អសបបោះឆ្នោតបញ្ជូនកងកម្លាំងអាហ្វ្រិកទៅម៉ាលី
ក្រុមប្រឹក្សាសន្តិសុខនៃអសប បានបោះឆ្នោតកាលពីម្សិលមិញជាឯកច្ឆ័ន្ទលើពង្រាងសេចក្តីសម្រេចចិត្តមួយស្នើឡើងដោយប្រទេសបារាំងដែលនឹងអនុញ្ញាតការដាក់ពង្រាយកងកម្លាំងទ័ពអាហ្វ្រិកនៅក្នុងប្រទេសម៉ាលីដើម្បីវាយកំចាត់ពួកឧទ្ទាមអ៊ីស្លាមនិយមជ្រុលនៅប៉ែកខាងជើងប្រទេសម៉ាលី។បេសកកម្មរបស់កងកម្លាំងទ័ពអាហ្វ្រិកនៅម៉ាលីនេះជាលើកដំបូងមានរយៈពេលមួយឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
អត្ថបទនៃសេចក្តីសម្រេចចិត្តដែលស្នើឡើងដោយប្រទេសបារាំង ជូនដល់អសប អនុញ្ញាតដល់ការដាក់ពង្រាយកងកម្លាំងអាហ្វ្រិកក្នុងអន្តរាគមន៍នៅប្រទេសម៉ាលីនិងចាត់វិធានការចាំបាច់នានាដោយអនុលោមតាមច្បាប់អន្តរជាតិដើម្បីវាយដណ្តើមកាន់កាប់តំបន់ភាគខាងជើងនៃប្រទេសម៉ាលីឡើងវិញ ដែល បានធ្លាក់ក្នុងកណ្តាប់ដៃរបស់ ពួកឧទ្ទាមប្រដាប់អាវុធអ៊ីស្លាមនិយមជ្រុលនិងពួក ឧទ្ទាម Touaegs ចាប់តាំងពីដើមឆ្នាំមុន ។
អត្ថបទដដែលនេះ អនុញ្ញាត ផងដែរ ដល់សហភាពអឺរ៉ុបនិងក្រុមបណ្តាប្រទេសផ្សេងទៀត ដែល ជាសមាជិករបស់អសប អាចចូលរួមក្នុងការជួយពង្រឹងដល់កងកម្លាំងសន្តិសុខនៃប្រទេសម៉ាលី។
ប្រតិបត្តិការកងទ័ពអន្តរជាតិ នៅប៉ែកខាងជើងនៃប្រទេសម៉ាលីនេះ នឹងមិនទាន់អាចអន្តរាគមទៅបាននៅមុនខែកញ្ញាឆ្នាំ២០១៣នោះទេ។ ម្យ៉ាងទៀត កងកម្លាំងអាហ្រ្វិកដែលត្រូវមានឈ្មោះថា « Afisma» នឹងត្រូវមានកងពលរបស់ខ្លួនរហូតដល់៣៣០០នាក់។
កងកម្លាំងអាហ្វ្រិកនេះ នឹងជួយអន្តរាគន៍ដល់កងទ័ពរដ្ឋាភិបាលម៉ាលីដើម្បីវាយដណ្តើមយកមកវិញនូវតំបន់នានាដែលស្ថិតនៅប៉ែកខាងជើងនៃដែនដីប្រទេសម៉ាលី និងដែលបច្ចុប្បន្ននេះកំពុងស្ថិតនៅក្រោមការត្រួតត្រា របស់ក្រុមភេរវនិយមប្រដាប់អាវុធ និងពួកឧទ្ទាមអ៊ីស្លាមនិយមជ្រុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ