អាមេរិក ទិញឧទ្ធម្ភាគចក្ររុស្ស៊ី សម្រាប់កងអាកាសអាហ្វហ្កានីស្ថាន
ទិញនេះគឺឧទ្ធម្ភាគចក្រយោធាធុន Mi-17 ចំនួន២១គ្រឿង តម្លៃសរុប៣៦៧លាន៥សែនដុល្លារអាមេរិក។ ក្នុងតម្លៃនេះ គឺបូកទាំងថ្លៃសេវ៉ាជួសជុល ថ្លៃគ្រឿងបន្លាស់ និងថ្លៃ បង្វឹកបង្ហាត់ក្រុមអ្នកបើកបរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ដំណឹងនេះ ទើបចេញផ្សាយព្រឹកមិញដោយមធ្យោបាយឃោសនាមហាជននៅរុស្ស៊ី ក្រោយពីរុស្ស៊ីនិងស.រ.អា បានសម្របយោបល់គ្នាដាច់ស្រេចជាស្ថាពរទៅលើល័ក្ខខ័ណ្ឌនៃកុងត្រាទិញលក់នេះដែលបានទទួលការពិភាក្សា អស់ដល់ជាងមួយឆ្នាំ។
នៅដើមឡើយ កិច្ចចរចាមានធ្វើគឺរវាងទីក្រុងម៉ូស្គូ និងបក្សសម្ពន្ធអូតង់។ ហើយ ក្នុងដំណើរប្រព្រឹត្តទៅនៃកិច្ចចរចានោះ អូតង់រមែងបញ្ចុះបញ្ចូលរុស្ស៊ីឲ្យផ្តល់ទៅទីក្រុងកាប៊ូល ជាជំនួយកុំគិតថ្លៃអី នូវឧទ្ធម្ភាគចក្រទាំង២១គ្រឿងនោះ ក្នុងឋានៈជាវិភាគទានដែលរុស្ស៊ីរួមទៅក្នុងការធានាឲ្យមានស្ថិរភាពនៅប្រទេសអាហ្វហ្កានីស្ថាន។ ប៉ុន្តែទីក្រុងម៉ូស្គូ រៀងរាល់តែលើកតែងប្រកែកពុំយល់ព្រមតាមសំណើនេះឡើយ។
លុះនៅខែសីហាឆ្នាំទៅមិញ ប្រមុខការទូតរុស្ស៊ីលោក Serguei Lavrov បានថ្លែងថា ដំណោះស្រាយនឹងត្រូវរកឃើញគឺក្នុង១ខែ-១ខែកន្លះទៀត។ បន្ទាប់មក កិច្ចចរចា ក៏ស្ទះនៅមួយកន្លែងតែម្តង ពីព្រោះពួកប្រទេសអូតង់ មិនអាចរកលុយបានគ្រប់គ្រាន់សម្រាប់ទិញ។
គឺពេលនោះឯងដែលស.រ.អា. សម្រេចថាភ្ជាប់ខ្លួនធ្វើកិច្ចចរចាឲ្យបានដិតដល់មែនទែន។
ទោះយ៉ាងណាក្តី ក៏អូតង់នៅតែខំតថ្លៃឲ្យរុស្ស៊ីបញ្ជូនទៅអាហ្វហ្កានីស្ថានយ៉ាងហោចណាស់ឲ្យបាន៣គ្រឿងទៅដែរ កុំយកថ្លៃអ្វី ពីក្នុងចំណោមឧទ្ធម្ភាគចក្រ២១គ្រឿងនោះ។ ដោយឃើញរុស្ស៊ីមិនសាទរចំពោះសំណើថ្មីនេះ ទីក្រុងវ៉ាស៊ីនតោន ក៏ចេញមុខទទួលរ៉ាប់រងបង់តែម្នាក់ឯងថ្លៃទិញទាំង២១គ្រឿងនេះ។ ជាតុល្យាការ កុងត្រាដែលត្រូវចុះនៅថ្ងៃមុខ នឹងមានលក្ខណៈទ្វេភាគីសុទ្ធសាធ គឺតែរវាងរុស្ស៊ីនិងអាមេរិក។
ជាការកត់សំគាល់ ឧទ្ធម្ភាគចក្ររុស្ស៊ី ធុន Mi-17 មានផលិតសម្រាប់គោលដៅស៊ីវិលផង យោធាផង ៖ តម្លៃវាមួយគ្រឿងៗ ធុនស៊ីវិល គឺ ក្នុងចន្លោះពី ៧ទៅ១០លានដុល្លារអាមេរិក។ ធុនប្រដាប់ទៅដោយសព្វាវុធ សម្រាប់បំពាក់កងទ័ព ក្នុងករណីដែលមាន គឺកងអាកាសអាហ្វហ្កានីស្ថាន ១គ្រឿងៗថ្លៃ១៧លាន៥សែនដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ