យោធាកម្ពុជា-ថៃចាប់ផ្តើមជជែកអំពីសហប្រតិបត្តិការព្រំដែន
ប្រតិភូយោធាកម្ពុជានិងថៃថ្នាក់ភូមិភាគបានចាប់ផ្តើមពិភាក្សាគ្នាហើយនៅព្រឹកថ្ងៃទី២៤សីហានេះ នៅខេត្តណាខនរាជសីមាក្នុងប្រទេសថៃ។ អ្នកនាំពាក្យក្រសួងការពារជាតិកម្ពុជាបានប្រាប់អោយដឹងថា កិច្ចសហការនៅតាមព្រំដែនស្តីពីការថែរក្សាសន្តិសុខ ប្រឆាំងការជួញដូរគ្រឿងញៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
ប្រតិភូយោធាភូមិភាគ៤របស់កម្ពុជា និងយោធាភូមិភាគ២របស់ថៃបានចាប់ផ្តើមពិភាក្សាគ្នាហើយនៅថ្ងៃពុធទី២៤សីហានេះ។ អ្នកនាំពាក្យក្រសួងការពារជាតិកម្ពុជាលោកឧត្តមសេនីយឯកឈុំ សុជាតិបានអះអាងអោយដឹងថា ក្នុងរយៈពេល២ថ្ងៃនេះ ភាគីយោធាទាំងពីរត្រូវជជែកអំពីបញ្ហារក្សាសុវត្ថិភាពព្រំដែនទូទៅ ដែលនៅក្នុងនោះរួមមានការសម្រួលស្ថានភាពតានតឹងនៅតាមព្រំដែន ការប្រយុទ្ធប្រឆាំងគ្រឿងញៀន ប្រឆាំងការជួញដូរមនុស្ស ការថែរក្សាបរិស្ថានជាដើម។ ភាគីយោធាទាំងពីរក៏ត្រូវជជែកធានាផងដែរអំពីការចៀសវាងពីការផ្ទុះអាវុធដាក់គ្នាដូចក្នុងពែលកន្លងមក។
គួរបញ្ជាក់ថា នៅពេលដែលយោធាថ្នាក់តំបន់នៃប្រទេសទាំងពីរបានចាប់ផ្តើមជួបគ្នាស្រាប់តែរដ្ឋមន្ត្រីការពារជាតិថៃលោកយុទ្ធសាក់ សាស៊ីប្រាផាបានថ្លែងប្រកាសផ្លាស់ប្តូរជំហរ។ ផ្លាស់ប្តូរពីការប្រឆាំងវត្តមានអ្នកសង្កេតការណ៍ឥណ្ឌូនេស៊ី មកជាការទទួលស្គាល់ពីសារៈសំខាន់នៃវត្តមានអ្នកសង្កេតការណ៍ឥណ្ឌូនេស៊ីវិញនៅពេលនេះ។
ការផ្លាស់ប្តូរជំហរនេះ បានធ្វើអោយក្រសួងការពារជាតិកម្ពុជាត្រូវធ្វើលិខិតអបអរសាទរកាលពីថ្ងៃទី២៣សីហា។ អ្នកនាំពាក្យក្រសួងការពារជាតិកម្ពុជាបានអត្ថាធិប្បាយថា ការជួបគ្នាលើកដំបូងរវាងយោធាថ្នាក់តំបន់នៃប្រទេសទាំងពីរនៅក្នុងអណត្តិរបស់លោកស្រីយីងឡាក់ ស៊ីណាវ៉ាត់គឺជាសញ្ញាល្អនៃទំនាក់ទំនងយោធាកម្ពុជាថៃ។ ទំនាក់ទំនងល្អដែលលោកឈុំ សុជាតិបញ្ជាក់ថាអាចបញ្ចប់ទំព័រអាក្រក់ពីសម័យរបស់លោកអាប់ភីស៊ីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ