អំពើភេរវកម្មសម្លាប់ទាហានអាមេរិកាំង៧នាក់ នៅអាហ្វហ្កានីស្ថាន
នៅប្រទេសអាហ្វហ្កានីស្ថាន ការផ្ទុះគ្រាប់បែក និងការបាញ់សម្លាប់គឺជាអំពើភេរវកម្មពីរដែលបានកើតឡើងនៅទីកន្លែងផ្សេងគ្នា កាលពីថ្ងៃសៅរ៍ម្សិលមិញនេះ ធ្វើអោយទាហានអាមេរិកាំង៧នាក់ស្លាប់បាត់បង់ជីវិត។ ក្រុមឧទ្ទាមតាលីបង់បានប្រកាសថាខ្លួនជាអ្នកបង្កអំពើភេរវកម្មទីពីរ ដែលបានសម្លាប់ទាហានអាមេរិកាំងពីរនាក់។
ចុះផ្សាយនៅថ្ងៃ៖
ស្តាប់ - ០១:៣១
កាលពីថ្ងៃសៅរ៍ម្សិលមិញ នៅក្នុងតំបន់ Maiwand ក្នុងខេត្ត Kandahar ភាគខាងត្បូងប្រទេសអាហ្វហ្កានីស្ថាន រថយន្តរបស់ទ័ពអាមេរិកាំងដែលជាទ័ពជំនួយផ្នែកសន្តិសុខអន្តរជាតិ បានត្រូវប្រហារដោយការផ្ទុះគ្រាប់បែកមួយគ្រាប់។ ក្នុងខេត្ត Kandahar តំបន់ Maiwand ត្រូវបានគេចាត់ទុកថាជាតំបន់ដែលមានគ្រោះថ្នាក់ជាងគេ។
ទន្ទឹមនេះដែរ អំពើភេរវកម្មមួយទៀតបានកើតឡើងក្នុងខេត្តFarah ភាគខាងលិចប្រទេស បានសម្លាប់ទាហានអាមេរិកាំងពីរនាក់។ អំពើភេរវកម្មទីពីរនេះកើតឡើង នៅក្នុងក្របខណ្ឌនៃប្រតិបត្តិការមួយរបស់កងសន្តិសុខអាហ្វហ្កានីស្ថាន។ នៅពេលនោះ ទាហានអាហ្វហ្កានីស្ថានម្នាក់បានប្រើអាវុធខ្លួន បាញ់ទៅលើទាហានអាមេរិកាំងច្រើនរូបដែលស្ថិតនៅទីតាំងFarah ក្នុងសង្កាត់ Bala Boluk ធ្វើអោយទាហានអាមេរិកាំងពីរនាក់បាត់បង់ជីវិត។
ក្រុមឧទ្ទាមតាលីបង់ បានប្រកាសថាក្រុមខ្លួនជាអ្នកបង្កអំពើភេរវកម្មនេះ ហើយប្រាប់ទៀតថា ទាហានដែលបានបាញ់ទៅលើទ័ពអាមេរិកាំងនោះ គឺជាទាហានមូចាហ៊ីដបង្កប់ខ្លួនក្នុងទ័ពអាហ្វហ្កានីស្ថាន។ លើសពីនេះ ក្រុមតាលីបង់បានបំផ្លើសថា ទាហានរូបនោះបានកំទេចកងទ័ពអាមេរិកាំងដល់ទៅ៤នាក់។ ការបំផ្លើសបែបនេះ វាគឺជាទំលាប់ធម្មតារបស់ក្រុមតាលីបង់។
គិតជាសរុបក្នុងសប្តាហ៍នេះ មានទាហានអាមេរិកាំងចំនួន២១នាក់ហើយដែលបានស្លាប់នៅប្រទេសអាហ្វហ្កានីស្ថាន។ កាលពីថ្ងៃអង្គារកន្លងទៅ ការផ្ទុះគ្រាប់បែកមួយគ្រាប់នៅ Helmand បានសម្លាប់ទាហានអង់គ្លេសពីរនាក់ផងដែរ។
ក្រុមតាលីបង់បានប្រកាស នៅថ្ងៃអាទិត្យសប្តាហ៍មុន ថាក្រុមខ្លួនបានបើកប្រតិបត្តិការវាយលុកនៅនិទាឃរដូវនេះ ដោយមានគោលដៅសំខាន់គឺកំទេចកងទ័ពបរទេស និងបំផ្លាញរាល់អត្ថប្រយោជន៍ការទូតនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ