រាជវង្សបញ្ជាក់ថា ព្រះរាជសារថ្ងៃទី៣០សីហា ជារាជសារពិតឥតក្លែងក្លាយ
ព្រះអង្គម្ចាស់ក្សត្រីនរោត្តម អរុណរស្មី ប្រធានគណបក្សហ្វ៊ុនស៊ិនប៉ិច និងជាព្រះអនុជរបស់សម្តេចព្រះបរមនាថ នរោត្តម សីហមុនី បានបញ្ជាក់ថា ព្រះរាជសារកាលពីថ្ងៃទី៣០សីហា ជាព្រះរាជសារពិតឥតក្លែងក្លាយ។ ការបញ្ជាក់បែបនេះបានធ្វើឡើង បន្ទាប់ពីមានអ្នកខ្លះសម្តែងមន្ទិលសង្ស័យទៅលើព្រះរាជសារនោះ។ ព្រះអង្គម្ចាស់ក្សត្រី អរុណរស្មី ក៏ចង់ឲ្យព្រះមហាក្សត្រកោះអញ្ជើញគណបក្សទាំងពីរមកប្រជុំផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ប្រធានគណបក្សហ៊្វុនស៊ិនប៉ិច ព្រះអង្គម្ចាស់ក្សត្រី នរោត្តម អរុណរស្មី បានបញ្ជាក់នៅក្នុងបណ្តាញសង្គមហ្វេសប៊ុករបស់ព្រះអង្គ កាលពីល្ងាចថ្ងៃចន្ទថា ព្រះរាជសាររបស់ព្រះមហាក្សត្រសម្តេចព្រះបរមនាថ នរោត្តម សីហមុនី កាលពីថ្ងៃទី ៣០សីហា គឺជាព្រះរាជសារពិតឥតក្លែងក្លាយ។
ក្រៅពីបញ្ជាក់បែបនេះ ព្រះអង្គម្ចាស់ក្សត្រីក៏មានបន្ទូលទៀតថា ក្នុងនាមព្រះអនុជរបស់ព្រះមហាក្សត្រ និងក្នុងនាមប្រធានគណបក្សហ៊្វុនស៊ិនប៉ិច ព្រះអង្គមានក្តីសង្ឃឹម និងបន់ឲ្យព្រះមហាក្សត្រកោះអញ្ជើញតំណាងគណបក្សប្រជាជនកម្ពុជា និងគណបក្សសង្គ្រោះជាតិមកពិភាក្សាគ្នា ក្រោមព្រះរាជាធិបតីរបស់ព្រះអង្គ ដើម្បីស្វែងរកដំណោះស្រាយនយោបាយ។
ជាដំណោះស្រាយដូចដែលអង្គសម្តេចឪ ព្រះបរមរតនកោដ្ឋ ធ្លាប់បានធ្វើកាលពីក្រោយការបោះឆ្នោត១៩៩៣ ឆ្នាំ១៩៩៨ និងឆ្នាំ២០០៣ ។
ទោះបីជាពេលនេះ គណបក្សហ៊្វុនស៊ិនប៉ិចបានបាត់បង់សំឡេងគាំទ្រទាំងស្រុងពីរដ្ឋសភាក៏ដោយ ក៏ព្រះអង្គម្ចាស់ក្សត្រី នរោត្តម អរុណរស្មី បានរម្លឹកពីគុណបំណាច់របស់ហ៊្វុនស៊ិនប៉ិចក្នុងការរក្សាសន្តិភាព និងស្ថិរភាពនយោបាយស្របតាមព្រះរាជតម្រិះរបស់អង្គសម្តេចឪ។ ព្រះអង្គម្ចាស់ក្សត្រីមិនអាចទាក់ទងបានទេនៅថ្ងៃនេះ ប៉ុន្តែ លោក កែវ ពុធរស្មី ស្វាមីរបស់ព្រះអង្គបានបញ្ជាក់ប្រាប់វិទ្យុបារាំងអន្តរជាតិថា សម្តេចព្រះអនុជពិតជាបានសរសេរបែបនេះក្នុងហ្វេសប៊ុកមែន។
ការបញ្ជាក់អះអាងរបស់សមាជិករាជវង្សយ៉ាងដូច្នេះបានធ្វើឡើង បន្ទាប់ពីមានអ្នកវិភាគខ្លះសម្តែងការសង្ស័យអំពីព្រះរាជសាររបស់ព្រះមហាក្សត្រ ដោយសារតែព្រះរាជសារនោះមានអត្ថន័យស្របគ្នាទៅនឹងគោលជំហររបស់គណបក្សប្រជាជនកម្ពុជា និងដោយសារតែព្រះរាជសារនោះគ្មានបញ្ជាក់ទីកន្លែងដែលព្រះអង្គកំពុងគង់ប្រថាប់។
គួរបញ្ជាក់ថា ក្នុងព្រះរាជសារថ្ងៃទី ៣០សីហា ព្រះមហាក្សត្របានជំរុញឲ្យគណបក្សនយោបាយដោះស្រាយបញ្ហាដោយគោរពរដ្ឋធម្មនុញ្ញ និងស្ថាប័នជាតិដែលមានស្រាប់។ ព្រះអង្គក៏បានសំណូមពរឲ្យប្រជាពលរដ្ឋខ្មែរស្ថិតនៅស្ងប់ស្ងៀម និងរក្សាសេចក្តីថ្លៃថ្នូររបស់ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ