អ្នកនយោបាយប្រាប់មូលហេតុដែលអ្នកនយោបាយមិនអាចរួបរួមគ្នា
ក្រោយពីពិធីសម្ពោធស្តូបរំលឹកវិញ្ញាណក្ខន្ធអ្នកកាសែតដែលត្រូវបានសម្លាប់ ក្នុងចន្លោះឆ្នាំ១៩៧០ ដល់ ១៩៧៥នោះ អ្នកកាសែតបានសួរលោក ខៀវ កាញារីទ្ធ អ្នកនាំពាក្យរបស់រាជរដ្ឋាភិបាល អំពីការអនុវត្តន៍បណ្តាំរបស់សម្តេចឪ អំពីការរួបរួមគ្នានៃអ្នកនយោបាយ។ អ្នកនាំពាក្យរាជរដ្ឋាភិបាលថ្លែងថា ការរួបរួមនឹងអាចប្រព្រឹត្តិទៅបាន ប្រសិនបើគណបក្សនយោបាយនីមួយៗ ចេះគោរពគ្នា។ មានប្រសាសន៍ស្រដៀងគ្នា លោក កឹម សុខា ប្រធានគណបក្សសិទ្ធិមនុស្សយល់ថា អ្នកនយោបាយខ្មែរពិបាករកឱកាសអង្គុយជជែកគ្នា ដែលនេះគឺជាឧបសគ្គនៃការរួបរួម។
ចុះផ្សាយនៅថ្ងៃ៖
ស្តាប់ - ០១:៤៤
ប្រសិនបើអ្នកនយោបាយចង់និយាយអំពីការរួបរួម តាមបណ្តាំរបស់សម្តេចឪ នរោត្តម សីហនុ នោះ សម្រាប់លោក ខៀវ កាញារីទ្ធ ដែលជាអ្នកនាំពាក្យរាជរដ្ឋាភិបាល ការរួបរួមនោះគ្មានអ្វីពិបាកធ្វើនោះឡើយ។ ថ្លែងប្រាប់អ្នកសារព័ត៌មាន កាលពីរសៀលថ្ងៃពុធ បន្ទាប់ពីលោកចូលរួមក្នុងពិធីសម្ពោធស្តូបរំលឹកវិញ្ញាណក្ខន្ធអ្នកកាសែតរួចមក រដ្ឋមន្ត្រីក្រសួងព័ត៌មានបញ្ជាក់ថា ការរួបរួមត្រូវឈរលើគោលការណ៍គោរពគ្នា។ មន្ត្រីជាន់ខ្ពស់រាជរដ្ឋាភិបាលរូបនេះ កំពុងលើកឡើងអំពីការជេរប្រមាថរបស់ថ្នាក់ដឹកនាំគណបក្សប្រឆាំង មកលើរដ្ឋាភិបាល។
លោក ខៀវ កាញារីទ្ធ បានលើកឧទាហរណ៍មួយចំនួនដែលថាគណបក្សប្រឆាំងធ្លាប់រិះគន់គណបក្សកាន់អំណាច ថាក្បត់ជាតិជាដើម។ បើតាមលោករដ្ឋមន្ត្រីក្រសួងព័ត៌មាន តើគណបក្សប្រឆាំងត្រូវមកចាប់ដៃ ជជែកជាមួយគណបក្សកាន់យ៉ាងដូចម្តេច បើគណបក្សប្រឆាំងប្រមាថគណបក្សកាន់អំណាចយ៉ាងនេះ?
ថ្លែងពន្យល់ស្រដៀងគ្នាអំពីបណ្តាំនៃការរួបរួមរបស់សម្តេចឪ នរោត្តម សីហនុ ដែលលោក កឹម សុខា អះអាងថាជាការកសាងឯកភាពជាតិនោះ ប្រធានគណបក្សសិទ្ធិមនុស្សរូបនេះ ថ្លែងថាលោកគាំទ្រអោយអ្នកនយោបាយអង្គុយជាមួយគ្នា ដើម្បីដោះស្រាយបញ្ហាជាតិ។ សម្រាប់លោក កឹម សុខា ការរួបរួមមិនមែនមានន័យថាត្រូវមានគណបក្សតែមួយនោះឡើយ ប៉ុន្តែមានន័យថា អ្នកនយោបាយគ្រប់និន្នាការអាចអង្គុយនិយាយគ្នា ដើម្បីការអភិវឌ្ឍន៍ប្រទេសជាតិបាន។ ហើយថា លោកគាំទ្រគំនិតផ្តួចផ្តើមបែបនេះ។ លោក កឹម សុខា បន្តថា ការដែលអ្នកនយោបាយគ្មានឱកាសអង្គុយនិយាយគ្នានេះហើយ ដែលធ្វើអោយអ្នកនយោបាយពិបាករួបរួមគ្នានោះ។
អ្នកនយោបាយនៅកម្ពុជាត្រូវបានគេដឹងថា ធ្លាប់បានប្រើប្រាស់ពាក្យសំដីរិះគន់ ប្រមាថគ្នាខ្លាំងៗ ក្នុងពេលកន្លងមក ពិសេសនៅពេលមានការបោះឆ្នោតម្តងៗ។ កាលពីពេលថ្មីៗនេះ លោកនាយករដ្ឋមន្ត្រីបានប្រកាសគាំទ្រអោយមានច្បាប់ ស្តីពីក្រមសីលធម៌អ្នកនយោបាយទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ