អាជ្ញាធរឥណ្ឌូណេស៊ីទើបរកឃើញកន្ទុយយន្តហោះ Air Asia នៅសមុទ្រហ្សាវ៉ា
នាយកទីភ្នាក់ងារជាតិទទួលបន្ទុកប្រតិបត្តិការរុករកនិងជួយសង្គ្រោះរបស់ឥណ្ឌូណេស៊ី ទើបជូនដំណឹងនៅថ្ងៃពុធទី៧មករានេះ ថាអាជ្ញាធរ ទើបនឹងរកឃើញកន្ទុយយន្តហោះ AirAsia ដែលរងគ្រោះថ្នាក់ធ្លាក់កាលពីថ្ងៃទី២៨ធ្នូកន្លងមកនៅក្នុងបាតសមុទ្រ Java ប្រទេសឥណ្ឌូណេស៊ី។ បំណែកខាងក្រោយនៃយន្តហោះ AirAsia ត្រូវបានគេរកឃើញនៅពេលដែល ប្រតិបត្តិការស្វែងរុករកនេះ បានឈានចូលដល់ថ្ងៃទី១១។ គឺ នៅកន្ទុយយន្តហោះនេះហើយ មានផ្ទុកប្រអប់ខ្មៅកត់ត្រាទិន្និន័យយន្តហោះក្នុងពេលធ្វើដំណើរដែលអាចឲ្យគេយល់ដឹងពីមូលហេតុនៃគ្រោះថ្នាក់ធ្លាក់យន្តហោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ប្រតិបត្តិការស្វែងរកឃើញផ្នែកខាងក្រោយនៃយន្តហោះAir Asia គឺជាជោគជ័យមួយរបស់អាជ្ញាធរឥណ្ឌូណេស៊ី ពីព្រោះនៅកន្ទុយយន្តហោះនេះហើយ ដែលមានផ្ទុកប្រអប់ខ្មៅ។ ប្រអប់ខ្មៅ ដែលកត់ត្រាទុកទាំងអស់ទិន្នន័យយន្តហោះនៅពេលធ្វើដំណើរនិងក៏ជាភស្តុតាងដ៏សំខាន់មួយសំរាប់ស្វែងយល់ ដឹងពីមូលហេតុនៃគ្រោះថ្នាក់ ធ្លាក់យន្តហោះ ដែល បាន ដឹក អ្នកជិះ១៦២នាក់។
រហូតមកទល់ពេលនេះ ថ្វីបើឥណ្ឌូណេស៊ី បានធ្វើប្រតិបត្តិការស្វែងរុរកយន្តហោះក្នុងទ្រង់ទ្រាយដ៏ធំយ៉ាណាក្តី រួមទាំងជំនួយពីប្រទេសក្រៅដូចយ៉ាងប្រទេសបារាំង សហរដ្ឋអាមេរិកនិងរុស្ស៊ីក៏នៅតែមិនទាន់បានទទួល លទ្ធផលអ្វីគួសមឡើយ នៅក្នុងការស្វែងរកសាកសពនិងបំណែកយន្តហោះដោយមូលហេតុតែអាកាសធាតុអាក្រក់ខ្លាំងពេក។
មកទល់ពេលនេះ គេទើបស្រង់បានសាកសពចំនួន៤០នាក់ហើយនៅកោះBornéo។
គួររំលឹកថា យោងតាមទីភ្នាក់ងារឧតុនិយមឥណ្ឌូណេស៊ីយន្តហោះ AirAsia អាចធ្លាក់ដោយសារអាកាសធាតុអាក្រក់ខ្លាំងពេកនិងបានបាត់ស្រមោលពី Ecran Radar នៅពេលហោះចេញពីក្រុងឥណ្ឌូនេស៊ី Surabaya បន្ទាប់ពី បានប្រឈមមុខទល់នឹងការគំរាមយ៉ាងខ្លាំងដោយដុំពពកព្យុះភ្លៀង។
យោងតាមអាជ្ញាធរឥណ្ឌូណេស៊ី ក្នុងពេលនេះ ក្រុមប្រតិបត្តិការរុករក កំពុងតែប្រឹងប្រែងយ៉ាងអស់ពីសមត្ថភាពដើម្បីកំណត់ស្វែងរកកន្លែងដែលមានប្រអប់ខ្មៅរបស់យន្តហោះក៏ព្រមទាំងបំណែកយន្តហោះផ្សេងទៀត រួមទាំងសាកសពអ្នកជិះយន្តហោះនៅសេសសល់ ដើម្បីសម្រន់សេចក្តីឈឺចាប់របស់ក្រុមគ្រួសារគេ។
ទន្ទឹមនេះ ប្រធានអគ្គនាយកនៃក្រុមហ៊ុន Air Asia ឥណ្ឌូនេស៊ី បានបញ្ចាក់ថា ក្រុមហ៊ុននឹងសងប្រាក់សោហ៊ុយដល់ក្រុមគ្រួសារជនរងគ្រោះចំនួន ២ម៊ឺនអឺរ៉ូ សម្រាប់ជនរងគ្រោះម្នាក់ៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ