប់បានទទួលស្គាល់ដែរថា ប្រព័ន្ធផ្លូវដែកបារាំងមានភាពចាស់រេចរឹលខ្លាំង។
អ្វីដែលគួរឲ្យកត់សម្គាល់ គ្រោះថ្នាក់រថភ្លើង កាលពីល្ងាចម្សិលមិញនេះ កើតឡើងនៅលើផ្លូវរថភ្លើង ដែលប្រធានក្រុមហ៊ុនអយស្ម័យានបារាំងបានកំណត់ កាលពីឆ្នាំ២០១១ថា ជាផ្លូវដែលមានភាពចាស់រេចរឹលខ្លាំងជាងគេ។
សំណួរ-បើស្តាប់មើលទៅដូចជាគួរឲ្យចម្លែក! បារាំងស្ថិតក្នុងចំណោមប្រទេសដែលមានបច្ចេកវិទ្យាខាងផ្លូវដែកទំនើបបំផុត ក៏ប៉ុន្តែ បែរជាមានបណ្តាញផ្លូវដែកចាស់រេចរឹល ដែលអាចជាមូលហេតុនាំឲ្យមានគ្រោះថ្នាក់ធ្ងន់ធ្ងរដូចជាពីម្សិលមិញនេះទៅវិញ។
យើងអាចនិយាយបានថាវាជារឿងចម្លែក! ក៏ប៉ុន្តែ មែនទែនទៅ ប៉ុន្មានឆ្នាំចុងក្រោយនេះ យើងឃើញថា បារាំងបានចំណាយលុយច្រើន តែទៅលើការអភិវឌ្ឍបច្ចេកវិទ្យាថ្មីៗ ទំនើបៗ និងសាងសង់បណ្តាញរថភ្លើងល្បឿនលឿន (TGV) ហើយមិនសូវជាយកចិត្តទុកដាក់ចំពោះបណ្តាញផ្លូវរថភ្លើងធម្មតា។ ការធ្វើទំនើបកម្មបណ្តាញផ្លូវរថភ្លើងធម្មតា ក៏ត្រូវបានធ្វើខ្លះដែរ ក៏ប៉ុន្តែ ការកែលម្អបណ្តាញរថភ្លើងប្រភេទនេះ (ទាំងផ្លូវដែក និងទាំងទូរថភ្លើង) វិវឌ្ឍមិនទាន់កំណើននៃចំនួនអ្នកធ្វើដំណើរ ពីព្រោះ ប្រជាជនបារាំង ជាពិសេស នៅក្នុងតំបន់ប៉ារីស ភាគច្រើន គេទៅធ្វើការដោយជិះរថភ្លើង។
ដោយសារតែមើលឃើញពីកង្វះខាតនេះហើយបានជា យើងឃើញថា ប៉ុន្មានឆ្នាំមកនេះ រដ្ឋាភិបាលបារាំងបានចាប់ផ្តើមបង្កើនការវិនិយោគលើការធ្វើទំនើបកម្មបណ្តាញរថភ្លើង ពី ១ពាន់លានអឺរ៉ូ នៅឆ្នាំ២០០៧ ដល់ ២ពាន់ ៥រយលានអឺរ៉ូ នៅឆ្នាំ២០១១។ ម្យ៉ាងទៀត កាលពីប៉ុន្មានថ្ងៃមុនពេលមានគ្រោះថ្នាក់ក្រឡាប់រថភ្លើងនេះ រដ្ឋាភិបាលលោកហ្វ្រង់ស័រ ហូឡង់ ទើបនឹងប្រកាសបង្កើនកញ្ចប់ថវិកាសម្រាប់កែលម្អបណ្តាញផ្លូវដែកនេះ រហូតដល់ទៅ ៥ពាន់ ៥រយលានអឺរ៉ូ ដោយផ្តោតជាពិសេស ទៅលើការផ្លាស់ប្តូរទូររថភ្លើង ដូចជាប្រភេទរថភ្លើង ដែលក្រឡាប់ម្សិលមិញនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ