បារាំងបញ្ជូនភ្នាក់ងារទៅជួយរុករកយន្តហោះ AirAsia
ការិយាល័យអង្កេតការណ៍ និងសន្តិសុខផ្លូវអាកាសរបស់បារាំង បានបញ្ជូន ភ្នាក់ងាររបស់ខ្លួន ទៅឥណ្ឌូណេស៊ី ដើម្បីសហការ ជួយស្វែងរក ប្រអប់ខ្មៅរបស់យន្តហោះ AirAsia ដែលបានលិច នៅបាទសមុទ្រ។ ចំនួនសាកសព ដែលគេបានស្រង់ចេញពីទឹក ក៏មានការកើនឡើង ដល់ ១៦នាក់ហើយ។ អាជ្ញាធរឥណ្ឌូណេស៊ី មានសុទិដ្ឋិនិយមថា ការស្រាវជ្រាវ នឹងបានលទ្ធផល ឆាប់ៗ ទោះបីជាខ្យល់ និងរលកធំៗ កំពុងរំខាន ក្រុមការងារយ៉ាងណាក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ការរិយាល័យអង្កេតការណ៍ និងសន្តិសុខផ្លូវអាកាសរបស់បារាំង ដែលហៅកាត់ថា BEA បានឲ្យដឹងថា ភ្នាក់ងារជំនាញរបស់ខ្លួន កំពុងតែធ្វើដំណើរទៅឥណ្ឌូណេស៊ី ដើម្បីផ្តល់ជំនួយបច្ចេកទេស ដល់ក្រុមរុករករបស់ឥណ្ឌូណេស៊ី ដែលពុំសូវជាមាន បទពិសោធន៍ គ្រប់គ្រាន់ ក្នុងការស្វែងរក ប្រអប់ខ្មៅក្នុងបាតសមុទ្រ។
ក្រុមភ្នាក់ងាររបស់បារាំង ក៏បាននាំយក ឧបករណ៍ថតសំឡេង នៅបាតសមុទ្រ ដែលជាបច្ចេកវិទ្យាចុងក្រោយ ដើម្បីស្រាវជ្រាវចាប់រលកសញ្ញា របស់ប្រអប់ខ្មៅ ទាំងពីររបស់យន្តហោះ។ សូមបញ្ជាក់ថា ការិយាល័យ អង្កេតការណ៍ និងសន្តិសុខផ្លូវអាកាសបារាំង ជាការិយាល័យ ដែលមានបទពិសោធន៍ និងជំនាញច្បាស់លាស់ជាងគេ ក្នុងការស្រាវជ្រាវ រកមូលហេតុធ្លាក់យន្តហោះ។
ការរុករក របស់ក្រុមការងារ នៅក្នុងសមុទ្រហ្សាវ៉ា កំពុងប្រព្រឹត្តិទៅ យ៉ាងលំបាក ដោយសារតែមេឃខ្មៅ មានខ្យល់ និងរលកធំៗ មានកំពស់ដល់ទៅជាង ៥មែត្រ ក៏មានដែរ។ ដែលរំខាន ដល់ក្រុមអ្នកមុជទឹកបាតសមុទ្រ។ បច្ចុប្បន្ននេះ មានកប៉ាល់ចំនួន ២៩ ព្រមទាំង យន្តហោះចំនួន ១៧ គ្រឿង ដែលចូលរួមក្នុងបេសកកម្មនេះ។ ក្រៅតែពីខ្យល់ និងរលកធំៗ ការរុករកជួបការលំបាក ដោយសារតែតំបន់នេះ មានសំបូរទៅដោយ ខ្មោចកប៉ាល់ចាស់ៗ ដែលបានលិច ក្នុងពេលសង្រ្គាមលោកលើកទីពីរ។ ដូច្នេះ វត្ថុដែលស្រង់ចេញមកបាន មិនប្រាកដថា ជារបស់យន្តហោះ ដែលទើបធ្លាក់នោះទេ។
តាមការប៉ាន់ស្មានរបស់ក្រុមរុករក ខ្លួនយន្តហោះ អាចនៅក្នុងជំរៅទឹក ពី ២៥ ទៅ ៣០ មែត្រ។ ដោយសារតែ សាកសពមនុស្ស និងវត្ថុផ្សេងៗ ដែលបានរកឃើញ គឺស្ថិតនៅក្នុងបរិវេណ ដែលមានផ្ទៃក្រឡា មិនសូវជាឆ្ងាយ ពីគ្នាណាស់ណា ក្រុមការងារបានសន្និដ្ឋានថា តួខ្លួនយន្តហោះ និងប្រអប់ខ្មៅ ក៏នៅមិនឆ្ងាយពីនោះដែរ។ អ្នកស្រាវជ្រាវ ក៏បានសន្និដ្ឋានទៀតថា យន្តហោះប្រហែលជាបាន ធ្វើការចុះចតលើសមុទ្រ បានដោយជោគជយ័ ប៉ុន្តែត្រូវបានរលកវាយបោក ធ្វើឲ្យលិច ព្រោះថា សាកសពមួយចំនួន មានពាក់អាវពោង ជាប់នឹងខ្លួន។
ចំណែកនៅក្រុងស៊ូរ៉ាបាយ៉ា ឯណោះ សាកសពទាំង១៦ ត្រូវគេ បញ្ជូនយកទៅ ទុកក្នុងអាគារមួយ ដើម្បីឲ្យក្រុមគ្រូសារសព មកព្រួតពិនិត្យ និងទទួលយកទៅធ្វើបុណ្យ។ សាកសព មួយចំនួន ត្រូវបានក្រុមគ្រូសារ រៀបចំធ្វើពីធីបញ្ចុះសព តាមប្រពៃណី ឥណ្ឌូណេស៊ី រួចរាល់ហើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ