ជប៉ុនតវ៉ាជំទាស់នឹងបទវិចារណកថាកាសែតចិនដែលចង់ទាមទារអធិបតេយ្យលើកោះអូគីណាវ៉ា
រដ្ឋាភិបាលជប៉ុនបានធ្វើការតវ៉ាជាផ្លូវការទៅកាន់រដ្ឋាភិបាលចិន ក្រោយពីកាសែតរបស់បក្សកុម្មុយនិស្តចិនបានចុះផ្សាយនូវបទវិចារណកថាមួយ កាលពីថ្ងៃពុធម្សិលមិញ ទាមទារឲ្យក្រុងប៉េកាំងធ្វើការពិចារណាមើលឡើងវិញ ទៅលើលទ្ធភាពទាមទារយកកោះអូគីណាវ៉ាពីជប៉ុនមកវិញ។ អូគីណាវ៉ា ដែលជាប្រជុំកោះស្ថិតនៅចុងប៉ែកខាងត្បូងប្រទេសជប៉ុន ហើយដែលមានមូលដ្ឋានទ័ពអាមេរិកធំៗជាច្រើនកន្លែងនៅទីនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
បទវិចារណកថា ស្តីពីអធិបតេយ្យលើកោះអូគីណាវ៉ា ត្រូវបាននិពន្ធឡើងដោយអ្នកសិក្សាស្រាវជ្រាវពីររូប នៃបណ្ឌិតសភាសង្គមសាស្រ្តរបស់ចិន ហើយដែលត្រូវបានចុះផ្សាយនៅលើកាសែត People’s Daily ដែលជាកាសែតផ្លូវការរបស់គណបក្សកុម្មុយនិស្តចិន។
នៅក្នុងបទវិចារណកថានេះ អ្នកនិពន្ធបានសរសេរថា នៅពេលនេះ វាល្មមដល់ពេលហើយ ដែលចិនត្រូវធ្វើការត្រួតពិនិត្យមើលឡើងវិញ ចំពោះបញ្ហាអធិបតេយ្យ លើប្រជុំកោះ Ryukyu ដែលបច្ចុប្បន្ន កំពុងស្ថិតក្រោមការកាន់កាប់របស់ជប៉ុន។
ប្រជុំកោះ Ryukyu ដែលជប៉ុនហៅថា Nansei ស្ថិតនៅចុងប៉ែកខាងត្បូងបំផុត នៃប្រទេសជប៉ុន ដោយលាតសន្ធឹងជិតទៅដល់កោះតៃវ៉ាន់។ កោះ ដែលធំជាងគេ នៅក្នុងប្រជុំកោះនេះ គឺកោះអូគីណាវ៉ា ដែលនៅលើនោះ មានមូលដ្ឋានទ័ពអាមេរិកធំជាច្រើនកន្លែង រួមមានទាំងមូលដ្ឋានទ័ពអាកាសដ៏ធំមួយផងដែរ។
រដ្ឋាភិបាលជប៉ុនបានចេញមុខធ្វើការបដិសេធភ្លាមៗ ចំពោះការអះអាង នៅក្នុងបទវិចារណកថានេះ ដោយបានអះអាងថា អូគីណាវ៉ាស្ថិតក្រោមអធិបតេយ្យរបស់ជប៉ុនយ៉ាងច្បាស់លាស់ ដោយគ្មានអ្វីគួរឲ្យមន្ទិលសង្ស័យនោះទេ។ វាស្ថិតក្រោមការគ្រប់គ្រងរបស់ជប៉ុន ទាំងនៅលើដីជាក់ស្តែង ហើយទាំងមានការទទួលស្គាល់ពីសហគមន៍អន្តរជាតិ។
មន្រ្តីអ្នកនាំពាក្យរដ្ឋាភិបាលជប៉ុនបានប្រាប់អ្នកសារព័ត៌មាន នៅថ្ងៃព្រហស្បតិ៍នេះថា ជប៉ុនបានប្រាប់ទៅរដ្ឋាភិបាលចិនរួចហើយថា ជប៉ុនសូមតវ៉ាជំទាស់យ៉ាងខ្លាំងក្លាបំផុត ចំពោះអ្វីដែលបានសរសេរ នៅក្នុងបទវិចារណកថាម្សិលមិញនេះ ប្រសិនបើវាឆ្លុះបញ្ចាំងនូវជំហរផ្លូវការរបស់រដ្ឋាភិបាលក្រុងប៉េកាំង។ បើតាមអ្នកនាំពាក្យដដែល រដ្ឋាភិបាលចិនបានឆ្លើយតបមកវិញថា បទវិចារណកថានេះគ្រាន់តែជាអត្ថបទសរសេរដោយអ្នកសិក្សាស្រាវជ្រាវតែប៉ុណ្ណោះ។
ក៏ប៉ុន្តែ កាលពីថ្ងៃពុធម្សិលមិញនេះ ឆ្លើយតបទៅនឹងសំណួររបស់អ្នកកាសែត ដែលចោទសួរថា តើរដ្ឋាភិបាលចិនទទួលស្គាល់ថា ប្រជុំកោះ Ryukyu ជារបស់ជប៉ុនដែរឬក៏យ៉ាងណា អ្នកនាំពាក្យក្រសួងការបរទេសចិនបានព្យាយាមឆ្លើយពង្វាងទៅរឿងផ្សេង ដោយមិនបានបញ្ជាក់ឲ្យបានច្បាស់លាស់ អំពីជំហរផ្លូវការរបស់រដ្ឋាភិបាលក្រុងប៉េកាំង ចំពោះប្រជុំកោះនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ