មន្ត្រីការទូតជាន់ខ្ពស់ចិនម្នាក់ត្រូវដកចេញពីមុខតំណែងពីបទប្រព្រឹត្តអំពើពុករលួយ
លោកហ្សង់-គុនស្សេង ‘(Zhang Kunsheng) អនុរដ្ឋមន្ត្រីក្រសួងការបរទេសចិន ត្រូវបានគេដកចេញពីមុខតំណែង និងស្ថិតនៅក្រោមការស៊ើបអង្កេតមួយពីបទប្រព្រឹត្តអំពើពុករលួយ។ ជាមន្ត្រីការទូតជាន់ខ្ពស់ទីមួយ រងគ្រោះក្រោមទម្ងន់នៃយុទ្ធនាការប្រយុទ្ធប្រឆាំងទល់នឹងអំ់ពើពុករលួយរបស់អាជ្ញាធរចិនដែលកំពុងមានសុពលភាពយ៉ាងពេញទំហឹងនៅក្នុងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោកហ្សង់-គុនស្សេង មន្ត្រីការទូតជាន់ខ្ពស់ចិននេះ ត្រូវជាប់សង្ស័យពីបទបានរំលោភបំពានលើបទបញ្ជាផ្ទៃក្នុងនិងស្ថិតក្រោមទម្ងន់នៃការស៊ើបអង្កេតមួយ-នេះបើយោងតាមការគូសបញ្ជាក់របស់ក្រសួងការបរទេសចិននៅថ្ងៃសុក្រទី២មករានេះ ក្រោមសេចក្តីជូនដំណឹងយ៉ាងសង្ខេបនិងប្រើពាក្យស្រាលមិនធម្មតា ក្នុងការនិយាយពីបញ្ហាពុករលួយ។
ប៉ុន្តែក្រសួងការបរទេសចិន ក៏ពុំបានបញ្ជាក់ប្រាប់ ថាតើអង្គការណាមួយជាអ្នកទទួលបន្ទុកដឹកនាំការស៊ើបអង្កេតឬក៏ពីការស្តីបន្ទោសចំពោះរូបលោក ហ្សង់-គុនស្សេងដែរ។
លោកហ្សង់-គុនស្សេង គឺ ជាមន្ត្រីការទូតម្នាក់ក្នុងចំណោមមន្រ្តីការទូតចិន៤រូបដែលមានឋានៈជាអនុរដ្ឋមន្ត្រីក្រសួងការបរទេសចិន។
កាលពីប៉ុន្មានឆ្នាំមុន លោក ហ្សង់-គុនស្សេង ត្រូវបានកាសែតនានាដាក់ចំណងជើងយ៉ាងក្រឡោតនៅលើទំព័រទីមួយរបស់ខ្លួន ដោយនៅពេលនោះ លោកហ្សង់ បានធ្វើការស្តីប្រដៅជាសាធារណៈមន្ត្រីការទូតអាមេរិកមួយរូបកាលពីឆ្នាំ២០១២ បន្ទាប់ពីទីក្រុងវ៉ាស៊ីនតោនធ្វើការទិតៀន អំពីវត្តមាននៃបន្ទាយកងទ័ពចិនមួយដែលដាក់ប្រចាំការនៅសមុទ្រចិនភាគខាងត្បូង។
ជំនាន់នោះ លោកហ្សង់ បានទូន្មានលោក Robert Wang អនុរដ្ឋមន្ត្រីក្រសួងការបរទេសអាមេរិក ឲ្យនិយាយប្រាប់ដល់ភាគឺអាមេរិក កែប្រែឥរិយាបទភ័ន្តច្រឡំរបស់ខ្លួននិងធ្វើការគោរពបូរណភាពនិងអធិបតេយ្យភាពនៃដែនដីប្រទេសចិន។
គួររំលឹកថា លោកហ្សង់ បានឡើងបុណ្យសក្តិនៅក្នុងក្រសួងការបរទេស នៅពេលដែលលោកបានចូលបំរើការងារនៅក្នុងទស្សវត្សរ៍ឆ្នាំ៨០ ហើយ ជំនាន់នោះ ឥទ្ធិពលការទូតប្រទេសចិនកំពុងឡើងយ៉ាងខ្លាំងស្របគ្នានឹងសេដ្ឋកិច្ចដែរដែលមានការអភិវឌ្ឍដ៏រហ័ស។
យោងតាមទំព័រវិបសៃរបស់ក្រសួងការបរទេសចិន លោក Qin Gang ដែលបច្ចុប្បន្នជាអ្នកនាំពាក្យនៃក្រសួងការបរទេសចិនត្រូវបានគេដាក់ជំនួស លោកហ្សង់វិញក្នុងមុខតំណែងជាអនុរដ្ឋមន្ត្រីក្រសួងការបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ