ភ័ព្វអាក្រក់របស់បិន អាលី និងក្រុមគ្រួសារ
ចុះផ្សាយនៅថ្ងៃ៖
ស្តាប់ - ០៨:០៣
នៅថ្ងៃព្រហស្បតិ៍ម្សិលមិញ រដ្ឋាភិបាលបណ្តោះអាសន្ននេះបានប្រកាសធ្វើការកាន់ទុក្ខដល់អ្នកដែលបាន ស្លាប់ក្នុងការតវ៉ាតាមផ្លូវក្នុងមួយខែចុងក្រោយនេះ។ នៅក្នុងសប្តាហ៍នេះ ក្រោយពីបានផ្តួលរំលំបិន អាលី ចេញពីតំណែងប្រធានាធិបតី ពួកក្រុមបាតុករនៅបន្តតវ៉ាឲ្យរដ្ឋាភិបាលបណ្តោះអាសន្នរំលាយចោល វិញ ពីព្រោះពួកគេចោទថា រដ្ឋាភិបាលបច្ចុប្បន្នមានចូលរួមពីបក្សពួករបស់លោកបិន អាលី។
លោកបិន អាលី ដែលកាន់អំណាចជាប់ៗគ្នា ៥អាណត្តិ មកហើយ និងដែលធ្លាប់តែគេទទួលស្គាល់បានអនុវត្តអំណាចផ្តាច់ការទៅលើ ប្រជាជន បែរជាពេលនេះ ធ្លាក់ខ្លួន រត់ទៅសុំជ្រកកោននៅបរទេសទៅវិញ។ ដើម្បីយល់ពីភាពក្រឡាប់ចាក់នេះ គេតោងមើលទៅលើឬសគល់របស់វា។ រឿងហេតុដំបូងឡើយដែលបង្កឲ្យមានកុប្បកម្ម ការងើបប្រឆាំងបះបោររបស់ប្រជាជនទុយនីស៊ី នោះ គឺយុវជនលក់បន្លែម្នាក់បានដុតខ្លួនគាត់ ដើម្បីប្រឆាំងទៅនឹងវិធានការក្តៅរបស់ប៉ូលិសដែលបានហាមគាត់មិនឲ្យ លក់បន្លែ ដោយគ្មានការអនុញ្ញាតពីអាជ្ញាធរ។ រឿងនេះ បានបង្កឲ្យទៅជាមានការមិនពេញចិត្ត និងការខឹងសម្បាររបស់យុវជនទុយនីស៊ី ប្រឆាំងនឹងអាជ្ញាធរទុយនីស៊ី។ ចលនាប្រឆាំង មានកាន់តែច្រើន ជាពិសេសនៅពេលដែលយុវជន ភាគច្រើនដែលរៀនបានសញ្ញាបត្រខ្ពស់ បានបន្ទោសរដ្ឋាភិបាលមិនបានអើពើផ្តល់ការងារដល់ពួកគេ។
ជារួម គេឃើញ ចលនាកុប្បកម្មរបស់ប្រជាជនទុយនីស៊ី ក្នុងរយៈពេលជិតមួយខែនេះរហូតធ្វើឲ្យមានមនុស្សស្លាប់ជិត ១០០នាក់ ទីបំផុតទទួលបានផ្លែផ្កា ដោយប្រធានាធិបតីបានរត់ចេញពីតំណែង និងទុកឲ្យគេបង្កើតរដ្ឋាភិបាលបណ្តោះអាសន្នមួយដែលគ្មានលំនឹង បច្ចុប្បន្ននេះ។
តើគ្រាន់តែការទាមទាររបស់បាតុករជាច្រើនម៉ឺននាក់ប៉ុណ្ណឹងអាចផ្តួល រំលំរដ្ឋាភិបាលរបស់លោកបិន អាលីយ៉ាងម៉េចនឹងកើតនោះ ជាពិសេស លោកបិន អាលី នេះ ធ្លាប់ជាមេដឹកនំាអំណាចផ្តាច់ការដល់ទៅ២៣ឆ្នាំ?
បើមើលឲ្យជ្រៅបន្តិចក្នុងនយោបាយនៅទុយនីស៊ី នេះគេឃើញថា លោកបិន អាលី និងគ្រួសារជាអ្នកក្តោបក្តាប់ភាគច្រើនជីវិតនយោបាយ និងសេដ្ឋកិច្ចរបស់ប្រទេស។ លោកបិន អាលី ប្រើកំលាំងប៉ូលិសដើម្បីបង្រ្កាបទៅលើអ្នកណាដែលគាត់ចាត់ទុកថា បានប្រឆាំងនឹងរូបគាត់។ ពួកប៉ូលិសជាងមួយសែននាក់ ដោយមានទាំងអង្គរក្សផ្ទាល់របស់គាត់ផង ត្រូវគ្រប់គ្រងដោយក្រសួងមហាផ្ទៃ។
ប៉ុន្តែ នៅថ្ងៃព្រហស្បតិ៍សប្តាហ៍មុន នៅចំពោះមុខការតស៊ូប្រឆាំងមិនដាច់របស់ប្រជាជន លោកបិន អាលី នោះបានប្រកាសឲ្យមិនឲ្យប៉ូលិសបាញ់ទៅក្រុមបាតុករ និងបានសម្រេចផ្លាស់ប្តូររដ្ឋមន្រ្តីក្រសួងមហាផ្ទៃ ដែលជាដៃជើងរបស់គាត់។ លោកបិន អាលី ថែមទាំងសន្យាដោយប្រថុចញ៉ុចថា លោកនឹងជួយផ្តល់ការងារបីសែនកន្លែងដល់យុវជនទុយនីស៊ី។ ជំហរផ្លាស់ប្តូររបស់លោក បិន អាលី នៅពេលនោះ គឺកើតឡើងក្រោយពេលដែលអគ្គមេបញ្ជាការទ័ពមិនបាញ់ប្រហារទៅលើបាតុករ ទៅតាមបញ្ជារបស់ប្រធានាធិបតី។ ពួកកងទ័ពនេះទៀត ថែមទាំងជួយការពារក្រុមបាតុករពីការបាញ់ប្រហាររបស់ប៉ូលិស និងកងអង្គរក្សរបស់ប្រធានាធិបតី។ គ្មានការគាំទ្ររបស់ពួកទាហាន លោកបិន អាលី មើលឃើញថា លោកបានបាត់កំលាំងគាំទ្រ ទល់នឹងចលនាប្រឆាំងរបស់ប្រជាជនទុយនីស៊ី។
មកដល់ពេលនេះ គេមិនដឹងពីមូលហេតុពិតប្រាកដដែលធ្វើឲ្យខាងកងទ័ពលែងគាំទ្រអតីត ប្រធានាធិបី បិន អាលីទេ។ នៅក្នុងថ្ងៃបះបោរ កាលពីចុងសប្តាហ៍មុន នេះ មេបញ្ជាការទ័ពបានសុំលាលែងពីតំណែង និងព្រមានប្រាប់លោកបេន អាលី ឲ្យចុះចេញពីអំណាច ព្រោះថា ប្រព័ន្ធនយោបាយបច្ចុប្បន្នលែងដំណើរការទៀតហើយ។ ជំហររបស់ទាហានទុយនីស៊ី គឺខុសពីកងប៉ូលិសដែលនៅតែស្មោះស្ម័គ្រនឹងលោកបិន អាលី។ នេះប្រហែលជាទាក់ទងនឹងបញ្ហាផលប្រយោជន៍។
គួរដឹងថា នៅក្នុងប្រទេសទុយនីស៊ី ក្រោមការគ្រប់គ្រងរបស់លោកបិន អាលី អ្នកដែលបំរើការឲ្យលោកបិន អាលី និងដែលជាប់សាច់សាលោហិតរបស់លោកបិន អាលីទាំងអស់សុទ្ធតែបានទទួលប្រយោជន៍ពីអំណាចគ្រប់គ្រងរបស់ ប្រធានាធិបតី។ នៅក្នុងប្រទេសដែលរស់ដោយវិស័យទេសចរណ៍ និងការវិនិយោគបរទេស គេឃើញក្រុមគ្រួសាររបស់លោកបិន អាលីគ្រប់គ្រងច្រើនជាង ៥០ភាគរយ នៃសេដ្ឋកិច្ចជាតិ។ ភាគហ៊ុនក្នុងការវិនិយោគលើអចលនទ្រព្យ ក្នុងក្រុមហ៊ុនឯកជន សណ្ឋាគារ និងក្រុមហ៊ុនទូរស័ព្ទធំៗ សុទ្ធតែជារបស់សាច់ញាតិរបស់លោកបិន អាលី ជាពិសេសរបស់ភរិយារបស់លោក គឺលោកស្រី Leila Trabaelsi។
បើតាមវិបសៃត៍របស់សកម្មជនទុយនីស៊ី នៅក្រៅស្រុក ចរន្តសាច់ប្រាក់តែនៅក្នុងរង្វង់គ្រួសារមានតម្លៃ ១៨ពាន់លានដុល្លារ គឺស្មើនឹងទឹកប្រាក់បំណុលរបស់ប្រទេសទុយនីស៊ី ទាំងមូល។ គេបានប្រមាណថា លោកបិន អាលី ដែលពីមុនការឡើងកាន់អំណាច គ្មានអ្វីសោះក្នុងដៃ ពេលនេះ បានមានទ្រព្យសម្បត្តិ ពេលនេះ រហូតប្រមាណ ៥ពាន់លានដុល្លារ។ ភរិយាររបស់លោកបិន អាលីឯណោះវិញ ត្រូវគេសង្ស័យថា បានចាកចេញពីប្រទេស ទៅជាមួយនឹងសាច់មាស ១តោនកន្លះ។ ចំណែក បងប្រុស កូនប្រសារប្រុស របស់លោកស្រីLeilaត្រូវគេស្គាល់ទូទៅថា មានជំនាញទិញដី និងអគារបេតិកភណ្ឌជាតិ ក្នុងតម្លៃថោក និងចាប់លក់វិញ ក្នុងតម្លៃថ្លៃកប់ពពក។
អ្នកឈ្នះកាត់ទោសអ្នកចាញ់
បើទោះបីជាតុលាការបច្ចុប្បន្ននៅសេសសល់ពីរបបគ្រប់គ្រងរបស់លោកបិន អាលី ប៉ុន្តែ ទាំងរដ្ឋាភិបាលបច្ចុប្បន្ន និងសមាជិករដ្ឋាភិបាលបានខំប្រឹងកែប្រែខ្លួនដើម្បីជៀសផុតពីការទិតៀន របស់មហាជនទុយនីស៊ី។ មហាជនដែលនៅតែកំពុងក្រេវក្រោធ មិនពេញចិត្តនឹងឲ្យមន្រ្តីរបស់លោកបិន អាលីនៅបន្តកាន់អំណាចក្នុងរដ្ឋាភិបាលបច្ចុប្បន្ន។ ដើម្បីយកយករួចខ្លួន មន្រ្តីខ្លះបានដោះខោអាវចាស់ ចេញពីធ្វើជាបក្សពួកលោកបិន អាលី មកធ្វើជាជនរងគ្រោះដោយរបបបិន អាលីទៅវិញ។
សមាជិកគ្រួសារ៣៣នាក់របស់លោកបិន អាលីត្រូវបានចាប់ខ្លួន ជាមួយនឹងទ្រព្យសម្បត្តិមាសពេជ្រជាច្រើន កាលពីថ្ងៃពុធ។ អ្នកទាំង៣៣នាក់ នេះបើតាមព័ត៌មានពីអាជ្ញាធរទុយនីស៊ី គឺជាបងប្រុសរបស់ភរិយាប្រធានាធិបតី កូនក្មួយ និងដន្លងៗរបស់ក្រុមគ្រួសារលោកបិន អាលី។
ការចាប់អ្នកពាក់ព័ន្ធនឹងរបបចាស់ គឺរបបបិន អាលី នឹងមិនបញ្ចប់ត្រឹមនេះទេ។ ប៉ុន្តែ អ្វីដែលសំខាន់ ដែលរដ្ឋអំណាចទុយនីស៊ីត្រូវធ្វើ ពេលនេះគឺការស្រោចស្រង់ប្រទេសដែលទើបចាកផុតពីអំណាចផ្តាច់ការ ឲ្យទៅជាប្រទេសប្រជាធិបតេយ្យមួយ។
សម្រាប់ ប្រជាជនទុយនីស៊ី ១០លាននាក់ដែលមានភាគច្រើនជាយុវជនអត់ការងារ កំណែទម្រង់នយោបាយបច្ចុប្បន្ន និងការពន្លឿនសេដ្ឋកិច្ចផ្តល់ការងារធ្វើដល់យុវជន គឺរឿងអាទិភាព។ របបផ្តាច់ការបិន អាលីបានបិទបញ្ចប់ទៅពេលនេះមែន ប៉ុន្តែ ក្រោមការគ្រប់គ្រងរបស់រដ្ឋាភិបាលបណ្តោះអាសន្នបច្ចុប្បន្ន ដែលនៅ ទន់ខ្សោយនៅឡើយ រួមផ្សំនឹងអំពើអនាធិបតេយ្យពាសពេញប្រទេស គេកំពុងខ្លាចថា របបផ្តាច់ការនឹងអាចវិលមកជាថ្មី ប្រសិនបើរដ្ឋាភិបាលពេលនេះ មិនខំសហការធ្វើការជាមួយគណបក្សប្រឆាំង និងក្រុមអ៊ីស្លាមជ្រុលនិយមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ