អគ្គិភ័យរោងចក្រកាត់ដេរសម្លាប់មនុស្សយ៉ាងហោច៨នាក់នៅបង់ក្លាដែស
នៅប្រទេសបង់ក្លាដែស នៅថ្ងៃព្រហស្បតិ៍នេះ មានមនុស្សយ៉ាងហោចណាស់៨នាក់បានស្លាប់ក្នុងគ្រោះអគ្គិភ័យមួយ នៅរោងចក្រកាត់ដេរមួយកន្លែងក្នុងក្រុងDacca។ ម្ចាស់រោងចក្រក៏បានបាត់បង់ជីវិត ក្នុងគ្រោះអគ្គិភ័យនេះដែរ។ គេនៅមិនទាន់ដឹងពីមូលហេតុច្បាស់លាស់នៃឧបទ្ទេវហតុនេះនៅឡើយទេ។ គ្រោះអគ្គិភ័យនេះបានកើតឡើងត្រឹមតែពីរសប្តាហ៍ប៉ុណ្ណោះ បន្ទាប់ពីអគារពាណិជ្ជកម្ម Rana Plaza បានបាក់រលំ និងបានសម្លាប់មនុស្ស៩១២នាក់មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
គ្រោះអគ្គិភ័យបានកើតឡើង នៅយប់ថ្ងៃពុធចូលព្រឹកថ្ងៃព្រហស្បតិ៍ នៅរោងចក្រកាត់ដេរមួយTung Hai ស្ថិតក្នុងសង្កាត់ Darussalam ក្នុងក្រុងDacca។ ជនរងគ្រោះស្លាប់ដោយសារតែថប់ដង្ហើម និងជាប់ខ្លួននៅក្នុងជណ្តើរទៅណាមិនរួច ដោយសារតែផ្សែងពុលបង្កដោយការឆេះសម្លៀកបំពាក់ដែលមានធាតុ acrylique។
ក្នុងចំណោមអ្នកស្លាប់ក្នុងអគ្គិភ័យនេះ មានម្ចាស់រោងចក្រកាត់ដេរ និងបុគ្គលិកបំរើការងារ៤នាក់ ព្រមទាំងប៉ូលិសពីរនាក់ផងដែរ។ អគ្គិភ័យបានឆាបឆេះនៅពេលយប់ គឺពេលដែល រោងចក្រមិនដំណើរការ ដូច្នេះគ្មានកម្មកររោងចក្រណាម្នាក់រងគ្រោះនោះទេ។
អគ្គិភ័យនេះបានកើតឡើងត្រឹមតែពីរសប្តាហ៍ប៉ុណ្ណោះ បន្ទាប់ពីអគារពាណិជ្ជកម្ម Rana Plaza បានបាក់រលំនិងបានសម្លាប់មនុស្សជាង៩០០នាក់មក។ ការរុករកជនរងគ្រោះនៅអគារនេះ នៅតែបន្តធ្វើនៅឡើយ។ ក្រុមការងារសង្ឃឹមថា នឹងបញ្ចប់ការរុករកនៅថ្ងៃសុក្រស្អែកនេះហើយ។
បង់ក្លាដែសជាប្រទេសទីពីរ ក្នុងពិភពលោក ដែលនាំសម្លៀកបំពាក់ចេញទៅបរទេស។ វិស័យកាត់ដេរជាគ្រឹះសំខាន់នៃសេដ្ឋកិច្ចជាតិ។ ប៉ុន្តែ ល័ក្ខខ័ណ្ឌសុវត្ថិភាពការងារកម្មករមានគុណវិបត្តិច្រើនលើសលុប។ គ្រោះអគ្គិភ័យតែងតែកើតឡើង នៅតាមរោងជាងកាត់ដេរដែលមានប្រហែល៤៥០០ កន្លែង ក្នុងប្រទេស។ រោងជាងភាគច្រើនមានទីតាំងនៅក្នុងអគារចាស់ៗដែលគេបោះបង់ចោល រឺក៏នៅក្នុងសំណង់អគារមិនរឹងមាំ។ រីឯប្រព័ន្ធអគ្គិសនីរោងជាងទៀតសោត មិនសូវជាមានការពិនិត្យគ្រប់គ្រងអោយបានដិតដល់នោះទេ។
ជាវិធានការបន្ទាន់ ដើម្បីឆ្លើយតបទៅនឹងពាក្យដែលខ្លួនបានសន្យាទៅអង្គការការងារអន្តរជាតិ នៅថ្ងៃពុធម្សិលមិញ រដ្ឋាភិបាលបង់ក្លាដែសបានបិទទ្វាររោងចក្រកាត់ដេរចំនួន១៨ នៅក្រុងDacca និងក្រុងChittagong។ ក្រុមហ៊ុនសំលៀកបំពាក់បរទេសនានា បានរិះគន់ការខ្វះខាតការធានាសន្តិសុខរោងចក្រកាត់ដេរបង់ក្លាដែស ប៉ុន្តែនៅតែបិទភ្នែក បន្តការបញ្ជាទិញសម្លៀកបំពាក់នៅប្រទេសនេះដដែល។
ទាក់ទងនឹងល័ក្ខខ័ណ្ឌការងារនៅបង់ក្លាដែស នៅថ្ងៃពុធម្សិលមិញ ក្រុមឯកទេសការងារអង្គការសហប្រជាជាតិមួយក្រុមបានជំរុញអោយក្រុមហ៊ុនបរទេសដែលមានយីហោល្បីល្បាញ នៅបន្តវត្តមានខ្លួនក្នុងប្រទេសនេះ ដោយងាកមកសហការអោយបានជិតដិតជាមួយរដ្ឋាភិបាល ព្រមទាំងជាមួយអង្គការអន្តរជាតិ និងសង្គមស៊ីវិលនានាវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ