ក្រុមរុករក រកឃើញបំណែកធំៗរបស់យន្តហោះ AirAisa ដែលធ្លាក់ក្នុងបាតសមុទ្រ
ក្រុមរុករក បានរកឃើញបំណែកធំ ពីរនៃយន្តហោះ AirAsia ជើងហោះហើរ 8501 ដែលបានធ្លាក់ចូលទៅសមុទ្រកាលពីចុងសប្តាហ៍មុន ជាមួយនិងអ្នកដំណើរសរុប ១៦២នាក់។ នេះបើតាមមន្ត្រីស្រាវជ្រាវជាន់ខ្ពស់ឥណ្ឌូណេស៊ីនិយាយនៅថ្ងៃសៅរ៍នេះ។
ចុះផ្សាយនៅថ្ងៃ៖
ស្តាប់ - ០១:៥០
ប្រតិបត្តិការរុករកដ៏ធំដែលរួមមានទាំងឥណ្ឌូនេស៊ី និងអន្តរជាតិ បានប្រទះឃើញបំណែកធំពីរ របស់យន្តហោះ AirAsia នៅក្នុងសមុទ្រហ្សាវ៉ា ក្បែរកោះប័រណេអូកាលពីយប់ថ្ងៃសុក្រកន្លងទៅនេះ ដែលធ្វើឲ្យមានក្តីសង្ឃឹមថា សាកសពជនរងគ្រោះនៅសេសសល់ និងប្រអប់ខ្មៅ ដែលជាភស្តុតាងដ៏សំខាន់ក្នុងការបញ្ជាក់ពីមូលហេតុនៃការធ្លាក់យន្តហោះនោះ នឹងរកឃើញនៅពេលឆាប់ៗនេះ។
រហូតមកទល់នឹងពេលនេះ មានសាកសពចំនួន ៣០ ហើយដែលត្រូវបានរកឃើញ ហើយស្រង់ចេញពីទឹកសមុទ្រ។
ប្រធានក្រុមភ្នាក់ងារជួយសង្គ្រោះបានប្រាប់អ្នកកាសែតថា ជាមួយនិងការរកឃើញការកំពប់ប្រេង និងបំណែកធំពីររបស់យន្តហោះដែលមានទំហំ ១០ម៉ែត្រ គុណ និង ៥ម៉ែត្រនេះ គេអាចសន្និដ្ឋានបានយ៉ាងច្បាស់ថា នេះគឺជាបំណែករបស់យន្តហោះ ដែលក្រុមជួយសង្គ្រោះកំពុងតែស្វែងរក។
ប្រធានក្រុមរូបនោះ បានបន្តទៀតថា នៅពេលនេះ ក្រុមអ្នកមុជទឹកត្រូវបានបញ្ជូនទៅកាន់កន្លែងដែលរកឃើញបំណែកធំពីរនោះហើយ ដើម្បីស្វែងរកសាកសពជនរងគ្រោះបន្ថែមទៀត។ ហើយគោលបំណងសំខាន់បំផុតគឺស្វែងរក ហើយនឹងជួយរំដោះជនរងគ្រោះ។
ព័ត៌មានស្តីពីការរកឃើញបំណែកធំទាំងពីរនេះ ត្រូវបានប្រកាសឲ្យដឹង បន្ទាប់ពីរដ្ឋមន្ត្រីដឹកជញ្ជូនឥណ្ឌូណេស៊ី បាននិយាយថា យន្តហោះ AirAsia បានហោះចេញដោយខុសពេលកំណត់ នៅពេលដែលវាបានធ្លាក់នោះ។ យន្តហោះធំៗ ត្រូវបានផ្អាកមិនឲ្យហោះហើរ លើផ្លូវពី ទីក្រុងស៊ូរ៉ាបាយ៉ា ទៅកាន់សិង្ហបុរីឡើយ។
លោករដ្ឋមន្ត្រីបានបន្ថែមថា ជើងហោះហើរពី ស៊ូរ៉ាបាយ៉ា ទៅកាន់សិង្ហបុរីនេះ និងបើកឡើងវិញ នៅពេលណាដែលការស៊ើបអង្កេតចប់រួចរាល់។
បើតាមសេចក្តីថ្លែងការណ៍របស់អ្នកនាំពាក្យក្រសួងដឹកជញ្ជូន បាននិយាយថា យន្តហោះ AirAsia មិនត្រូវបានអនុញ្ញាតិឲ្យហោះហើរលើផ្លូវ ពី ស៊ូរ៉ាបាយ៉ា ទៅកាន់សិង្ហបុរី នៅថ្ងៃអាទិត្យនោះទេ ហើយក៏មិនបានសុំប្តូរពេលកំណត់ដែរ។
រហូតមកទល់នឹងពេលនេះ នៅតែមានភាពស្រពិចស្រពិល ពីមូលហេតុដែលយន្តហោះ AirAsia អាចហោះហើរបានដោយគ្មានការអនុញ្ញាតចាំបាច់ណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ