ក្រុមយោធានឹងជជែកបញ្ហាទទួលយកអ្នកសង្កេតការណ៍ឥណ្ឌូណេស៊ី
ការដកកងទ័ព និងការទទួលយកអ្នកសង្កេតការណ៍ឥណ្ឌូណេស៊ីនឹងត្រូវលើកយកមកជជែកនៅក្នុងជំនួបរវាងរដ្ឋមន្ត្រីការពារជាតិនៅពេលខាងនេះ ខណៈពេលដែលរដ្ឋមន្ត្រីទាំងពីរនឹងត្រូវជួបគ្នាក្នុងកិច្ចប្រជុំគណៈកម្មាធិការព្រំដែនទូទៅ។ ព័ត៌មានស្តីអំពីការពិភាក្សាអំពីការដកកងទ័ព និងការទទួលយកអ្នកសង្កេតការណ៍ឥណ្ឌូណេស៊ីត្រូវបានអះអាងដោយលោកឧបនាយករដ្ឋមន្ត្រីសុខ អានរដ្ឋមន្ត្រីទីស្តីការគណៈរដ្ឋមន្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
រដ្ឋមន្ត្រីនៃទីស្តីការគណៈរដ្ឋមន្ត្រីលោកសុខ អានបានថ្លែង នៅថ្ងៃសុក្រទី២កញ្ញានេះថា កម្ពុជានិងថៃនឹងជជែកគ្នាអំពីការដកកងទ័ព និងការទទួលយកអ្នកសង្កេតការណ៍ឥណ្ឌូណេស៊ី។ នេះជាការអះអាងច្បាស់មួយពីភាគីកម្ពុជា អំពីរបៀបវារៈនេះដ៏រសើបនេះ នៅពេលដែលមន្ត្រីកម្ពុជាផ្សេងទៀតនៅមានការប្រុងប្រយ័ត្នក្នុងការធ្វើអត្ថាធិប្បាយអំពីបញ្ហានេះ។
មុននឹងចេញដំណើរទៅប្រទេសចិន ដើម្បីចូលរួមក្នុងសន្និសីទនៃគណបក្សនយោបាយអាស៊ី លោកឧបនាយករដ្ឋមន្ត្រីសុខ អានបានថ្លែងប្រាប់អ្នកកាសែតថា របៀបវារៈស្តីពីការទទួលយកអ្នកសង្កេតការណ៍ឥណ្ឌូណេស៊ីនឹងត្រូវដាក់ជជែក នៅក្នុងកិច្ចប្រជុំដែលដឹកនាំដោយរដ្ឋមន្ត្រីការពារជាតិលោកទៀ បាញ់ និងសមភាគីថៃ លោកយុទ្ធសាក់ សាស៊ីប្រាផា។
បើតាមការបញ្ជាក់របស់លោក សុខ អាន ដដែល នាយករដ្ឋមន្ត្រីថៃ លោកស្រីយីងឡាក់ ស៊ីណាវ៉ាត់បានយល់ព្រមទទួលយកអ្នកសង្កេតការណ៍ឥណ្ឌូណេស៊ីហើយ។
នៅថ្ងៃទី៧ និងទី៨ខែកញ្ញានេះ ក្រុមលេខាកម្ពុជាថៃនៃគណៈកម្មាធិការព្រំដែនទូទៅនឹងជួបប្រជុំគ្នា នៅសណ្ឋាគារភ្នំពេញ ក្នុងរាជធានីភ្នំពេញ ដើម្បីកំណត់របៀបវារៈរួមគ្នាសម្រាប់ដាក់ចូលក្នុងកិច្ចប្រជុំថ្នាក់រដ្ឋមន្ត្រីការពារជាតិកម្ពុជាថៃ។ របៀបវារៈសរុបចំនួន១៨ចំនុចដែលពាក់ព័ន្ធនឹងការពង្រឹងកិច្ចសហប្រតិបត្តិការយោធាតាមព្រំដែននឹងត្រូវភាគីយោធាទាំងពីរជជែកជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ