នាយករដ្ឋមន្ត្រីជប៉ុនចង់ធ្វើជំនួបកំពូលជាមួយក្រុងប៉េកាំង
នៅថ្ងៃសុក្រនេះ នាយករដ្ឋមន្ត្រីជប៉ុន Shinzo Abe បានប្រាប់ថា លោកចង់អោយមានជំនួបកំពូលមួយរវាងក្រុងតូក្យូនិងក្រុងប៉េកាំង ដោយមិនចាំបាច់ឆ្លងកាត់កិច្ចពិភាក្សាបឋមអ្វីនោះទេ។ ទំនាក់ទំនងចិននិងជប៉ុនមានការធ្លាក់ដុនដាបខ្លាំង ដោយសារតែបញ្ហាជម្លោះប្រជុំកោះសេនកាគូ នៅសមុទ្រចិនខាងកើត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
ក្នុងដំណើរទស្សនកិច្ចនៅប្រទេសសិង្ហបុរី នៅថ្ងៃសុក្រនេះ នាយករដ្ឋមន្ត្រីជប៉ុន Shinzo Abe បានបង្ហាញពីគោលបំណងរបស់លោក ចង់អោយជប៉ុននិងចិន រៀបចំជំនួបកំពូលមួយ ដោយមិនចាំបាច់មានកិច្ចពិភាក្សាអ្វីជាបឋមនោះទេ។ លោក អាបេ ក៏ចង់អោយមានជំនួបរវាងរដ្ឋមន្ត្រីការបរទេសនៃប្រទេសទាំងពីរផងដែរ។
គួរបញ្ជាក់ឡើងវិញថា ក្រុងប៉េកាំងនិងក្រុងតូក្យូតែងតែឈ្លោះគ្នា ដណ្តើមប្រជុំកោះសេនកាគូ នៅសមុទ្រចិនខាងកើត។ ទំនាក់ទំនងរវាងចិននិងជប៉ុន បានធ្លាក់ដុនដាបខ្លាំង ចាប់ពីខែកញ្ញា ឆ្នាំ២០១២ មក នៅពេលដែលជប៉ុនបានទិញយកកោះចំនួន៣ក្នុងចំណោមកោះទាំង៥ នៅតំបន់ប្រជុំកោះជម្លោះនេះ ដាក់អោយក្លាយជាកម្មសិទ្ធិជាតិជប៉ុន។ ភាពតានតឹងរវាងប្រទេសទាំងពីរ បានធ្វើអោយប៉ះពាល់ដល់ដំណើរការសហគ្រាសជប៉ុន ពិសេសសហគ្រាសរថយន្ត ដែលបោះទីតាំង នៅប្រទេសចិន។
ការប្រកាសរបស់នាយករដ្ឋមន្ត្រីជប៉ុន ចង់អោយមានជំនួបរវាងអ្នកទទួលខុសត្រូវនានានៃប្រទេសទាំងពីរនេះ ធ្វើឡើង នាឧកាសដែលលោកកំពុងទស្សនកិច្ចអាស៊ីអគ្នេយ៍។ ទស្សនកិច្ចលោកមានទិសដៅជំរុញសេដ្ឋកិច្ចជប៉ុនអោយស្ទុះទៅមុខ មួយកម្រិតទៀត។ ការប្រកាសនេះបង្ហាញពី ឥរិយាបថថ្មីមួយទៀតរបស់ជប៉ុន នៅចំពោះមុខឥទ្ធិពលសេដ្ឋកិច្ចចិននៅអាស៊ីអគ្នេយ៍។
ក្រសួងការបរទេសចិន បានឆ្លើយតបទៅនឹងសំណើរបស់លោក អាបេ វិញ ក្នុងលក្ខណៈប្រុងប្រយ័ត្ន ដោយលើកឡើងថា រដ្ឋាភិបាលចិនបើកចំហរជានិច្ច នូវការចរចាជាមួយជប៉ុន ប៉ុន្តែបញ្ហាក្នុងទំនាក់ទំនងរវាងប្រទេសទាំងពីរ គឺមកពីឥរិយាបថរបស់ជប៉ុនតែម្តង។ យោងតាមក្រសួងការបរទេសចិន ជប៉ុននៅមានការស្ទាក់ស្ទើរក្នុងការប្រឈមមុខនឹងបញ្ហាដែលមាននៅក្នុងទំនាក់ទំនងរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ