លោកញ៉ឹក ប៊ុនឆៃ៖ ព្រះអង្គម្ចាស់ក្សត្រីអារុណរស្មីយល់ព្រមឈរឈ្មោះជាប្រធានគណបក្ស
នៅរសៀលថ្ងៃសុក្រទី១៥ កុម្ភៈ គណៈកម្មាធិការអចិន្ត្រៃយ៍នៃគណបក្សហ៊្វុនស៊ីនប៉ិច បានជួបប្រជុំគ្នា ដើម្បីរៀបចំសមាជថ្នាក់ជាតិនៅខែក្រោយ និងដើម្បីពិភាក្សាអំពីទម្រង់នៃរចនាសម្ព័ន្ធគណបក្សនេះឡើងវិញ។ កិច្ចប្រជុំថ្នាក់ដឹកនាំគណបក្សហ៊្វុនស៊ីនប៉ិចធ្វើឡើងភ្លាម បន្ទាប់ពីថ្នាក់ដឹកនាំគណបក្សនេះបានទទួលការយល់ព្រមជាគោលការណ៍ពីព្រះអង្គម្ចាស់ក្សត្រីនរោត្តម អារុណរស្មី ក្នុងការឈរឈ្មោះជាបេក្ខភាពប្រធានគណបក្ស។
ចុះផ្សាយនៅថ្ងៃ៖
ស្តាប់ - ០២:៤០
ចាប់ពីថ្ងៃទី២១ ខែមិនាក្រោយនេះទៅ ព្រះអង្គម្ចាស់ក្សត្រីនរោត្តម អារុណរស្មី នឹងក្លាយជាប្រធានគណបក្សជាស្រ្តីរបស់ហ៊្វុនស៊ីនប៉ិចដំបូងគេ។ លទ្ធផលបែបនេះអាចគេដឹងបានច្បាស់ បន្ទាប់ពីគណៈកម្មការនាយកបានផ្តិតមេដៃយាងព្រះអង្គម្ចាស់ក្សត្រីអារុណរស្មី បុត្រីពៅរបស់សម្តេចឪ នរោត្តម សីហនុ អោយធ្វើជាប្រធានគណបក្សហ៊្វុនស៊ីនប៉ិចនេះ ដើម្បីចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ នៅក្នុងខែ កក្កដាខាងមុខនេះ។
នៅថ្ងៃនេះទៀត លោក ញ៉ឹក ប៊ុនឆៃ ប្រធានប្រតិបត្តិរបស់គណបក្សហ៊្វុនស៊ីនប៉ិចក៏បានអះអាងប្រាប់វិទ្យុបារាំងអន្តរជាតិថា ព្រះអង្គម្ចាស់ក្សត្រីអារុណ រស្មី បានមានបន្ទូលយល់ព្រមតាមការយាងរបស់ថ្នាក់ដឹកនាំគណបក្សហ៊្វុនស៊ីនប៉ិចហើយ។ ហើយនៅរសៀលថ្ងៃសុក្រទី១៥ កុម្ភៈនេះ គណៈកម្មាធិការអចិន្ត្រៃយ៍របស់ហ៊្វុនស៊ីនប៉ិច បានពិភាក្សាគ្នាអំពីការរៀបចំសមាជថ្នាក់ជាតិ ដែលគ្រោងធ្វើនៅថ្ងៃទី២១ខែមិនា ព្រមទាំងទម្រង់នៃអង្គការលេខរបស់គណបក្សទៀតផង។
គេនៅមិនទាន់ដឹងថា តើលោក ញ៉ឹក ប៊ុនឆៃ ដែលជាអ្នកមានឥទ្ធិពលមួយរូបនៅក្នុងគណបក្សហ៊្វុនស៊ីនប៉ិចនោះ នឹងមានតួនាទីជាអ្វីឡើយ។ ការកែទម្រង់រចនាសម្ព័ន្ធចុងក្រោយរបស់គណបក្សហ៊្វុនស៊ីនប៉ិច បានសម្រេចអោយមានតួនាទីមគ្គុទេសន៍គណបក្ស ដែលបច្ចុប្បន្នកាន់កាប់ដោយលោកកែវ ពុទ្ធរស្មី ដែលជាស្វាមីរបស់ព្រះអង្គម្ចាស់ក្សត្រីអារុណរស្មី និងប្រធានប្រតិបត្តិ គឺលោក ញ៉ឹក ប៊ុនឆៃ។
នៅពេលដែលថ្នាក់ដឹកនាំគណបក្សហ៊្វុនស៊ីនប៉ិចសម្រេចជ្រើសរើសស្ត្រី ធ្វើជាប្រធានគណបក្សដោយចាត់ទុកថានេះជាយុទ្ធសាស្ត្រថ្មីនោះ លោក ញ៉ឹក ប៊ុនឆៃ ក៏បានពន្យល់ថា ការសម្រេចបែបនេះក៏មានមូលហេតុសមរម្យរបស់វាផងដែរ។
ថ្លែងប្រាប់វិទ្យុបារាំងអន្តរជាតិតាមទូរស័ព្ទនៅរសៀលថ្ងៃនេះ ប្រធានប្រតិបត្តិរបស់ហ៊្វុនស៊ីនប៉ិចបញ្ជាក់ថា ការជ្រើសតាំងព្រះអង្គម្ចាស់ក្សត្រីនរោត្តម អារុណរស្មី អោយធ្វើជាប្រធានគណបក្ស គឺទីមួយ ដើម្បីបង្ហាញពីភាពស្មោះស្ម័គ្ររបស់ហ៊្វុនស៊ីនប៉ិចចំពោះសម្តេចឪ ដែលជាស្ថាបនិកនៃគណបក្សនេះ។ ទី២ គឺដើម្បីបង្ហាញពីការលើកតម្កើងស្ត្រី ដែលជាចរន្តអន្តរជាតិ ហើយថាក៏ដោយសារអ្នកបោះឆ្នោតជាស្ត្រីក៏មានច្រើន។ មូលហេតុទី៣ចុងក្រោយនោះ គឺដើម្បីជម្រះការចោទប្រកាន់នានាកន្លងមក ដែលថាលោកមានបំណងចង់ធ្វើជាប្រធានដឹកនាំគណបក្សហ៊្វុនស៊ីនប៉ិចនោះ។
គណបក្សហ៊្វុនស៊ីនប៉ិចត្រូវបានបង្កើតឡើងតាមរយៈចលនាមួយ ដែលមានឈ្មោះថា រណសិរ្សរួបរួមជាតិដើម្បីកម្ពុជាឯករាជ្យ អព្យាក្រឹត សន្តិ និងសហប្រតិបត្តិការ ដោយសម្តេចឪ នរោត្តម សីហនុ នៅឆ្នាំ១៩៨១។ គណបក្សនេះដែលក្រោយមកដឹកនាំដោយព្រះអង្គម្ចាស់នរោត្តម រណឬទ្ធិ បុត្រាមួយអង្គរបស់សម្តេចឪ បានឈ្នះក្នុងការបោះឆ្នោតតែមួយដងគត់ នៅក្នុងនីតិកាលទី១ ឆ្នាំ១៩៩៣។ គណបក្សនេះកាន់តែអស់ប្រជាប្រិយភាពក្នុងគ្រប់ការបោះឆ្នោតក្រោយៗមកទៀត រហូតដល់បែកខ្ញែកជាពីរ និងមិនអាចចូលគ្នាវិញរហូតដល់សព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ